MİLLƏTİN LAYİQLİ VƏKİLİ

Noyabrın 7-də keçiriləcək 4-cü çağırış Milli Məclisə seçkilərdə 14 saylı Xəzər II seçki dairəsindən deputatlığa namizəd Mehriban Əliyeva seçkiöncəsi təbliğat-təşviqat kampaniyasını davam etdirir. Ötən həftə Heydər Əliyev Fondunun prezidenti, YUNESKO-nun xoşməramlı səfiri, Azərbaycanın birinci xanımı Mehriban Əliyeva Binə, Türkan, Şüvəlan və Zirə qəsəbələrində seçicilərlə görüşüb söhbət edib, onların qayğıları və problemləri ilə maraqlanıb.

"Bizim əməkdaşlar tez-tez qəsəbəyə gəlir, insanların gündəlik həyatı ilə maraqlanırlar. Əgər kimin köməyə ehtiyacı varsa, o zaman çalışırıq ki, kömək edək".

Binə qəsəbəsində keçirilən görüşdə sakinlər Mehriban xanımın gəlişindən böyük sevinc duyduqlarını bildirərək, dedilər ki, Mehriban xanımın gördüyü bütün işlər hamının gözü qarşısındadır. "Sizin təşəbbüsünüzlə Binədə elə bir mədəniyyət mərkəzi tikilib ki, bəlkə də respublikada analoqu yoxdur. Bu binaya görə bütün sakinlərimiz adından sizə minnətdarlıq edirik"- deyə seçicilər bildirib. Binə sakinləri ilə növbəti görüşdən məmnun olduğunu bildirən Mehriban xanım Əliyeva Xəzər rayonuna, xüsusilə də, Binə qəsəbəsinə mütəmadi olaraq gəldiyini, sakinlərlə görüşdüyünü bildirib. "Bu 5 il ərzində çox uğurlara nail olmuşuq. Ümumiyyətlə, Binə qəsəbəsində 5 məktəb əsaslı təmir olunub. Binə qəsəbəsində 2 bağça, bu yaxınlarda açılışı olacaq mədəniyyət evi, musiqi məktəbi, kitabxana, xəstəxana, poliklinika inşa və bərpa olunub, parklar salınıb. Təbii qaz, elektrik enerjisi, su ilə təminat yaxşılaşıb. Yollar təmir olunur. Mən bilirəm ki, bizim əməkdaşlar çox tez-tez qəsəbəyə gəlirlər, insanların gündəlik həyatı ilə maraqlanırlar. Əgər kimin köməyə ehtiyacı varsa, biz hər zaman çalışırıq ki, bu köməyi edək". Qəsəbə sakinləri Mehriban xanımın Milli Məclisə deputatlığa namizədliyinin yenidən Xəzər rayonundan irəli sürülməsindən çox sevindiklərini bildirdilər. Dedilər ki, biz bundan çox böyük qürur hissi duyuruq və Sizi həmişə dəstəkləyəcəyik.

"Mən bütün işlərimdə sizə arxalanıram, sizin dəstəyinizi hər zaman hiss edirəm və biz bir komanda kimi çoxlu nailiyyətlər qazanmışıq"

Bu sözləri Milli Məclisə deputatlığa namizəd Mehriban xanım Əliyeva Türkan qəsəbə parkında seçicilərlə görüşündə səsləndirib. Yenidən Türkan qəsəbəsində olmaqdan məmnunluğunu bildirən Mehriban xanım Əliyeva deyib: "Siz yəqin xatırlayırsınız ki, 5 il öncə sizinlə görüşəndə qərara aldıq ki, prioritet istiqamət təhsildir. Ötən 5 ildə qəsəbədə bu istiqamətdə xeyli iş görülmüşdür. Məktəblər tikilir, bəziləri yenidən qurulur, onların maddi-texniki bazası gücləndirilir. Məktəblərin hamısında kompyuter, ən yüksək, müasir təhsil üçün bütün zəruri vasitələr olmalıdır, uşaqlarımız yaxşı şəraitdə təhsil almalıdır". Mehriban xanım bütün işlərində seçicilərinə arxalandığını, onların dəstəyini hər zaman hiss etdiyini və onlarla bir komanda kimi çoxlu nailiyyətlər qazanıldığını deyib: "Həm rayona, həm də Türkan qəsəbəsinə baxsaq, burada bir neçə park, mədəniyyət evi, poliklinika, tibbi yardım stansiyası, sanatoriya, məktəblər, bağça, internat məktəbi- bunlar hamısı inkişafdır, abadlıqdır. Əldə edilən bütün uğurlar bizim birgə qələbəmizdir"-deyən Mehriban xanım sakinlərin qayğı və problemləri ilə maraqlandı, istək və arzularını dinlədi və onlara kömək göstərəcəyini dedi. Sakinlər onlara göstərilən qayğıya görə Mehriban xanıma təşəkkürlərini bildirdilər. Qarşıdan gələn seçkilərdə bir nəfər kimi ona səs verəcəklərini bildirdilər.

