Qəlblərdə yaşayacaq lider

Ulu öndər Heydər Əliyevin 87-ci ildönümünə həsr olunmuş "Azərbaycanşünaslığın aktual problemləri" I Beynəlxalq Elmi Konfrans

Dünən Bakı Slavyan Universitetinin akt zalında ümummilli lider Heydər Əliyevin 87-ci ildönümünə həsr olunmuş "Azərbaycanşünaslığın aktual problemləri" mövzusunda I Beynəlxalq Elmi Konfransın açılış mərasimi keçirildi. Tədbirdən əvvəl iştirakçılar Fəxri Xiyabanda Heydər Əliyevin məzarını ziyarət edərək, önünə əklil qoydular.

Tədbiri giriş sözü ilə Bakı Slavyan Universitetinin rektoru, professor Kamal Abdullayev açaraq, konfransın keçirilmə səbəbindən danışdı. O, qeyd etdi ki, Bakı Slavyan Universiteti respublikanın elmi-mədəni həyatına töhfə verə biləcək yeni layihələrə imza atır. O, ümummilli lider Heydər Əliyevin anadan olmasının 87-ci ildönümünə həsr olunmuş elmi konfransın, nəinki universitetin 10 illik fəaliyyəti çərçivəsində, eləcə də, bütün Azərbaycanın elmi-mədəni mühitində mühüm hadisə oduğunu bildirdi. Azərbaycanşünaslığın inkişafı, xarici ölkələrdə təbliği və tədqiqi, eləcə də, həmin ölkələrdə fəaliyyət göstərən Azərbaycan diaspor təşkilatları ilə sıx əlaqələrin inkişafı məqsədilə keçirilən konfrans may ayının 3-dən başlayaraq 8-nə qədər Bakı Slavyan Universiteti, Naxçıvan Dövlət Universiteti və Gəncə Dövlət Universitetində təşkil olunacaqdır. Kamal Abdullayev qeyd etdi ki, konfransın işi azərbaycançılığın müxtəlif aspektlərini ehtiva edən siyasət, hüquq, tarix, etnoqrafiya, dil və ədəbiyyat, mədəniyyət, incəsənət, elm və təhsil, iqtisadiyyat və coğrafiya istiqamətləri üzrə aparılır. Beynəlxalq konfrans çərçivəsində Türkiyə, Fransa, Rusiya, Litva, İraq, Qazaxıstan universitetlərinin professor və elmi rəhbərləri azərbaycanşünaslıqla bağlı çıxış edəcəklər. Kamal Abdullayev azərbaycançılıq ideyalarının təbliğində geniş müstəvidə Heydər Əliyevin rolunu vurğulayıb, Onun siyasətinin nəticəsi olaraq, məhz bu mövzuda konfransın keçirilməsinin reallığını söylədi. Belə ki, müstəqillik dövründə Heydər Əliyevin yürütdüyü siyasətin nəticəsi olaraq, Azərbaycan dünya miqyasında öz yerini, mövqeyini müəyyənləşdirmiş, dövlətçilik ideyalarının təbliğatçısına çevrilmişdir. Dahi öndər Heydər Əliyev fəaliyyəti dövründə Azərbaycanın mədəniyyəti, siyasəti, tarixi geniş bir şəkildə tədqiq olunaraq, geniş sferanı əhatə etmişdir. Universitetin rektoru 9 dünya ölkəsinin qatıldığı konfransın tələbələrdə Azərbaycançılıq ideyalarının aşılanmasında rolunu vurğulayaraq, gələcək nəslin formalaşmasında bunun müstəsnalığını qeyd etdi. "Heydər Əliyevin siyasətinin əsasında, duran azərbaycançılıq Azərbaycanın bir dövlət olaraq inkişafına birbaşa təsir göstərən amillərdən biridir" deyən Kamal Abdullayev ümummilli liderin 87-ci il dönümünə həsr olunmuş konfransın əsasında məhz Onun yürütdüyü bu səpkidəki siyasətinin geniş bir şəkildə təbliğinə diqqəti yönəltməkdir: "Dünyanın müxtəlif yerlərində yaşayan və öz həyatlarını Azərbaycanşünaslıq üzərində qurmuş insanların bir araya gəlməsində bu konfransın rolu danılmazdır. Konfrans çərçivəsində professor Yuri Pompeyevin "Qarabağ gündəlikləri" kitabının təqdimat mərasimi də keçiriləcəkdir. Bu mərasim təkcə Bakı Slavyan Universitetində deyil, eləcə də, Naxçıvan Dövlət Universitetində təşkil olunacaqdır. Rusiyalı professorun Qarabağ həqiqətlərinə olan münasibəti ictimai marağa səbəb olmaqla yanaşı, qeyri-xalqın nümayəndəsinin Azərbaycan reallıqlarına olan yanaşmasının dünya arenasına çatdırılmasında da əhəmiyyəti xüsusidir".

