Azərbaycanda azad və ədalətli seçkilərin keçirilməsi üçün münbit şərait mövcuddur

"Səs" qəzeti "Parlament seçkiləri: reallıqlar və perspektivlər" mövzusunda növbəti dəyirmi masa keçirdi

(Əvvəli ötən saylarımızda)

Ənənəvi olaraq, "SƏS" qəzetinin redaksiyasında keçirilən və ölkəmizin ictimai-siyasi həyatında mühüm prosesləri əhatə edən dəyirmi masalar böyük ictimai marağa səbəb olmuşdur. Bu dəyirmi masalarda ictimai müzakirəyə çıxarılan məsələlər və bunun ətrafında aparılan diskussiyalarda iştirak edən Azərbaycan cəmiyyətinin müxtəlif təbəqələrini təmsil edən şəxslər prosesləri daha aydın və başadüşülən formada geniş oxucu auditoriyasına çatdırılmasını təmin etmişlər. Artıq üç ilə yaxındır ki, qəzetin redaksiyasında keçirilən dəyirmi masalarda hökumət və dövlət nümayəndələri, millət vəkilləri, cəmiyyətin ayrı-ayrı təbəqələrini təmsil edən şəxslər müzakirəyə çıxarılan məsələlər ətrafında geniş müzakirələr qurmuşlar. Budəfəki dəyirmi masanın mövzusu da "Parlament seçkiləri: reallıqlar və perspektivlər" mövzusu ətrafında təşkil edilmişdi.

Dəyirmi masada Yeni Azərbaycan Partiyasının Siyasi Şurasının üzvü, millət vəkili Musa Quliyev, "Səs" qəzetinin baş redaktoru Bəhruz Quliyev, "Yeni Azərbaycan" qəzetinin baş redaktoru Hikmət Babaoğlu, Böyük Quruluş Partiyasının sədri, millət vəkili Fazil Mustafa, "Bakı Xəbər" qəzetinin baş redaktoru Aydın Quliyev, Açıq Cəmiyyət İnstitutu Yardım Fondunun ("Soros" fondu) idarə heyətinin sədri Mehman Əliyev, Azərbaycan Demokrat Partiyasının sədri Sərdar Cəlaloğlu, "AVCİYA" seçki qərargahının rəhbəri Sadiq Rzayev, ATƏT-in Bakı ofisinin nümayəndəsi Elgün Tağıyev, SİA-nın icraçı direktoru Vəli Vəliyev iştirak edirdi.

