Paytaxtda möhtəşəm Gül bayramı keçirildi

Ulu öndərimiz Heydər Əliyevin 87-ci ildönümü ilə bağlı keçirilən bayram tədbirində on minlərlə insan iştirak etdi

Dünyanın hər yerində, eləcə də, Azərbaycanda xalqımızın ümummilli lideri, dünya şöhrətli siyasi xadim Heydər Əliyevin anadan olmasının 87-ci ildönümü ilə əlaqədar Bakıda, ulu öndərin adını daşıyan sarayın qarşısındakı parkda möhtəşəm Gül bayramı təşkil edilib. Azərbaycan Prezidenti İlham Əliyev və xanımı Mehriban Əliyeva Gül bayramında olublar.

Prezident İlham Əliyev və xanımı ulu öndərin abidəsini ziyarət ediblər, gül-çiçəyə qərq olmuş parkın gözəlliyi ilə tanış olublar. Dövlətimizin başçısı və xanımı ümummilli lider Heydər Əliyevin güllərdən yığılmış portreti önündə xatirə şəkli çəkdiriblər. Prezident İlham Əliyev və ailə üzvləri güllərdən hörülmüş nağıl şəhərciyinə, milli musiqi alətlərimizə - tar, kamança, qaval, saz və qoşa nağaraya maraqla baxdılar. Prezident İlham Əliyev və ailə üzvləri gül-çiçəyə qərq olmuş parkın gözəlliyini seyr ediblər. Müxtəlif çiçəklərdən toxunan "xalça"lar, türk dünyasının böyük oğlu Heydər Əliyevin portreti orijinallığı ilə göz oxşayırdı. Xarici ölkələrdən gətirilmiş və Azərbaycanda yetişdirilmiş cürbəcür çiçək və güllərdən, bitkilərdən, yarpaqlardan hazırlanan rəngarəng kompozisiyalar buraya gələnləri heyran qoyurdu. Təbii çiçəklər və yarpaqlardan düzəldilmiş stendlərdə ulu öndər Heydər Əliyevin təbiətin qoynunda çəkilmiş fotoşəkilləri göz oxşayırdı. Burada Prezident İlham Əliyevin və ailə üzvlərinin müxtəlif illərdə təşkil edilmiş Gül bayramlarında iştirakını əks etdirən və güllərlə bəzədilmiş fotostendlər də maraq doğururdu. Fəvvarələrin ətrafından tutmuş hər tərəf bir-birindən gözəl, bahar təravətli gül-çiçək içində idi. Bir-birini əvəz edən musiqi nömrələri bayram ovqatını daha da yüksəldirdi.

Prezident İlham Əliyev və ailə üzvləri Hollandiya Zambaqlarının Kultivasiyası üzrə Kral Assosiasiyası tərəfindən ümummilli lider Heydər Əliyevin adına yetişdirilmiş və bayram ərəfəsində Bakıya gətirilərək, parkda əkilmiş zanbaqlara maraqla baxdılar. Qeyd olundu ki, paytaxtın müxtəlif park və xiyabanlarını assosiasiya tərəfindən yetişdirilmiş 500 mindən artıq qızılı zanbaq bəzəyir. Gələn il isə onların sayı 2 milyona çatdırılacaqdır.

İngiltərədə hazırlanaraq respublikamıza gətirilmiş və üzərində ulu öndərin portreti, müxtəlif çiçəklər əks olunmuş 3 ədəd 30 metr hündürlüyündə hava şarı da maraqla qarşılandı. Bildirildi ki, hava şarları bu gün axşam havaya buraxılacaqdır.

Gül bayramının təşkilatçısı olan Bakı şəhər İcra Hakimiyyətindən verilən məlumata görə, mayın 10-dan başlayan Gül bayramı 3 gün davam edəcək. Paytaxt sakinlərinin, eləcə də, şəhərimizin qonaqlarının təəssüratlarına əsasən, demək olar ki, Gül bayramı onlarda xoş duyğular, saf əhval-ruhiyyə yaradıb. Gül sağlamlıq, sevgi, məhəbbət deməkdir. Bu məfhumları böyük ehtiramla qəbul edən insanlar bayramın-bayrama qovuşmasından sevinclərini açıq şəkildə nümayiş etdirirlər. Güllərin xoş ətirindən məmnun qalan insanlar tarixin tarixə qovuşması üçün müxtəlif səpkili şəkillər çəkdirməyi də unutmurlar. Həm də bu gözəl, xoş, firavan dövləti onlara bəxş etdiyinə görə, ulu öndərimiz Heydər Əliyevə minnətdarlığını ifadə edirlər.

İ.ƏLİYEV

Səs.- 2010.- 12 may.- S. 6.