Böyük, inamlı, parlaq qələbə

Yeni Azərbaycan Partiyası 7 noyabr parlament seçkilərinin qalibidir

7 noyabr 2010-cu il tarixində keçirilən növbəti parlament seçkiləri Azərbaycanda ictimai-siyasi fəallığın kifayət qədər yüksək olduğunu təsdiqləyir. Bu mənada, Azərbaycan parlamentinə - Milli Məclisə dördüncü çağırış seçkilərin nəticələri ölkəmizdə mövcud şəffaf, demokratik, ədalətli seçkilər ənənəsinin getdikcə daha da dərinləşib möhkəmləndiyini göstərir. Bu, heç də təsadüfi deyil. Bütün sivil, demokratik, dünyəvi ölkələrdə olduğu kimi, Azərbaycanda da seçki prosesinə hər zaman böyük ictimai maraq göstərilir.

7 noyabr parlament seçkiləri ilə bağlı təbliğat-təşviqat kampaniyasının gedişində Milli Məclisin qanunvericilik fəaliyyətinə aktiv münasibət bildirilməsi, millət vəkili seçilməyə iddialı namizədlərin ictimai-siyasi fəaliyyətinin ciddi təhlil olunması, qiymətləndirilməsi, prinsipcə, arzuolunan, təqdirəlayiq haldır. Məhz bunun nəticəsidir ki, seçicilər parlament seçkilərində çox fəal iştirak ediblər. Belə ki, bu seçkilərdə seçicilərin yarıdan çoxu - 50,14 faizi səsverməyə qatılıb, azad, sərbəst şəkildə Milli Məclis deputatlığına layiq bildiyi namizədlərə səs verib. Bütün bunlar, ölkəmizin tərəqqisi, inkişafı, Azərbaycanda parlamentarizm ənənəsinin, qanunvericilik sistemi və bazanın daha da təkmilləşməsi baxımından, olduqca böyük əhəmiyyət kəsb edir.

Yeni Azərbaycan Partiyası layiqli qələbə qazanıb

İstənilən seçkidə ictimai-siyasi qüvvələrin, siyasi partiyaların fəallaşması, seçki prosesində bu və ya digər dərəcədə uğur qazanmağa səy göstərməsi tam təbii və gözləniləndir. Bu zaman sağlam siyasi rəqabətin aparılması, seçki qanunvericiliyinin tələblərinə riayət edilməsi olduqca mühüm əhəmiyyət kəsb edir. Lakin təəssüf ki, radikal müxalifətin təmsilçiləri, ötən seçkilərdə olduğu kimi, bu dəfə də "ənənə"lərinə sadiq qalıblar. Onlar seçki kampaniyası başladığı andan indiyədək seçki prosesinin gedişini, eləcə də, səsvermənin nəticələrini uğursuz şəkildə şübhə altına almağa səy göstərirlər. Bu, bir daha onu göstərir ki, seçkilərdə acınacaqlı məğlubiyyətə düçar olan radikal düşərgə həmişəki kimi ləyaqətlə uduzmağı - öz məğlubiyyətini həzm etməyi bacarmır. Odur ki, radikallar bu parlament seçkilərində də seçki kampaniyasına kölgə salmağa, ciddi təşviqat aparmaq əvəzinə, təxribat xarakterli fikirlər səsləndirməklə məşğul olublar. Onlar bununla bağlı, başladıqları "qara piar" kampaniyasını daha iyrənc formada davam etdirirlər. Radikallar bu mübarizədə bütün əxlaqi meyarları, ədəb-ərkan qaydalarını pozaraq, rəqiblərinə qarşı aşkar şəkildə qərəzli mövqe tuturlar. Bu isə son nəticədə əks-bumeranq effekti ilə onların özünə qarşı yönəlib. Bəlli olduğu kimi, radikal düşərgənin əsas təmsilçisi sayılan "AXCP (i)-Müsavat" bloku bu böyük məğlubiyyətə uğrayıb. Bu blokun namizədlərindən heç biri seçkilərdə həlledici səs çoxluğu qazana bilməyib.

