Müəllimlər Günü qeyd olundu
Dünən Heydər Əliyev
Fondu tərəfindən əsaslı təmir olunaraq, bu il
sentyabrın 7-də istifadəyə verilən Badamdar qəsəbəsindəki
236 saylı orta məktəbdə Səbail rayon icra hakimiyyətinin
təşkilatçılığı ilə 5 oktyabr Müəllimlər
Gününə həsr olunan tədbirdə rayonun təhsil
işçilərilə görüş keçirildi.
Tədbirdə
çıxış edən Səbail rayon icra hakimiyyətinin
başçısı Asif Əsgərov
son illər müəllimlərin peşə
bayramının Azərbaycanda
milli bayram səviyyəsində qeyd
olunduğunu bildirdi. Xalqımızın
bu bayrama münasibətinin ildən-ilə
yaxşılaşdığını söyləyən A.Əsgərov
ulu öndər Heydər Əliyevin
müəllim adına yüksək qiymət verdiyini
söylədi:
"Ümummilli liderimiz
müəllim haqqında demişdir: "Müəllim adı
ən yüksək addır. Mən yer üzündə müəllimdən
yüksək ad tanımıram". O da təsadüfi deyil
ki, Heydər Əliyev Azərbaycanda ona təklif olunan müxtəlif
fəxri adlardan yalnız "Xalq müəllimi" fəxri
adını məmnuniyyətlə qəbul etmişdir".
A.Əsgərov ulu
öndərimiz Heydər Əliyevin Azərbaycan təhsilinə
olan diqqət və qayğısından danışdı, Səbail
rayon icra hakimiyyətinin başçısı, həmçinin,
ölkə Prezidenti İlham Əliyevin səyləri nəticəsində
son illər ərzində respublikamızda tikilən və əsaslı
təmir olunan təhsil müəssisələri, təhsil
işçilərinin sosial müdafiəsinin möhkəmləndirilməsi
istiqamətində atılan addımlar, Azərbaycan təhsilinin
inkişafında böyük rolu olan Heydər Əliyev
Fondunun prezidenti, YUNESKO və İSESKO-nun xoşməramlı
səfiri, millət vəkili Mehriban xanım Əliyevanın
gördüyü işlər və keçən təhsil
ilində rayonun təhsil müəssisələrinin
uğurları barədə də məlumat verdi. A.Əsgərov
onu da söylədi ki, ölkə
başçısının Sərəncamı ilə Beynəlxalq
Müəllimlər Günü ərəfəsində rayonun
müəllimlərindən 2 nəfər "Tərəqqi"
medalına layiq görülmüş, 3 nəfər müəllimə
isə "Əməkdar müəllim" adı
verilmişdir.
Tədbirdə
çıxış edənlər dövlətin təhsil
işçilərinə göstərilən diqqət və
qayğısından danışaraq, ölkə Prezidentinə
minnətdarlıqlarını bildirdilər.
Görüşdə
bir qrup qabaqcıl təhsil işçisinə rayon icra
hakimiyyətinin qiymətli hədiyyələri təqdim
olundu.
Tədbirdə Səbail
rayonunun sakini, respublikanın xalq artisti, 50 illik yubileyi ilə əlaqədar
Azərbaycan Respublikasının Prezidenti cənab İlham Əliyevin
Sərəncamına əsasən, "Şöhrət"
ordeni ilə təltif olunan Mənsum İbrahimova da RİH-in hədiyyə
və təbrik albomu təqdim olundu.
RƏFİQƏ HÜSEYNOVA
Səs.- 2010.- 7 oktyabr.- S. 7.