Dünən Beynəlxalq Ahıllar Günü idi

Ahıllar dövlət qayğısı ilə əhatə olunur

Hər il oktyabrın 1-i ölkəmizdə Beynəlxalq Ahıllar Günü kimi qeyd edilir. Dövlət Sosial Müdafiə Fondunun "Səs"ə verdiyi məlumatında bildirilir ki, hazırda Azərbaycanda 70 yaşından yuxarı 365467 nəfər əmək pensiyası alır. Onu da qeyd edək ki, "Ahıllara sosial xidmət haqqında" Qanuna əsasən, 70 yaşına çatmış Azərbaycan vətəndaşları, eləcə də, ölkədə daimi yaşayan əcnəbilər ahıl hesab edilir.

Dövlət Sosial Müdafiə Fondunun verdiyi məlumata görə, digər pensiyaçılar kimi ahıllar da təqaüdlərini plastik kartlarla ala bilirlər. "2009-2015-ci illərdə Azərbaycan Respublikasında sığorta-pensiya sistminin inkişafına dair Dövlət Proqramı"na uyğun olaraq ahılların pensiya ilə təminatı təkmilləşdiriləcək.

Milli Məclisin Sosial Siyasət Daimi Komitəsinin sədri Hadi Rəcəbli BMT-nin Baş Məclisinin 1992-ci ildə ahılların müdafiəsi ilə bağlı qətnamənin qəbul edildiyini dedi. Qeyd etdi ki, həmin qətnamənin prinsiplərinə uyğun olaraq, hər il oktyabr ayının 1-i Beynəlxalq Ahıllar Günü kimi qeyd edilmiş, həmçinin, 1999-cu il Beynəlxalq Ahıllar ili elan olunmuşdur: "Bu məsələyə respublikamızda da ciddi diqqət yetirilir. 2001-ci il iyunun 22-də "Ahıllara sosial xidmət haqqında" Azərbaycan Respublikasının Qanunu qəbul edilmişdir. Qanuna əsasən, ölkədə 70 yaşına çatmış Azərbaycan Respublikası vətəndaşları, habelə, Azərbaycan Respublikasında daimi yaşayan əcnəbi və vətəndaşlığı olmayan şəxslər ahıl sayılır. 1993-cü ildən başlayaraq, hər il oktyabr ayının 1-i respublikamızda "Beynəlxalq Ahıllar Günü" kimi qeyd olunur. Həmin günün keçirilməsində məqsəd ahıl vətəndaşların sosial problemləri ilə tanış olmaq, ehtiyaclarını müəyyənləşdirərək imkanlı müəssisələr, təşkilatlar və qeyri-hökumət təşkilatları ilə birlikdə əməli tədbirlər görməkdən ibarətdir. Beynəlxalq Ahıllar Günü ərəfəsində, bütün dünyada olduğu kimi, respublikamızın şəhər və rayonlarında icra hakimiyyətləri, əmək kollektivləri, ictimai təşkilatlar və qeyri-hökumət təşkilatları rayon ərazisində yaşayan ahıl vətəndaşların ehtiyaclarını öyrənərək, onlar üçün bayram süfrələri, ərzaq bağlamaları təşkil edir, müxtəlif xeyriyyə, şəfqət və mədəni-kütləvi tədbirlər həyata keçirirlər. Həmin tədbirlərdə respublika üzrə 10 minlərlə ahıl və əlil vətəndaş bayram süfrələrinə dəvət olunur, onlara ərzaq paylanır, maddi yardım göstərilir".

H.Rəcəbli ölkədə ahılların sosial vəziyyətinin yaxşılaşdırılmasıyla bağlı hər il təqaüdlərin artırıldığını da vurğuladı. Millət vəkilinin sözlərinə görə, əvvəlki illərdə olduğu kimi, 2011-cu ilin dövlət büdcəsi də sosialyönümlü olacaq. Amma komitə sədri təqaüdlərin nə qədər artırılacağı ilə bağlı bir söz deməyib.

H.Rəcəbli onu da bildirib ki, bu gün ölkəmiz uğurlu iqtisadi inkişaf yolundadır. Bu baxımdan da istər gənclər, orta nəslin nümayəndələri, istərsə də ahıllar cəmiyyətdə gedən inkişaf proseslərində iştirak etməlidirlər. Yaşlıların həyat təcrübəsindən, bilik və bacarıqlarından bəhrələnmək isə nəsillər arasında körpü yaratmaq, varislik əlaqəsini bərpa etmək baxımından çox zəruridir.

Komitə sədri Dünya Səhiyyə Təşkilatının verdiyi məlumata görə, keçən il dünyada 60-dan yuxarı yaşı olanların sayı 650 milyon idisə, 2025-ci ilə kimi bu rəqəmin iki dəfə artacağını bildirilir.

Millət vəkili ölkəmizdə də də ahıllara diqqət və qayğının göstərildiyini bildirdi. Qeyd etdi ki, bu gün adı-sanı, nəcib əməlləri ilə tanınan, bəlkə də heç tanınmayan, lakin ləyaqətlə yaşayan, həyat təcrübəsi ilə yeni nəsillərə nümunə olan ahıllar, həqiqətən, hörmətə layiqdirlər. İnsanın qocalıq dövründə heç nəyə qadir olmadığını söyləmək səhv olardı. Lap qədim zamanlardan ağsaqqal, ahıl insanlar ən hörmətli, müdrik adamlar hesab olunurlar. Onlara cavanlar da, böyüklər də hörmətlə yanaşır, fikirləri ilə hesablaşırlar. Qocaların sərvəti onların həyat təcrübəsidir. Onlara qulaq asıb, dediklərinə əməl etməklə bu sərvətə sahib olmaq mümkündür.

RƏFİQƏ KAMALQIZI

Səs.- 2010.- 2 oktyabr.- S. 10.