Aydındır ki, müxalifət partiyalarını nə ayrılıqda, nə də birlikdə hər hansı formada növbəti dəfə parlament seçkilərinin favoritinə çevrilən Yeni Azərbaycan Partiyası ilə müqayisə etmək mümkün deyil. Populyarlığına, reytinqinə, cəmiyyətdə aparıcı mövqe tutmasına, üzvlərinin sayına, ideya-siyasi xəttinə görə, hər zaman öndə gedən bu partiyanın siyasi qüvvə kimi ölkədə real, ciddi alternativi yoxdur. Ümummilli Lider Heydər Əliyevin qurucusu olduğu Yeni Azərbaycan Partiyası indiyədək iştirak etdiyi bütün seçkilərdə - prezident, parlament, bələdiyyə seçkilərində birmənalı şəkildə, böyük səs çoxluğu ilə layiqli qələbə qazanıb. Odur ki, 7 noyabr seçkilərində qazanılan növbəti möhtəşəm qələbə, məntiqi qanunauyğunluq kimi, Yeni Azərbaycan Partiyasının ardıcıl qələbələr seriyasını tamamlayır. Bu seçkilərdə partiyanın növbəti böyük, inamlı qələbəsi xalqın böyük dəstəyi, seçicilərin mütləq əksəriyyətinin məhz Yeni Azərbaycan Partiyasının namizədlərinə səs verməsi sayəsində əldə edilib. Partiyanın inamlı qələbə qazanmasında Yeni Azərbaycan Partiyası namizədlərinin uğurla həyata keçirilən təbliğat-təşviqat kampaniyası, seçicilərlə qurulan fəal, səmimi ünsiyyət də mühüm rol oynayıb. Seçkilərə "Güclü dövlət, yüksək rifah" şüarı ilə qatılan YAP ölkənin aparıcı siyasi təşkilatı kimi, Azərbaycanı tərəqqiyə, rifaha aparan alternativsiz ictimai-siyasi qüvvə olduğunu qazandığı inamlı qələbə ilə təsdiqləyib.

Radikal düşərgənin perspektivi yoxdur

Yuxarıda qeyd edilən məqamlardan aydın görünür ki, Yeni Azərbaycan Partiyasının 7 noyabr 2010-cu il parlament seçkilərində parlaq qələbələri heç də təsadüf nəticəsində əldə edilməyib. Bu nailiyyətlər partiyanın ictimai-siyasi fəaliyyətdə yenilik, innovasiya xarakterli pozitiv meyarlara söykənməsinin, bütün sosial təbəqələrinin maraqlarını dolğun şəkildə ifadə etməsinin nəticəsidir. Müxalifət daxilində çəkişmə, deqradasiya, aşınma gedəndə, radikal düşərgə siyasi manipulyasiyalarla, spekulyasiyalarla, populist çıxışlarla siyasi səhnədə aranı qarışdırmaq istəyəndə, YAP cəmiyyətdə sosial dayaqlarını bir qədər də möhkəmləndirməklə, nüfuzunu, reytiniqini, populyarlığını əməli fəaliyyəti ilə daha da artırmaqla məşğul idi. Məhz bütün bunların nəticəsidir ki, bu gün partiya parlament seçkilərində xalqın böyük, ciddi dəstəyini qazanıb. Seçki kampaniyası başlayan andan siyasi qüvvə kimi, liderliyini, rəqiblərindən müqayisəyəgəlməz üstünlüyünü hər addımda təsdiqləyən Yeni Azərbaycan Partiyası istər imzatoplama, istər təbliğat-təşviqat kampaniyasını böyük müvəffəqiyyətlə başa vurub, 2 milyondan artıq tərəfdarını səsverməyə cəlb edə bilib. Bu, son nəticədə, partiyanın parlament seçkilərində seçicilərin mütləq əksəriyyətinin səsini qazanmasına səbəb olub.

