“Azərbaycanın müstəqilliyi daimidir, dönməzdir"

YAP Ağstafa rayon təşkilatının qadınlar şurasının keçirdiyi tədbirdə ulu öndər Heydər Əliyevin xidmətləri bir daha diqqətə çatdırıldı

Ölkəmizin hər yerində ümummilli lider Heydər Əliyevin anadan olmasının 87-ci ildönümü ilə bağlı bir sıra tədbirlər keçirilməkdədir. Öz zəngin və mənalı həyatını xalqının inkişafı və rifahına həsr edən ulu öndər, öz müqəddəs əməlləri ilə xalqın qəlbində əbədi yer tutub. Dünən YAP Ağstafa rayon təşkilatının qərargahında ulu öndər Heydər Əliyevin anadan olmasının 87 illiyinə həsr olunmuş tədbir keçirildi. İlk öncə, tədbir iştirakçıları ulu öndər Heydər Əliyevin xatirəsini bir dəqiqəlik sükutla yad etdilər. Tədbirdə çıxış edən YAP Ağstafa rayon təşkilatı qadınlar şurasının sədri Niyasət Bəhrəmova açaraq, bildirdi ki, respublikamızın hər yerində ümummilli liderimiz Heydər Əliyevin anadan olmasının 87-ci ildönümü yüksək səviyyədə qeyd edilir: "Dövlətin iqtisadi dirçəlişinin, millətin mənəvi yüksəlişinin təməlini qoyan, "Azərbaycanın müstəqilliyi daimidir, dönməzdir" deyən və bunun yeni dövlətçilik konsepsiyasının əsası olduğunu yeni Azərbaycanın timsalında dünyaya nümayiş etdirən ulu öndər Heydər Əliyev oldu. Bu gün Azərbaycan qadını kişilərlə çiyin-çiyinə çalışır, səsi ən yüksək tribunalardan gəlir. Bu gün Azərbaycanı dünyaya tanıtdıran böyük öndərin qarşısında daim böyük minnətdarlıq hissi ilə baş əyirik".

N.Bəhrəmova qeyd etdi ki, ulu öndərə sonsuz hörmət və dərin məhəbbət rəmzi kimi respublikamızın bütün yerlərində ümummilli liderimizə heykəllər qoyulub: "Amma o abidələrin ən əzəmətlisi hər bir azərbaycanlının qəlbində ucaldılıb. Azərbaycanlı olması ilə fəxr edən, bu fəxarət duyğusunun ən böyük nemət olduğunu hər birimizə öyrədən də ümummilli lider Heydər Əliyev oldu".

YAP Ağstafa rayon təşkilatının qadınlar şurasının sədri ümummilli lider Heydər Əliyev hakimiyyətinin bütün dövrlərində Azərbaycanın gələcəyi üçün çalışdığını söylədi: "Ümummilli liderimiz Heydər Əliyevin fəaliyyətinin əsasını Vətənə sədaqət, xalqa xidmət təşkil edib. Bugünkü uğurlar ulu öndərin hakimiyyətinin birinci dövründə ölkənin iqtisadi qüdrətinin artmasına, milli-mənəvi dəyərlərimizin, dilimizin qorunmasına, azərbaycançılığın möhkəmləndirilməsinə, yüksək ixtisaslı kadrların yetişməsinə yönələn addımların davamı kimi qiymətləndirilir. Xalqının xilaskarı olan Heydər Əliyev Azərbaycanın müstəqilliyinin əbədi olması üçün tarixi missiyanı ləyaqətlə yerinə yetirdi".

N.Bəhrəmova bu gün Heydər Əliyev siyasi kursunun davamçısı ölkə Prezidenti, Yeni Azərbaycan Partiyasının Sədri İlham Əliyevin uğurlu siyasəti nəticəsində Azərbaycanın bütün sahələrdə qazandığı nailiyyətlərə diqqəti yönəltdi: "Cənab İlham Əliyev bütün çıxışlarında bəyan edir ki, Azərbaycanın daha da qüdrətlənməsi üçün Heydər Əliyev siyasi kursu davam etdirilməlidir".

Tədbirdə partiyanın digər fəalları da çıxış edərək, qadınların cəmiyyətdəki rolundan, ictimai-siyasi həyatda fəaliyyətlərindən geniş bəhs etdilər.

RƏFİQƏ KAMALQIZI

Səs.- 2010.-4 may.- S. 5.