Heydər Əliyev Azərbaycan dövlətinin milli fəaliyyət istiqamətini müəyyənləşdirdi

YAP Binəqədi rayon təşkilatında ümummilli liderin 87-ci ildönümü geniş şəkildə qeyd olundu

Dünən YAP Binəqədi rayon təşkilatında partiyanın və rayon icra hakimiyyətinin birgə təşkilatçılığı ilə ulu öndərimiz Heydər Əliyevin 87-ci ildönümü münasibəti ilə tədbir keçirildi. Qeyd edim ki, tədbir başlamazdan öncə, iştirakçılar tərəfindən ümummilli lider Heydər Əliyevin məzarını ziyarət edilərək, əklillər qoyuldu.

Tədbiri giriş sözü ilə açan təşkilatın sədri Nəbi Xəlilov bildirdi ki, təşkilat ulu öndər Heydər Əliyevin ildönümü ilə əlaqədar ilk ərazi rayon təşkilatlarında partiyanın tədbirlər planına uyğun davamlı olaraq silsilə tədbirlər keçirir. Bugünkü tədbirdə millət vəkilləri, ictimai xadimlər, ziyalılar, rayon partiya fəalları iştirak edirlər.

Tədbirdə çıxış edən Dövlət İdarəçilik Akademiyasının kafedra müdiri Fəxrəddin Nağıyev qeyd etdi ki, Heydər Əliyev Azərbaycanın dövlət müstəqilliyinin qorunmasında və möhkəmləndirilməsində titanik fəaliyyət göstərmiş və fundamental uğurlara nail olmuşdur. Ümummilli lider Azərbaycanın rəhbəri olduğu bütün zamanlarda elmin, təhsilin, mədəniyyətin, iqtisadiyyatın, səhiyyənin inkişafına daim diqqət vermiş və heç bir zaman qayğısını əsirgəməmişdir. Ulu öndər bu günlə deyil, sabahla yaşayan, xalqın gələcəyini düşünən şəxsiyyət idi. Heydər Əliyevin zəngin dövlətçilik fəaliyyətinin ayrı-ayrı istiqamətlərini təhlil etdikdə ulu öndərin öz ömrünü, həqiqətən də, xalqına həsr etdiyinin şahidi oluruq.

Heydər Əliyev irsini araşdırdıqca, görərik ki, bu irs bu gün üçün deyil, gələcək nəsillər üçün faydalıdır. Onun irsi bəşər tarixində bir ensiklopediyadır. Sonra natiq Onun daxili və xarici siyasətinə nəzər saldı. O, qeyd etdi, bu gün ümummilli liderin kursunun layiqli davamçısı İlham Əliyevdir.

Tədbirdə çıxış edən YAP Siyasi Şurasının üzvü Vüqar Rəhimzadə bu gün əlamətdar bir gün ərəfəsində olduğumuzu bildirdi. Ulu öndərin 87-ci ildönümü Azərbaycanın bütün regionlarında geniş tərkibdə qeyd olunduğunu diqqətə çatdırdı.O bildirdi ki, çoxəsrlik dövlətçiliyimiz tarixində xüsusi yeri olan Heydər Əliyevin fəaliyyəti öz əhəmiyyəti etibarilə Azərbaycanın hüdudlarından çox-çox kənara çıxır. Beynəlxalq aləmdə cərəyan edən proseslərə təsiri baxımından, həmişə seçilən və qlobal dünyanın ən aktual çağırışlarına cavab verən Azərbaycan rəhbəri zəmanəmizin tanınmış siyasi xadimləri sırasında şərəfli yer tutmuşdur.

V.Rəhimzadə 90-cı illərə qısa ekskurs edərək, ölkənin dilemma qarşısında qaldığını, yalnız Heydər Əliyevin hakimiyyətə qayıdışından sonra xalqın tərəqqi və inkişaf etdiyini bildirdi. Bu gün Azərbaycanın dünya arenasında diqqət mərkəzində olduğunu və dünyaya inteqrasiya etmiş bir dövlət kimi formalaşdığını qeyd etdi. Heydər Əliyev cənabları xalqımıza əsil vətəndaş olmağı aşıladı. Heydər Əliyev, həmçinin, diasporanın formalaşmasında və inkişafında mühüm rol oynadığını diqqətə çəkdi. Dünya dövlətlərinə öz haqq sözünü deməyə öyrətdi. Qısa zaman kəsiyində Azərbaycan uğurlu bir inkişaf yolu keçərək, çox böyük inkişaf edən dövlətlərdən birinə çevrildi. Bu gün onun məqsədyönlü xarici siyasətini layiqli davamçısı İlham Əliyev sədaqətlə həyata keçirir. Bu gün nə qədər Azərbaycan dövləti varsa, Heydər Əliyev siyasəti və Onun ideyaları yaşayacaq.

Tədbirdə çıxış edən Milli Məclisin deputatı Rafael Cəbrayılov ümummilli lider Heydər Əliyevin Azərbaycan xalqı üçün gördüyü böyük işlərdən danışdı. Min illər ötsə belə, Onun xalqımız tərəfindən daim xatırlanacağını bildirdi. Millət vəkili bildirdi ki, Heydər Əliyev hakimiyyətə qayıtdıqdani sonra ikinci dəfə müstəqillik əldə etmiş Azərbaycanın müstəqilliyin qorunmasında və möhkəmlənməsində uğurlu addımlar atdı. Dövlətimizin iqtisadi bazisini qurdu. Ümummilli liderin neft strategiyası, Onun uzaqgörənliyi idi. Qısa bir müddətdə Azərbaycan 50-dən artıq beynəlxalq konvensiyaya qoşuldu. Azərbaycan dövləti özünün milli fəaliyyət istiqamətini müəyyənləşdirdi. Bu şansı Azərbaycan xalqına Heydər Əliyev bəxş etdi. Sonra millət vəkili dünyanın tanınmış siyasi xadimlər ilə Heydər Əliyevi müqasiyəyə çəkərək, Onun siyasi fəaliyyətinə nəzər yetirdi. O bildirdi ki Azərbaycan xalqı Heydər Əliyevlə daim fəxr edib və bundan sonra da fəxr edəcək.

Binəqədi rayon icra hakimiyyətinin başçısı Alı Qocayev Azərbaycan dövlətinin dinamik sürətlə inkişaf etdiyini bildirdi. Ulu öndər Heydər Əliyevin daxili və xarici siyasəti nəticəsində, bu gün xaqımızın firavan həyat tərzi keçirdiyini qeyd etdi. İcra başçısı bildirdi ki, Azərbaycan regionda həm lider dövlət, həm də regional və qlobal iqtisadi layihələrin aparıcı iştirakçılarından biri kimi tanınır. Ulu öndər Heydər Əliyevin siyasətinin layiqli davamçısı Prezident İlham Əliyevin rəhbərliyi altında qazanılan uğurlar davam etməkdədir. Müstəqil Azərbaycan dahi rəhbərin müəyyənləşdirdiyi yolla gedərək, sürətlə inkişaf edir.

Tədbirin sonunda ulu öndərin doğum günündə-mayın 10-da 18 yaşı tamam olacaq. Gənc Heydərçilərə üzvlük vərəqələri və hədiyyələr təqdim olundu və eyni zamanda, rayon üzrə keçirilən "Mən fəxr edirəm ki, Azərbaycanlıyam" inşa müsabiqəsinin qaliblərinə təşkilat tərəfindən diplomlar təqdim olundu.

ZÜMRÜD

Səs.- 2010.- 7 may.- S. 14.