4-cü Azərbaycan Beynəlxalq Təhsil və Karyera Sərgisi öz işinə başladı

"Təəssüf edirəm ki, 4-cü Azərbaycan Beynəlxalq Təhsil və Karyera Sərgisində ölkədə fəaliyyət göstərən bütün ali təhsil müəssisələri iştirak etmir"

Dünən paytaxtda 4-cü Azərbaycan Beynəlxalq Təhsil və Karyera Sərgisi öz işinə başlayıb. SİA-nın xəbərinə görə, tədbirdə təhsil naziri Misir Mərdanov, nazir müavini Elmar Qasımov, İTECA Caspian Şirkətinin direktoru Fərid Məmmədov və təhsil ictimaiyyətinin digər nümayəndələri iştirak ediblər.

Tədbiri giriş sözü ilə açan təhsil naziri bildirib ki, 4 il ərzində sərgi Təhsil Nazirliyinin dəstəyi ilə həyata keçirilir. O vurğulayıb ki, sərginin yeni “Bakı Ekspo Mərkəzi” kompleksində keçirilməsi sərginin inkişafının yüksək dinamikasını bir daha göstərir. O, təhsil xidmətləri, peşəyönümlü istiqamətləndirmə və gənclərin məşğulluğuna etibarlı zəmanət baxımından regionun əsas illik forumuna çevrildiyini qeyd edən təhsil naziri builki sərgidə 60-dan çox ödənişli və ödənişsiz fakültələrin, kursların, habelə ən müxtəlif ixtisaslar üzrə proqramları özündə birləşdirən 94 təhsil müəssisəsinin təqdim olunduğunu diqqətə çatdırıb. Nazir qeyd edib ki, bütövlükdə isə sərginin ekspozisiyasında məktəbəqədər və orta təhsil, ali təhsil müəssisələrinin proqramları, distansion maarifləndirmə sistemləri, xaricdə təhsil və tələbələrin mübadiləsi üzrə proqramlar, elmi dərəcələrin əldə edilməsi üzrə təhsil, karyeranın planlaşdırılması və inkişaf etdirilməsi üzrə konsultasiyalar, fakültativ təhsil və turizm üzrə proqramlar, dil kursları və yay məktəbləri, yeni informasiya texnologiyaları, multimedia sistemləri, video və televiziya avadanlıqları, kompüterlər təqdim olunur.

“Təhsil istiqamətlərinin coğrafiyası da əhəmiyyətli dərəcədə genişlənərək Azərbaycan, Böyük Britaniya, Macarıstan, Almaniya, Yunanıstan, İspaniya, Kanada, Koreya, BƏƏ, Rusiya, ABŞ, Türkiyə və İsveçrə kimi ölkələri əhatə edir. 4 il əvvəlki sərgi ilə bu günki sərgini müqayisə etdikcə Azərbaycanin inkişafı aydın şəkildə görünür. Sevindirici haldır ki, Türkiyənin 15 universiteti burada təmsil olunur. Ancaq təəssüf edirəm ki, bu sərgidə Azərbaycanda fəaliyyət göstərən bütün ali təhsil müəssisələri iştirak etmir. Azərbaycanda bugün 50-ə yaxın universitetdən cəmi 2 universitet sərgidə iştirak edir. Bu təəssüfedici bir haldır. Bu onunla bağlıdır ki, hələlik bizim cəmiyyətimizdə reklamın mənasını dərindən başa düşmürlər. İnanıram ki, zaman keçdikcə bu da öz həllini tapacaqF, - deyə o əlavə edib.

“TECA Caspian Şirkətinin direktoru Fərid Məmmədov sərgi haqqında ətraflı məlumat verib. O vurğulayıb ki, sərgidə ilk dəfə olaraq Ankara, İstanbul və İzmirin 15 təhsil müəssisəsini özündə birləşdirən Türk Milli Universitetlər Qrupu da iştirak edir.

“Koreyanın milli stendi isə əsas istiqamətləri İKT və mühəndislik olan 11 universiteti təqdim edir. Böyük Britaniya isə London, Edinburq, Esseks, Notinhem, Suffolk şəhərlərinin 16 universitet və məktəblərini təqdim olunur. Moskva, Sankt-Peterburq, Nijni Novqorod, Samara və Dağıstanın 22 tanınmış ali təhsil müəssisəsi bu universitetlərin rəsmi nümayəndəsi olan Rusiya şirkətinin stendində təmsil olunur. Sərgidə ilk dəfə olaraq Litva Səfirliyi də iştirak edir və onun tərkibində Litvanın 2 dövlət ali təhsil müəssisi təqdim edilir”, - deyə o əlavə edib. Açılış mərasimindən sonra təhsil naziri və qonaqlar sərgidə təmsil olunan təşkilatların, qurumların stendlərinə baxıblar. Qeyd edək ki, sərgi oktyabrın 9-dək “Bakı Ekspo Mərkəzi” sərgi kompleksində davam edəcək.

Səs.- 2010.- 8 oktyabr.- S. 9.