"Biz birlikdə çalışmalıyıq ki, bütün problemləri qısa zamanda həll edək"Mehriban Əliyevanın seçki dairəsinə daxil olan qəsəbələrdən biri də Şüvəlandır. Heydər Əliyev Fondunun prezidenti tez-tez qəsəbədə olur, sakinlərin arzu və istəkləri, problemləri, görüşlərdə qaldırılan məsələlərin həlli ilə yaxından maraqlanır. Şüvəlan seçiciləri ilə görüşündə Mehriban xanım deyib: "Çox sevindirici haldır ki, ötən 5 il ərzində Xəzər rayonunda 16 yeni məktəb binası tikilmiş və ya təmir olunmuşdur. 4 park, 6 bağça, xəstəxanalar, poliklinikalar, dörd mədəniyyət evi, tibb mərkəzləri, görülmüş abadlıq-quruculuq işlərinin əyani təsdiqidir". Mehriban xanım deyib: "Biz birlikdə çalışmalıyıq ki, bütün problemləri çox qısa bir zamanda həll edək. Əhalinin yaşayış səviyyəsi daha da yaxşı olsun. Yeni iş yerləri, yeni müəssisələr açılsın. Su, qaz, elektrik təminatı daha da yaxşılaşsın. Ümidvaram ki, biz bütün problemləri birlikdə həll edəcəyik". Qəsəbə sakinləri Mehriban xanımın təşəbbüsü ilə qəsəbədə görülən işlərin minlərlə ailəyə sevinc gətirdiyini, sakinlər tərəfindən böyük rəğbətlə qarşılandığını deyiblər.

Namizədin seçicilərlə daha bir görüşü isə, Zirə qəsəbəsində keçirilib. Mehriban xanım burada gördüyü hər şeyin onu çox sevindirdiyini qeyd edərək, deyib ki, Zirə qəsəbəsində çox gözəl, təmiz, geniş küçələr, parklar yaradılıb.Heydər Əliyev Fondunun prezidenti uşaqların keyfiyyətli təhsilə yiyələnmələrinin vacibliyini diqqətə çatdıraraq, bu sahədə işlərin davam etdiriləcəyini söylədi. Bu yaxınlarda Zirədəki Nüsrət Yaqubov adına 120 nömrəli orta məktəbin binasını Heydər Əliyev Fondunun dəstəyi ilə yenidən təmir edəcəyik. Xəzər rayonunda təmirsiz olan 2-3 məktəb də bu yaxınlarda əsaslı təmir olunacaq. Mehriban xanım qəsəbə sakinlərini narahat edən problemlərlə maraqlandı, onların həllinə yardım etməyə çalışacağını bildirdi. Qəsəbə sakinləri Mehriban Əliyevanın fəaliyyətinin yüksək qiymətləndirdiklərini söyləyib, onlara göstərilən diqqət və qayğıya görə sakinlər adından minnətdarlığını bildiriblər. Mehriban Əliyevanı digər namizədlərdən fərqləndirən ən mühüm cəhət odur ki, onun seçicilərlə görüşü yalnız seçkiöncəsi deyil, bütün 5 il ərzində davam edir.

