Heydər Əliyev ideyaları əbədidir

Yeni Azərbaycan Partiyası Tərtər rayon təşkilatının gənclər birliyi ulu öndər Heydər Əliyevin 87-ci ildönümü münasibəti ilə tədbir keçirib

Dünən YAP Tərtər rayon təşkilatının qərargahında ulu öndər Heydər Əliyevin anadan olmasının 87-ci ildönümü ilə əlaqədar rayon gənclər birliyinin yığıncağı keçirildi. Tədbir iştirakçıları ilk öncə rayonun mərkəzində ucaldılan ulu öndər Heydər Əliyevin abidəsi önünə əklil, tər çiçəklər qoyaraq, xatirəsini hörmətlə yad etdilər.

Sonra 120 nəfərdən çox partiya fəallarının iştirak etdiyi yığıncaqda çıxış edən YAP Tərtər rayon təşkilatı gənclər birliyinin sədri Cavanşir Musayev respublikamızın bütün regionlarında ulu öndərimiz Heydər Əliyevin 87-ci ildönümü ilə bağlı müxtəlif tədbirlər, idman yarışları, şagirdlər arasında müsabiqələr, iməciliklər keçirildiyini söylədi. C.Musayev bildirdi ki, ümummilli liderimiz Heydər Əliyev bütün türk dünyasının qəlbində əbədi yaşayır: "Tarixi şəxsiyyətlər hər bir xalqın tarixinin şərəf səhifəsi, inam nöqtəsidir. Dünya tarixində elə tarixi şəxsiyyətlər var ki, onlar dünya siyasətini yazır, öz ideyaları ilə zamanı qabaqlayırlar. XX əsrdə ulu Tanrı Azərbaycan xalqının da qismətinə dünya siyasətinin nəhəngi hesab olunan ümummilli liderimiz Heydər Əliyevi yazmışdır".

C.Musayev onu da bildirdi ki, Heydər Əliyev irsi böyük bir məktəbdir, ulu öndərin həyat və fəaliyyəti hər bir azərbaycanlı, hər bir gənc üçün nümunə və örnəkdir. Bu irsi öyrənmək və gələcək nəsillərə çatdırmaq bizim müqəddəs borcumuzdur: "Cəmiyyətimizdə hər bir zaman gənclərimizin rolu böyük olubdur. İstər dövlətin inkişafında, istər onun sütunlarının möhkəmlənməsində gənclərin rolu olub. Bizim də, əsas xoşbəxtliyimiz ondan ibarət olmuşdur ki, biz Heydər Əliyevin dönəmində siyasətə gəldik. Yəni, biz bu dövrdə öz şəxsiyyətimizi özümüz istədiyimiz formada qoruya bilmişik".

Yığıncaqda rayon uşaq musiqi məktəbinin müəllimi Emin Haqverdiyev, Qarağacı kənd orta məktəbin tarix müəllimi Rəşad Qarayev, 6 saylı kənd orta məktəbin müəllimi Zülfiyyə Abdullayeva, rayon mərkəzi xəstəxanasının həkimi Vüsalə Qəribova, Sarov kənd kitabxanasının müdiri Əfruz Babayeva və başqaları çıxış edərək ümummilli lider Heydər Əliyevin dövlətçilik strategiyasının həyata keçirilməsində Azərbaycan gənclərinin və qadınlarının rolu, onların ictimai-siyasi fəallığının artırılması istiqamətində görülən işlər barədə məlumat verdilər.

Tədbirdə çıxış edən YAP Tərtər rayon təşkilatının sədri Ramiz Şabanov dahi öndərimizin həyat və fəaliyyətinin müxtəlif dövrlərindən danışdı. Yeni Azərbaycan Partiyasının memarı olan Heydər Əliyevin yaratdığı partiyanın ətrafında yüz minlərlə insanların birləşdiyini qeyd edən rayon təşkilatının sədri, onu da bildirdi ki, bu gün xalq fəxr edir ki, Azərbaycana cənab İlham Əliyev kimi böyük siyasətçi lider rəhbərlik edir: "Xalq şəxsiyyətlər ətrafında birləşir və ona inanır. Ölkəmiz ağır şəraitdə olarkən, Azərbaycanın böyük şəxsiyyəti, ümummilli liderimiz Heydər Əliyevə üz tutdu. Çünki Azərbaycanı düşdüyü bu çətin vəziyyətdən ancaq və ancaq Heydər Əliyev siyasəti qurtara bilərdi. Xalqımızın taleyində həlledici rol oynayan ulu öndər Heydər Əliyev, bütün ömrünü doğma vətənin xoşbəxtliyinə həsr etməklə, Azərbaycana sonsuz məhəbbət bəsləyirdi. İllər, qərinələr keçsə də, ümummilli liderimiz Heydər Əliyevə xalqımızın sevgisi sonsuz olacaq. Nə qədər müstəqil Azərbaycan var, qədirbilən xalqımız var, Heydər Əliyevin də adı, ideyaları və siyasəti yaşayacaqdır. Çünki Heydər Əliyev şəxsiyyəti hələ zaman-zaman öyrənilməmiş bir dünyadır. Bu dahi insanın həyatının, siyasi fəaliyyətinin, vətəni və xalqı qarşısındakı misilsiz xidmətlərinin daha dərindən öyrənilməsinə ciddi ehtiyac vardır və zaman keçdikcə, bu barədə cild-cild kitablar yazılacaqdır."

R.Şabanov qeyd etdi ki, ulu öndər Heydər Əliyev siyasi kursunun layiqli davamçısı Prezident İlham Əliyevin rəhbərliyi ilə bu gün Azərbaycan regionun ən qüdrətli dövlətinə çevrilmişdir. Siyasi sabitlik hökm sürməklə iqtisadiyyatın bütün sahələri dinamik inkişaf edir, dövlətin nüfuzu möhkəmlənir. Natiq daha sonra Heydər Əliyev siyasi kursunun bütün istiqamətlərdə Azərbaycanın dövlət müstəqilliyinin qorunub saxlanması, möhkəmləndirilməsi və inkişaf etdirilməsi prinsipinə söykəndiyini qeyd etdi.

Tədbirin sonunda YAP Tərtər rayon təşkilatının gənclər birliyi ümummilli liderimiz Heydər Əliyevin anadan olmasının 87-ci ildönümü ilə bağlı rayon gəncləri arasında keçirilən futbol və şahmat oyunları, eyni zamanda, məktəblilər arasında inşa yazı müsabiqələrində qalib olanlar mükafatdlandırıldı.

RƏFİQƏ KAMALQIZI

Səs.- 2010.- 6 may.- S. 10.