Yeni Azərbaycan Partiyasının 7 noyabr seçkilərində qazandığı inamlı qələbəni şərtləndirən amillərdən biri də partiyanın seçki təcrübəsinin getdikcə daha da təkmilləşməsidir. Belə ki, YAP hələ bu ilin əvvəlində özünün seçki proqramını qəbul edərək, seçki kampaniyası dövründə həyata keçiriləcək bir sıra məsələləri əvvəlcədən müəyyənləşdirmişdi.

Mütləq qələbə ilə nəticələnən uğurlu seçki strategiyası

Bütün bunlarla yanaşı, hakim Yeni Azərbaycan Partiyası ötən seçki başa çatan kimi, növbəti parlament seçkilərinə hazırlaşmağa başlamışdı. Seçkilərə və seçicilərə münasibətdə göstərilən bu həssaslıq nəticə etibarı ilə, bu gün partiyanı yenidən Milli Məclisə dördüncü çağırış seçkilərin qalibinə çevirib. Hər bir seçkini çox əhəmiyyətli hesab edən Yeni Azərbaycan Partiyası malik olduğu yüksək potensiala, siyasi gücünə baxmayaraq, bu seçkilərə böyük səylə, xüsusi diqqətlə hazırlaşmışdı. Bu mənada, YAP parlament seçkilərinə qatılarkən hər bir rəqibini, onun potensialını, siyasi hazırlığını, intellektual potensialını, mübarizə taktikasını və strategiyasını hərtərəfli qiymətləndirmiş və nəzərə almışdı. Başqa sözlə, partiyanın seçki strategiyasında bütün zəruri məqamlar ciddi şəkildə nəzərə alınıb, parlament seçkilərində mümkün fəaliyyət taktikası bütün vacib parametrlər, siyasi reallıqlar nəzərə alınmaqla müəyyənləşdirilib və həyata keçirilib.

Bütün parametrlərə görə, Azərbaycanda alternativsiz siyasi qüvvəyə çevrilən Yeni Azərbaycan Partiyası seçki təbliğatına hər zaman çox ciddi yanaşır, seçicilərlə fəal iş aparır, geniş ictimaiyyətin maraqlarının müdafiəsinə yönəlmiş çoxsaylı mütərəqqi sosial-siyasi təşəbbüslərlə çıxış edir. Yeni Azərbaycan Partiyası dövlətin, cəmiyyətin, geniş ictimaiyyətin, eləcə də, əhalinin bütün təbəqələrinin maraqlarını tam nəzərə alır. Hazırda YAP Azərbaycanın siyasi səhnəsində kifayət qədər yekcins, monolit, alternativsiz siyasi qüvvə sayılır. Parlament seçkilərinin nəticəsi radikal düşərgənin Yeni Azərbaycan Partiyasına bütün əlamətlərə görə uduzduğunu, YAP-la ciddi rəqabət aparmaq iqtidarında olmadığını bir daha təsdiqləyir.

Belə şəraitdə siyasi cəhətdən yetkin, ideoloji baxımdan təkmil, intellektual baxımından hazırlıqlı, mütəşəkkillik baxımından təkmil, monolitlik baxımından möhkəm və vahid lider ətrafında birləşmiş güclü siyasi təşkilat - Yeni Azərbaycan Partiyasının seçkidə böyük, uğurlu, inamlı qələbəsi zərurətdən doğan təbii nəticə kimi özünü göstərir. Belə vəziyyətdə radikalların qara piara əl atması ümidsizliyin və zəifliyin göstəricisi kimi meydana çıxır.

Yeni Azərbaycan Partiyasının bu seçkidə yeni texnologiyalara üstünlük verməsi və seçki taktikasında bir çox yeniliklər etməsi radikal düşərgə üçün gözlənilməz olub. Odur ki, müasir seçki texnologiyalarına istinad edən Yeni Azərbaycan Partiyasının mükəmməl seçki strategiyası partiyanın yüksək qələbəsini təmin etməklə yanaşı, radikal müxalifəti əsil sürprizlərlə üz-üzə qoyub.

Naib NİFTƏLİYEV

Səs.- 2010.- 11 noyabr.- S. 9.