Dəyirmi masada giriş sözü ilə çıxış edən "Səs" qəzetinin baş redaktoru Bəhruz Quliyev ənənəvi olaraq keçirilən bu cür dəyirmi masaların cəmiyyət tərəfindən böyük maraqla qarşılandığını bildirdi. Qeyd etdi ki, ölkəmizin ictimai-siyasi həyatında baş verən ən mühüm və aktual məsələlərlə bağlı "Səs" qəzetinin redaksiyasında artıq üç ilə yaxındır ki, ictimaiyyət nümayəndələrinin, dövlət və hökumət rəsmilərinin, ayrı-ayrı vətəndaş cəmiyyətlərini təmsil edən şəxslərin bu dəyirmi masalarda müzakirə olunan mövzulara münasibətləri geniş oxucu auditoriyasına təqdim edilib. "Bugünkü dəyirmi masanın məhz ölkəmizin həyatında mühüm əhəmiyyət kəsb edən parlament seçkilərinə həsr olunması cəmiyyətin bu prosesə olan diqqətinin daha da gücləndirilməsinə xidmət göstərir" deyən baş redaktor burada müzakirə olunacaq məsələlərin daha effektli bir nəticəyə nail olmaq üçün önəmindən bəhs etdi. B.Quliyev istənilən bir prosesin cəmiyyət və ölkə həyatında əhəmiyyətinin olduqca böyük olduğunu, bu istiqamətdə müxtəlif fikirlərin, illüziyaların da ortaya çıxmasının təbii qarşılandığını qeyd etdi. Hər bir sahədə olduğu kimi, siyasi proseslərdə də yüksəlişin əldə olunduğunu qeyd edən baş redaktor Azərbaycanın özünəməxsus inkişaf tendensiyasının kökündə dayanan amillərdən də bəhs etdi. Bildirdi ki, bu gün cəmiyyətimiz onu əhatə edən istənilən prosesə heç bir halda biganə yanaşmır. "Payızda keçiriləcək parlament seçkilərinə hazırlıqla bağlı və ümumiyyətlə, bu proses haqqında bilgi əldə etmək istiqamətində cəmiyyətimizin aktivliyi nəzərəçarpacaq səviyyədədir. Bu isə ölkəmizdə azad və ədalətli formada keçirilən seçki prosesinə vətəndaşın inamından qaynaqlanır. Çünki artıq hər bir Azərbaycan vətəndaşı öz seçimini daha düzgün və düşünülmüş istiqamət xətti üzrə qura bilir. "Ona görə də, bu gün ölkə həyatında baş verən hər bir hadisəyə daha obyektiv və lazımi qiymət verilir" deyən B.Quliyev burada da cəmiyyət üçün və ümumiyyətlə, ölkəmizin ictimai-siyasi mənzərəsini özündə əks etdirən proseslərin müzakirəsi baxımından maraqlı müzakirələrin aparılacağına inamını ifadə etdi. B.Quliyev dəyirmi masa iştirakçılarının diqqətinə "Parlament seçkiləri: reallıqlar və perspektivlər" mövzusu ətrafında qarşılıqlı müzakirələr aparıb, münasibətlərin bildirilməsinin vacibliyini bildirdi.

AZƏRBAYCANDA SEÇKİLƏRİN KEÇİRİLMƏSİ ÜÇÜN DEMOKRATİK ŞƏRAİT VAR

Aydın Quliyev:

- Qeyd etmək lazımdır ki, demokratik seçki mühitinin formalaşmasında mətbuatın rolu böyükdür. Bu baxımdan da, bütün seçkilərdə olduğu kimi, noyabrın 7-də keçiriləcək parlament seçkilərində də mətbuat çalışır ki, həm Mərkəzi Seçki Komissiyasının qərarlarını dərc etsin, həm də digər ayrı-ayrı namizədlərin təbliğatını qursun. Sözsüz ki, bu da müqavilə əsasında olmalıdır. Ona görə də, hesab edirəm ki, təkcə parlament seçkilərində yox, ümumiyyətlə, bütün seçkilərdə mətbuatın rolu artır. Bu rolun artması da aydın surətdə göstərir ki, mətbuat və qəzetlər təbliğat vasitəsidir. Ümumiyyətlə, bütün seçkilər ərəfəsi medianın canlanma dövrü hesab olunur. Hesab edirəm ki, Azərbaycan mediasında parlament seçkilərinin işıqlandırılmasına kifayət qədər yer ayrılıbdır. Bildiyiniz kimi, oktyabr ayının 15-dən təbliğata start verilir. Yəni, bu təbliğata start veriləndən sonra həm qəzetlərin tirajlarının qalxması, həm də oxucu auditoriyasının genişlənməsi gözləniləndir. O baxımdan ki, artıq seçki prosesinə qatılan namizədlər bu dövrdə birbaşa öz təbliğatları ilə məşğul olur. Hesab edirəm ki, Azərbaycanda mətbuatın seçki praktikası mövcuddur, namizədlərin təbliğat aparması üçün seçim imkanları genişdir.

Ümumiyyətlə, qeyd etmək lazımdır ki, bu gün Azərbaycanda seçkilərin keçirilməsi üçün demokratik şərait var. Bunu heç kəs dana bilməz.

"Səs" qəzetinin müxbiri:

- Bu seçkiləri də digər yerli və xarici təşkilatlarla yanaşı "AVCİYA" da yaxından izləyir və müşahidələr aparır. Bilmək istərdik ki, hazırkı mərhələdə "AVCİYA" seçici əhval-ruhiyyəsini və seçki hazırlığını necə qiymətləndirir?

