Nəsimi rayonundakı "Zorge" bağında Gül bayramı keçirildi

Dünən Nəsimi rayonunda yerləşən "Zorge" bağında Nəsimi rayon icra hakimiyyəti ümummilli liderimiz Heydər Əliyevin anadan olmasının 87-ci ildönümü ilə əlaqədar ənənəvi Gül bayramı keçirildi. Bayramla əlaqədar "Zorge" bağında abadlıq işləri aparılıb. Həmçinin, rayonun orta məktəbləri və məktəbəqədər təhsil müəssisələri tərəfindən ciddi hazırlıq işləri görülüb. Rayonda yerləşən 159, 152, 133, 259, 54, 1 saylı məktəblərin şagirdləri və bağça uşaqları müxtəlif çiçək və güllərdən, bitkilərdən, yarpaqlardan hazırladıqları rəngarəng tablolar, aplikasiyalar, gül kompozisiyaları öz görünüşü və gözəlliyi ilə seçilmiş, onların fantaziyaları və imkanları nümayiş etdirilmişdir. Keçirilən tədbirdə Nəsimi sakinləri və şəhərimizin çoxsaylı qonaqları iştirak edirdi. Bayramda, həmçinin, Nəsimi rayon icra hakimiyyətinin başçısı Nəsib Məhəməliyev, YAP Nəsimi rayon təşkilatının sədri, millət vəkili Məlahət İbrahimqızı, millət vəkilləri Ülvi Quliyev, Ziyad Səmədzadə, rayonun idarə və təşkilatlarının, ali, orta və məktəbəqədər təhsil müəssisələrinin rəhbərləri iştirak edirdi. Onlar bağı gəzərək, maraqlı gül ekspozisiyaları ilə tanış oldular. Gözəl və rəngarəng gül kompozisiyaları, güldən hazırlanmış müxtəlif fiqurlar arasında ümummilli liderimiz Heydər Əliyevlə bağlı kompozisiyalar, əl işləri onlara xoş təsir bağışladı. Təsviri incəsənətlə məşğul olan məktəblilərin asfalt üzərində çəkdiyi şəkillər qonaqlar tərəfindən yüksək qiymətləndirildi. Bayram bağça uşaqlarının və məktəblilərin, eləcə də, incəsənət ustalarının konsert proqramı ilə davam etdirildi.

SEVİNC NƏZƏROVA

Səs.- 2010.- 6 may.- S. 5.