YAP Nəsimi rayon təşkilatı və Nəsimi rayon icra hakimiyyəti ümummilli lider Heydər Əliyevin 87-ci ildönümünə həsr edilmiş tədbir keçirdi

Dünən Azərbaycan Dillər Universitetinin (ADU) akt zalında YAP Nəsimi rayon təşkilatının və Nəsimi rayon icra hakimiyyətinin birgə təşkil etdiyi ümummilli lider Heydər Əliyevin 87-ci ildönümünə həsr edilmiş yubiley tədbiri keçirildi. Tədbiri giriş sözü ilə YAP Nəsimi rayon təşkilatının sədri, millət vəkili Məlahət İbrahimqızı açdı. O, qeyd etdi ki, ümummilli lider Heydər Əliyev, hər şeydən əvəl, tarixi şəxsiyyətdir. Tarixi şəxsiyyətlərin yetişməsində isə ictimai-siyasi mühit, hadisə və proseslər öz sözünü deyir: "Lakin bu hadisə və proseslərin mərkəzində dayanan ən əsas amil yenə də şəxsiyyətlərin özüdür. Onun Azərbaycana rəhbərlik etdiyi illər ərzində xalq, vətən üçün etdiklərini bəzən normal təfəkkürün əhatə dairəsinə sığışdırmaq olmur. Böyük öndərimiz tariximizə xilaskar kimi daxil olub və ölkəmizə rəhbərlik etdiyi hər iki dövrdə bu missiyanı çox böyük uğurla davam etdirib".

M.İbrahimqızı onu da bildirdi ki, müstəqil Azərbaycan dövlətinin qurulması birbaşa Heydər Əliyevin adı ilə bağlıdır. Bu tarixi həqiqət bütün xalqımız tərəfindən qəbul olunur: "Azərbaycan xalqını rəzalətdən, vətəndaş müharibəsindən, parçalanmaq təhlükəsindən xilas edən ulu öndər bizə sabit inkişafı təmin edilmiş bir dövlət miras qoyub".

Tədbirdə çıxış edən ADU-nin rektoru, Milli Məclisin Beynəlxalq Əlaqələr Komitəsinin sədri Səməd Seyidov vurğuladı ki, ulu öndər Heydər Əliyevin həyatdan gedişi bizim üçün nə qədər ağır olsa da, özümüzü bir tarixi gerçəklə ovundura bilərik-bu, Heydər Əliyevin qurduğu və xalqımıza etibar etdiyi Azərbaycan dövlətidir: "Bu dövlət hər ili başa vurduqca, yaşının üstünə yaş gəldikcə, onun hər uğurunun üzərinə yeni uğur əldə etdikcə, Heydər Əliyev yaşayacaq".

S.Seyidov onu da əlavə etdi ki, 1993-cü ilin iyun ayında xalqın tələbi ilə yenidən hakimiyyətə qayıdan ulu öndərin bu dönüşü ilə ictimai-siyasi həyatın bütün sahələrində yenidən bir dirçəliş, oyanış baş verdi: "Azərbaycanın milli dövlətçilik tarixində ilk dəfə olaraq, məhz Heydər Əliyevin simasında siyasi prinsiplər və milli-mənəvi meyarlar birləşdi".