SEÇKİLƏRİ MÜŞAHİDƏ ETMƏK İSTƏYƏNLƏR ARASINDA GƏNCLƏRİMİZ ÇOXLUQ TƏŞKİL EDİRLƏR

Sadiq Rzayev:

- Bildiyiniz kimi, "AVCİYA" bir neçə seçkidə böyük fəaliyyət göstərməklə, artıq böyük təcrübə əldə etmişdir. Seçki təcrübəsinə malik olan təşkilatımız bu seçkilərdə də öz işini davam etdirəcək. Xüsusilə də, seçki məntəqələrində və Dairə Seçki Komissiyalarında seçkini müşahidə etməklə məşğul olacaq. Qeyd edim ki, respublikamızın bütün regionlarında olan seçki məntəqələrində müşahidələr aparacağıq. Bakı şəhərində vətəndaş fəallığı yüksək olduğu bütün məntəqələrdə nümayəndələrimiz olacaq. Bir məsələyə də aydınlıq gətirim ki, seçkiləri müşahidə etmək istəyənlər arasında gənclərimiz çoxluq təşkil edirlər. Hal-hazırda 400 nəfərdən çox müşahidəçi qeydə alınıb. Artıq seçki prosesinin birinci mərhələsi başa çatmaq üzrədir. Qaldı ki, bizim müşahidələrimizin nəticəsinə, bu seçki bitdikdən sonra bəlli olacaq.

"Səs" qəzetinin müxbiri:

- Müxalifət partiyalarının seçkilərə münasibətdə mövqeləri üst-üstə düşmür. Bunu partiya funksionerlərinin müstəqil olmaması ilə əlaqələndirmək olar?

BİR-İKİ MÜXALİFƏTÇİNİN NARAZILIĞI HEÇ DƏ ÜMUMİ FİKRİ İFADƏ ETMİR

Fazil Mustafa:

- Ümumiyyətlə, qeyd etmək lazımdır ki, hakim iqtidar partiya vahid bir komanda ilə, müxalifət isə müstəqil halda çıxış edir. Lakin bu gün bir-iki müxalifətçinin nədənsə narazı olması heç də ümumi fikri ifadə etmir. Görünür, özlərini müxalifətçi adlandıranlar müxalifətçiliyin mənasını nə dərk edir, nə də anlayırlar. Müxalifətçilik bir fikir, bir dünyagörüşdür və bu dünyagörüş ayrı-ayrı taktiki addımlarla müşahidə oluna bilər. Ancaq bundan hansısa məqsədlər naminə istifadə etmək olmaz. Müxalifətçiliklə fəxr etmək olmaz. Müxalifətçiliyin əsas məqsədi sivil yolla hakimiyyətə gəlməkdir. Hakimiyyətə gəlmək üçün də düzgün ağılla və saf başla hərəkət etmək lazımdır. Bugünkü müxalifətçilər hansı əməlləri ilə fəxr edir? 20-30 il müxalifətdə olmaqları ilə? Sivil yolla hakimiyyətə gəlməyin özü həmin ölkədə müstəqilliyin olması deyilmi? Bizim müxalifət elə zənn edir ki, dövlətin bütün strukturları yerlərini tərk etməli və deməlidirlər ki, gəlin oturun bizim yerimizdə. Bu, nə qədər gülünc düşüncədir. Ona görə də, istərdim ki, Azərbaycan müxalifəti mövcud imkanlarına daha keyfiyyətli və məntiqli yanaşmalıdır ki, cəmiyyətdəki narazılıqlar rəğbətlə əvəzlənsin. Bunu həyata keçirə bilmədikləri üçün hər şeyi iqtidarın üzərinə atmaq və ağızdolusu "demokratiya boğulur" demək, ancaq böhtan və yanlışdan başqa bir şey deyildir. Çünki 20-30 il müxalifətdə olmaqları ilə fəxr edən müxalifətçilərin seçdiyi yol onlara heç vaxt uğur gətirməyəcək.