Humanitar missiyanın ləyaqətli daşıyıcısı

Birinci xanımın humanitar fəaliyyəti xalqın ehtiramını qazanıb. Humanizm, mərhəmət, vətənpərvərlik, xeyirxahlıq hisslərinə söykənən fəaliyyətilə cəmiyyətdə böyük nüfuz qazanmış Mehriban xanım Əliyeva "Uşaq evləri və internat məktəblərinin inkişaf proqramı"nın hazırlanıb həyata keçirilməsini məqsədəuyğun hesab edib.50-dək uşaq müəssisəsində aparılan yenidənqurma və tikinti-təmir işləri zamanı onların zəruri avadanlıqla təmin edilməsi, yeni ədəbiyyatla zəngin kitabxanaların yaradılması, informasiya texnologiyalarının tətbiqi, sinif otaqlarının interaktiv təhsil üçün uyğunlaşdırılması təmin edilib.Heydər Əliyev Fondunun səhiyyə sahəsində ən çox əks-səda doğuran layihələrindən biri məhz "Diabetli uşaqlara ən yüksək qayğı" layihəsi olub. Layihə çərçivəsində Azərbaycanda diabet xəstəliyinə düçar olmuş 14 yaşınadək uşaqlar müntəzəm olaraq lazımi miqdarda insulin preparatları və şpris-qələmlərlə təmin ediliblər. 2009-cu il mayın 10-da Talassemiya Diaqnostika Mərkəzi istifadəyə verilib.Heydər Əliyev Fondunun təşəbbüsü ilə həyata keçirilən "Yeniləşən Azərbaycana yeni məktəb" proqramı tədris prosesinin günün tələbləri səviyyəsində qurulmasına imkan verən müasir məktəb binalarının inşasına istiqamətlənib. "Yeniləşən Azərbaycana yeni məktəb" layihəsi çərçivəsində 2005-2010-ci illərdə 200-dək məktəb binası inşa olunaraq lazımi avadanlıqla təchiz edilib. Proqram çərçivəsində tikilən məktəblər müasir avadanlıq, istilik sistemi, zəngin kitabxanalar, əyani vəsait və kompyuter avadanlığı ilə təchiz olunub.

Dövlətlər iqtisadiyyatı, millətlər mədəniyyəti ilə tanınır

Azərbaycan mədəniyyəti Mehriban xanımın şəxsində özünə etibarlı hami tapıb. Ötən 5 ildə Azərbaycanın görkəmli alimlərinin, yazıçı və bəstəkarlarının yubileylərinin keçirilməsi, "Kitabi-Dədə Qorqud" dastanının 1300 illiyinin beynəlxalq miqyasda qeyd olunması, YUNESKO-nun "Dünya irs siyahısı"na İçərişəhərin Şirvanşahlar Saray Kompleksinin, Qobustan Qoruq Muzeyinin və Atəşgahın da daxil edilməsi Azərbaycanın birinci xanımının milli mədəniyyətin dünya miqyasında təbliği sahəsindəki fəaliyyətinin bir istiqamətidir. Mehriban xanım Əliyevanın birbaşa himayəsi ilə son illər Azərbaycanda muğam sənətinin qorunması, inkişafı və təbliği sahəsində böyük işlər görülür. Azərbaycan muğamının YUNESKO-nun bəşəriyyətin qeyri-maddi irsinin şah əsərləri siyahısına daxil olunması bilavasitə bu fəaliyyətin nəticəsidir. Fondun milli mədəniyyətin təbliği sahəsində həyata keçirdiyi ən uğurlu layihələrdən biri də "Qarabağ xanəndələri" albomunun hazırlanması olub. YUNESKO xətti ilə hazırlanmış alboma "Qarabağ xanəndələri" adının seçilməsi ilə bütün dünyaya Qarabağın əzəli və əbədi Azərbaycan torpağı, muğamın isə ən nadir nümunələrinin bu torpağa məxsus olduğu nümayiş etdirilib. 2009-cu ilin mart ayında Azərbaycanın birinci xanımının təşəbbüsü ilə keçirilən Beynəlxalq Muğam Festivalı Azərbaycan mədəniyyətinin, musiqisinin bütün dünyada tanıdılması və təbliği istiqamətində mühüm tədbirlərdən biri kimi yadda qalıb. Heydər Əliyev Fondunun dəstəyi ilə hər il avqustda Qəbələdə Beynəlxalq Musiqi Festivalı və pianoçuların müsabiqəsi keçirilir. Festival çərçivəsində gənc pianoçuların beynəlxalq müsabiqəsi, klassik musiqi axşamları, muğam konserti təşkil edilir. Fondun müxtəlif layihələrini birləşdirən ortaq nöqtə isə məhz milli genefondun qorunmasıdır. Bu ali mərama xidmət edən hər bir addım Mehriban xanım üçün eyni səviyyədə prioritet mahiyyət daşıyır.

Öz dövrünün böyük ictimai xadimi, görkəmli şəxsiyyəti adını hər əsrdə yalnız bir neçə qadın qazana bilir. Yalnız dünya miqyasında tanınmış, böyük ictimai fəaliyyətdə bulunmuş, humanist ideyaları həyata keçirmək üçün çalışmış qadınlar bu ada layiq görülürlər. Bütün bu işlərin arxasında isə, müqəddəs ideallar, gərgin zəhmət, güclü zəka və böyük şəxsiyyət dayanır. Belə xüsusiyyələri özündə daşıyan insanlardan biri də Mehriban xanım Əliyevadır. O xanım ki, millətin vəkili missiyasını şərəflə və vicdanla yerinə yetirir.

Elçin Bayramlı

Səs.- 2010.- 3 noyabr.- S .3-4.