Ulu öndər Heydər Əliyevin həyatı Azərbaycanın böyük tarixi salnaməsidir

YAP Sabunçu rayon təşkilatında ümummilli liderin 87-ci ildönümünə həsr olunmuş tədbir keçirilib

Dünən Yeni Azərbaycan Partiyasının Sabunçu rayon təşkilatı və Sabunçu rayon icra hakimiyyəti ulu öndər Heydər Əliyevin 87-ci ildönümünə həsr olunmuş tədbir keçirib. Tədbir iştirakçıları, ilk öncə, ulu öndər Heydər Əliyevin məzarını ziyarət edib, abidəsi önünə əklik qoymuşlar. Eyni zamanda, görkəmli oftalmoloq alim, akademik Zərifə Əliyevanın da məzarı tədbir iştirakçıları tərəfindən ziyarət edilib abidəsi önünə tər çiçəklər düzülüb.

YAP Sabunçu rayon təşkilatının qarargahında keçirilən tədbirdə ulu öndər Heydər Əliyevin həyat və fəaliyyətini əks etdirən film nümayiş olunub.

YAP Siyasi Şurasının üzvü, Sabunçu rayon icra hakimiyyətinin başçısı Əlibaba Əliyev tədbirdə giriş sözü ilə açaraq, ulu öndər Heydər Əliyevin Azərbaycan xalqı qarşısındakı misilsiz xidmətlərindən bəhs etdi. Bildirdi ki, ümummilli lider Heydər Əliyev öz mənalı ömürünü Azərbaycan xalqının və Azərbaycan dövlətçiliyinin qorunub saxlanmasına və inkişaf etməsinə həsr edib. Ə.Əliyev hələ sovetlər dönəmində Azərbaycana rəhbərlik etdiyi dövrlərdə də ulu öndərimiz Azərbaycanın bu günü üçün əhəmiyyətli işlər gördüyünü bildirdi. "Ulu öndər Heydər Əliyev hər zaman öz xalqına qarşı olan dərin sevgisini açıq şəkildə nümayiş etdirib. Onun dövlətçiliyimizin ən ağır dönəmlərində ölkə rəhbərliyinə qayıdışı Azərbaycan xalqını işıqlı gələcək naminə ruhlandırmışdır" - deyən Ə.Əliyev bu gün dövlətçiliyimizin qarantı olan ulu öndər Heydər Əliyevin ən layiqli davamçısı möhtərəm Prezident İlham Əliyevin Azərbaycanın ən yüksək səviyyədə inkişaf istiqamətlərini təmin etdiyini bildirib.

YAP Sabunçu rayon təşkilatının sədri Mehriban Abasquliyeva ulu öndər Heydər Əliyevin həyatı və Onun zəngin irsi barəsində tədbir iştirakçılarına ətraflı məlumat verdi. Bildirdi ki, ümummilli lider Heydər Əliyev müstəqil Azərbaycan dövlətinin banisidir: "Tarixin ən böyük vətənpərvəri olan ulu öndər Heydər Əliyev istər sovetlər dönəmində, istərsə də, müstəqillikdən sonra ölkəyə rəhbərlik etdiyi müddətdə daima milli-mənəvi dəyərlərimizi yüksək tutub, onların tərənnümünü həyata keçirib. Sovetlər dönəmində Azərbaycanın hər bir bölgəsində yaranmış olan infrastruktur, yeni-yeni obyektlərin tikilib istifadəyə verilməsi və ən başlıcası, azərbaycanlı gənclərin xarici ölkələrə təhsil almağa göndərilməsi ulu öndər Heydər Əliyevin bu günümüz və gələcəyimiz olan fenomen düşüncəsinin bariz nümunəsidir. Bu gün hər bir Azərbaycan vətəndaşı xalqımızın ümummilli lideri Heydər Əliyevin zəngin irsini mənimsəyir. Çünki Onun bizlərə miras olan zəngin irsi xalqımızın yüz illiklər boyu faydalanacağı bir mənbədir". M.Abasquliyeva ulu öndər Heydər Əliyevin uğurlu siyasətini bu gün böyük əzmlə davam etdirən möhtərəm Prezident İlham Əliyevin Azərbaycanı dünyada lider dövlətə çevirdiyini bildirib.

96 saylı məktəbin direktoru Əminə Hüseynova da çıxışında ulu öndərin Azərbaycan xalqı üçün gördüyü misilsiz xidmətlərindən bəhs etdi. Qeyd etdi ki, tarixdə çox az-az yetişən ulu öndər Heydər Əliyev kimi böyük şəxsiyyətlərin mövcudluğu öz mənsub olduğu millətin xoşbəxtlik simvoludur.

Millət vəkili Eldar Quliyev çıxışında Azərbaycan xalqı üçün əvəzolunmaz xidmətlər göstərmiş dahi bir şəxsiyyətin bu gün aramızda olmamasını böyük itki olduğunu bildirdi. Qeyd etdi ki, ulu öndər Heydər Əliyev dünya miqyasında sayılıb-seçilən və hörmətlə qarşılanan şəxsiyyətlərdən olub. "Onun 1969-cu ildən 2003-cü illərə qədər Azərbaycana rəhbərlik etdiyi dövrlərə nəzər salsaq, görərik ki, həmin dövrlər çox çətin müddətləri əhatə edib deyən E.Quliyev məhz ümummilli liderin dərin zəkası və uzaqgörənliyi nəticəsində Azərbaycan dövlətinin və xalqının bu bəlalardan üzüağ çıxdığını bildirib.

Ümummilli lider Heydər Əliyevin zəngin irsindən Onun görkəmli dövlət xadimi kimi xidmətlərindən bəhs edən millət vəkili Fərrux Zeynalov çıxışında dahi öndər Heydər Əliyevin Azərbaycanın dünəni, bugünü və gələcəyi üçün fenomen bir şəxsiyyət olduğunu bildirib. O, qeyd edib ki, ulu öndərin miras qoyduğu müstəqil Azərbaycan bu gün öz inkişafının ən yüksək pilləsindədir.

Tədbirin sonunda Yeni Azərbaycan Partiyasının sıralarına daxil olan gənclərə üzvlük vəsiqələri təqdim olunub.

Tapdıq Qurbanlı

Səs.- 2010.- 6 may.- S . 11.