MÜXALİFƏTİN TƏFƏKKÜRÜ FORMALAŞMALIDIR

Hikmət Babaoğlu:

- Bu gün cəmiyyətdə siyasi inkişaf olmalıdır. Niyə müxalifət cəmiyyətdə baş verən dinamik prosesləri dərk etmək və öz siyasi təfəkkürlərində bir dəyişiklik etmək istəmir? Çünki bugünkü müxalifət o müxalifətdir ki, o zaman təsadüf nəticəsində inqilabi yolla hakimiyyətə gəldilər və bu gün də həmin düşüncə ilə, elə zənn edirlər ki, yenə də nəyəsə nail ola bilərlər. Ancaq bu həqiqəti anlamırlar ki, nə dövran o dövrandır, nə hakimiyyət o hakimiyyətdir, nə də xalqın düşüncəsi o düşüncədir. Ona görə də, bu gün müxalifətin təfəkkürü formalaşmalıdır. Bu gün həmin müxalifətin içərisində müasir siyasi prosesləri, müasir dünyagörüşü və demokratiyanı mənimsəməyi bacaran bir qrup müxalifətçi yavaş-yavaş bunların ətrafından çəkildilər. Lakin əvvəlki inqilabi düşüncənin buxovundan xilas ola bilməyənlər bu gün də istəklərini həyata keçirmək üçün inqilab yolunu çıxış yolu hesab edirlər.

AZƏRBAYCAN DÜNYANIN ƏN SÜRƏTLİ İNKİŞAF EDƏN ÖLKƏLƏRİ SIRASINDADIR

Musa Quliyev:

- Bugünkü düşüncəyə malik olan müxalifətin düşüncəsinin dəyişməsi mümkünsüzdür. Çünki onlar yaxşı bilirlər ki, bugünkü müstəqil Azərbaycanda hakimiyyəti devirmək, inqilab etmək və hakimiyyətə gəlmək mümkünsüzdür. Çünki Azərbaycan dünyanın ən sürətli inkişaf edən ölkələri sırasında olmaqla yanaşı, regionda lider dövlətdir. Bu gün Azərbaycan iqtisadi sferada uğurlarla zəngin bir yolda irəliləyir və özünəməxsus cəhətləri olan inkişaf modelinin əsasını qoyub. Qeyd edilənlərin məntiqi nəticəsidir ki, son bir neçə ildə Azərbaycan ümumi daxili məhsulun artım dinamikasına görə dünya dövlətlərinin lideri statusunu daşıyır. Bunun önəmli səbəblərindən biri də Azərbaycan iqtisadiyyatının inkişafının təkcə enerji sektoru üzərində köklənməyərək, digər mühüm sferaları da əhatə etməsidir.

SEÇKİLƏRİN İŞIQLANDIRILMASINDA MƏTBUATIN ROLU VƏ İŞİ BÖYÜKDÜR

Vəli Vəliyev:

- Bu gün müzakirə olunan məsələ, həqiqətən də, aktual məsələdir. Çünki parlament seçkilərinin işıqlandırılmasında mətbuatın rolu və işi böyükdür. Onu da qeyd etmək istərdim ki, Azərbaycanda keçiriləcək parlament seçkiləri ərəfəsində ölkədəki ictimai-siyasi proseslərdə dinamika artıb. Deputatlığa namizədlərin irəli sürülməsi prosesi başlansa da, ölkədə yaranmış ab-hava və seçkilərin demokratik və şəffaf keçirilməsi üçün dövlət tərəfindən yaradılmış şərait seçki prosesinin kifayət qədər canlı və demokratik keçəcəyinə əsas verir. Bununla belə, yenə də müxalifət düşərgəsini təmsil edən siyasi partiyaların təmsilçiləri seçki prosesinin üzərinə gölgə salınması, bəzi beynəlxalq təşkilatlarda antiazərbaycan mövqeyinin bir az da dərinləşdirilməsi istiqamətində səylər göstərirlər.

Tapdıq QURBANLI,

Rəfiqə KAMALQIZI

Səs.- 2010.- 6 oktyabr.- S. 8-9.