Azərbaycan Tibb Universitetinin (ATU) rektoru, akademik Əhliman Əmiraslanov çıxışında qeyd etdi ki, Azərbaycan səhiyyəsinin, tibb elmi və tibb təhsili sisteminin bütün ağırlıqlarını öz çiyinləri üzərinə götürərək, onu inkişaf etdirən və gələcək perspektivlərini müəyyənləşdirən dahi Heydər Əliyev dəsti-xətti, qüdrəti öz möhtəşəmliyi ilə kəskin surətdə seçilir və bənzərsizliyi ilə fərqlənirdi: "Müasir Azərbaycanın memarı, ulu öndər Heydər Əliyevin siyasəti əbədidir, həmişəyaşardır. 1969-cu il iyul ayının 14-də ulu öndər Heydər Əliyevin ilk dəfə Azərbaycan KP MK-nın birinci katibi seçildiyi gündən respublikamızda xoş əhval-ruhiyyəli canlanma, gələcəyə nikbinliklə baxmağa əsas verən sevincli anlar hökm sürməkdə idi. O vaxtlar mən Azərbaycan Dövlət Tibb İnstitutunun dördüncü kurs tələbəsi idim və Azərbaycan xalqının bütün zümrələrindən olan insanların bu seçimə ürəkdən sevinməsi bizə - 60-cı illərin tələbələrinə də sirayət etmişdi. Hamı tənəzzüllə üzləşən Azərbaycana rəhbərliyə gəlmiş bu fövqəladə insana, sözün həqiqi mənasında, inanır və ümid çırağı kimi baxırdı. Çox keçmədi ki, ümummilli lider zirvəsinə yüksələrək, dünya siyasətçiləri sırasında öncül mövqeyə çıxan dahi Heydər Əliyev fenomeni ona bəslənən ümidləri doğruldaraq əsil xarüqələr yaratmağa başladı. Xalqın öz liderinə olan inamının geniş vüsət alması yerinə yetirilən əməli tədbirlərə, gərgin fəaliyyətin əyani nəticələrinə əsaslanırdı".

Ə.Əmiraslanov onu da əlavə etdi ki, Heydər Əliyevin xarici ölkələrdə oxutdurduğu gənclər indi Azərbaycanda aparıcı mütəxəssislərə çevriliblər. Onun qoyduğu təməllərin bəhrəsi Azərbaycan Tibb Universitetinin timsalında özünü daha qabarıq şəkildə göstərir: "Bu ali təhsil ocağı yarandığı gündən həmişə milli kadr qıtlığından əziyyət çəkib. Lakin indi tam əminliklə demək olar ki, Azərbaycanda tibb sahəsinin, səhiyyənin bütün sahələri üzrə çox sanballı, yüksək səviyyəli milli kadrlar yetişib və onlar da öz məktəblərini yarada biliblər".

Tədbirdə çıxış edən Nəsimi rayon icra hakimiyyətinin başçısı Nəsib Məhəməliyev ulu öndərin xalq təsərrüfatının bütün sahələrinin inkişafını həmahəng surətdə ardıcıllıqla həyata keçirdiyini, yeniliyə, tərəqqiyə sədd yaradan, keçmişdən miras qalmış maneələri, lüzumsuz stereotipləri inamla aradan qaldırdığını vurğuladı: "Onun düşünən beyni sanki istirahət bilmədən daim fəaliyyət göstərir, Azərbaycanın gələcəyi naminə yeni-yeni ideyaların eskizlərini hazırlayır və dərhal da onların zəruriliyini hiss edib həyata keçirilmələrinə şərait yaradırdı. Heydər Əliyevin uzaqgörən siyasəti nəticəsində Azərbaycan ən mütərəqqi müasir islahatların tətbiqi və həyata keçirilməsi meydanına çevrilmişdi. Ümummilli lider gənclər haqqında düşündüklərini ardıcıllıqla həyata keçirə bildi. Bu gün ölkədə yaranan bir çox gənclər təşkilatı öz miqyasını genişləndirmişdir. Ulu öndərin xalqımız tərəfindən bəyənilən və dəstəklənən iqtisadi-siyasi kursu hazırda ölkə Prezidenti İlham Əliyev tərəfindən böyük müvəffəqiyyətlə davam etdirilir".

Tədbirdə çıxış edən tələbələr Əsmər Ramazanova və Emil Əliyev qeyd etdilər ki, ulu öndər Heydər Əliyevin siyasətinin bundan sonra davam etməsi Azərbaycan dövlətinin tərəqqisi üçün ən böyük təminatdır. Bu yol Azərbaycan dövlətçiliyi üçün ən uğurlu və əbədi yoldur.

Tədbirdə, həmçinin, qeyd olundu ki, ulu öndər Heydər Əliyevin doğum günün 87-ci ildönümü ilə əlaqədar olaraq ali təhsil ocaqlarının tələbələri arasında müsabiqə elan edilmiş və 34 tələbə müsabiqənin qalibi olmuşdu. Sonda müsabiqə qəlibləri diplom və qiymətli hədiyyələrlə mükafatlandırıldı.

SEVİNC NƏZƏROVA

Səs.- 2010.- 5 may.- S. 7.