Konfransda çıxış edən təhsil nazirinin müavini Elmar Hüseynov "Azərbaycanşünaslığın aktual problemləri"nə həsr olunmuş beynəlxalq konfransın əhəmiyyətini vurğulayaraq, bir çox ölkələrin nümayəndələrinin bu konfransa cəlb olunmasında Azərbaycanın xüsusi rolunun olduğunu bildirdi. Mütəmadi olaraq, belə tədbirlərin keçirilməsi Azərbaycan təhsil sistemində gənclərin azərbaycançılıq ideyaları ilə tərbiyə olunmasına müsbət təsirini qeyd etdi.

Tədbirdə çıxış edən rusiyalı professor Yuri Pompeyev Azərbaycanda mövcud olan ictimai-siyasi atmosferdən və bunun əsasının Heydər Əliyev tərəfindən qoyulduğunu söyləyərək, dövlətin imicinin formalaşmasının təhsilə də təsir göstərdiyini vurğuladı. O, qeyd etdi ki, bu gün Azərbaycan sürətli bir inkişaf yolundadır və kadr potensialının hazırlığı da diqqətdə saxlanılır. Konfransda latviyalı Kavaliauskas Vidas çıxış edərək, ömrünün 11 ilini Bakıda yaşadığını və gənclik həyatının məhz Azərbaycanla sıx bağlı olduğunu söylədi. O, bugünkü Azərbaycan reallıqlarının bu şəkildə təzahürünü Heydər Əliyevin adı ilə bağlayaraq, Azərbaycan ədəbiyyatına, mədəniyyətinə, tarixinə olan bu münasibətin məhz ulu öndər tərəfindən təməlinin qoyulduğunu söylədi. Moskva Dövlət Universitetinin Azərbaycanşünaslıq fakültəsinin 3-cü kurs tələbəsi Olqa Kuraş BSU-nun dəvəti ilə bu konfransa qoşulduğundan məmnunluq duyduğunu bildirdi. Konfrans çərçivəsində həmişə arzusunda olduğu, lakin görmədiyi Naxçıvan və Gəncə şəhərlərində olacağını söylədi. Əlbəttə ki, Qarabağın, Şuşanın arzusunda olan konfrans iştirakçısı xalq şairi Səməd Vurğunun "Azərbaycan" şeirindən bir parça səsləndirməklə, öz məhəbbətini ifadə etdi. Azərbaycanda isti münasibətin hər zaman duyulduğunu qeyd edən qonaq böyük bir könül rahatlığı ilə bu konfransda iştirakını söylədi. Tədbirdə gürcüstanlı David Qoçeridze, fransalı Mişel Malleberq, rusiyalı Alla Axundova, iraqlı Mehmet Bayaq və başqaları çıxış edərək, konfransın əhəmiyyətindən danışdılar və Azərbaycançılıq ideyalarının təbliğ və tədqiqinin vacibliyini vurğuladılar.

Konfransda çıxış edən Nəsimi rayon icra hakimiyyətinin başçısı Nəsib Məhməliyev belə genişmiqyaslı bir konfransın təşkili üçün tədbir təşkilatçılarına öz minnətdarlığını bildirdi. O, qeyd etdi ki, Heydər Əliyev və Azərbaycançılıq olduqca geniş mövzudur. Heydər Əliyevin sosial sferada, ordu quruculuğunda, ölkə iqtisadiyyatında və s. sahələrdə cahanşümul layihələri öz müsbət nəticəsini vermişdir. Azərbaycan müstəqil dövlət olaraq beynəlxalq təşkilatlara üzv qəbul edilmiş, Azərbaycan reallıqları informasiya blokadasını yararaq, dünya ictimaiyyətinə çatdırılmışdır. N.Məhməliyev onu da qeyd etdi ki, Azərbaycanda dini tolerantlıq hər zaman diqqətdə olmuş, belə ki, qeyri-xalqlara münasibət yüksək bir şəkildə özünü büruzə vermişdir. Müxtəlif xalqların dinlərinə ulu öndər Heydər Əliyev həssaslıqla yanaşaraq, qeyri-xalqların Azərbaycanda sərbəstliyinin və dini dəyərlərinin toxunulmazlığına şərait yaratmışdır. Azərbaycanın yeganə probleminin Qarabağ olduğunu deyən icra hakimiyyətinin başçısı mövcud problemlərlə bağlı dünya miqyasında kifayət qədər işlərin görüldüyünü qeyd edib, bu gün də təqdimatının keçiriləcəyi "Qarabağ gündəliyi" kitabının da əhəmiyyətini vurğuladı.

Konfransın açılış günü çıxışlar sona yetdikdən sonra qonaqlar Bakı Slavyan Universiteti ilə tanış oldular. Qeyd edim ki, beynəlxalq elmi konfrans mayın 5-də Naxçıvan Dövlət Universitetində, mayın 6-sı Gəncə Dövlət Universitetində davam etdiriləcək. Mayın 8-də isə Bakı Slavyan Universitetində bağlanış mərasimi keçiriləcək.

NƏZAKƏT ƏLƏDDİNQIZI

Səs.- 2010.- 4 may.- S. 5.