YAP qaliblər partiyasıdır

Bəlli olduğu kimi, Milli Məclisə seçkilərlə bağlı təbliğat-təşviqat kampaniyası artıq start götürüb. Bununla bağlı, Yeni Azərbaycan Partiyasının Qusar rayon təşkilatı 51 saylı Qusar seçki dairəsindən YAP namizədi Azər Camal oğlu Badamovun təşviqatı ilə əlaqədar bir sıra görüşlər keçirib.

Namizədin ilk təşviqat günü kifayət qədər uğurlu olub. Azər Badamovun seçicilərlə ilk görüşü Qusarın Düztahir kəndində keçirilib. Əvvəlcədən müəyyən edilmiş yerdə, açıq səma altında keçirilən bu görüşə 250 nəfərdən çox seçici qatılıb. Görüşdə Milli Məclis üzvlüyünə namizədin vəkilləri və seçki qərargahının nümayəndələri də iştirak ediblər.

Tədbiri giriş sözü ilə YAP Qusar rayon təşkilatının sədri David İbrahimxəlilov açıb. O, vurğulayıb ki, 7 noyabr 2010-cu il tarixində keçiriləcək parlament seçkiləri ilə bağlı təbliğat-təşviqat kampaniyası ilk gündən gözlənildiyi kimi, çox uğurlu başlayıb. 51 saylı Qusar seçki dairəsindən Milli Məclis üzvlüyünə namizəd Azər Badamov haqqında geniş məlumat verən D.İbrahimxəlilov millət vəkili seçiləcəyi təqdirdə, A.Badamovun göstərilən etimadı yüksək səviyyədə doğruldacağına əmin olduğunu bildirib.

YAP Qusar rayon təşkilatının sədri David İbrahimxəlilov partiyanın təbliğat-təşviqat kampaniyasına yüksək səviyyədə hazırlaşdığını və bu səbəbdən, partiyanın növbəti dəfə seçkilərdə böyük, inamlı qələbə qazanacağına əmin olduğunu bildirib. O bildirib ki, Qusarda Yeni Azərbaycan Partiyası namizədlərinin təbliğat-təşviqat kampaniyası ilk gündən böyük uğurla həyata keçirilir. D.İbrahimxəlilov vurğulayıb ki, Yeni Azərbaycan Partiyası parlament seçkilərinə "güclü dövlət, yüksək rifah" şüarı ilə gedir.

Görüşdə çıxış edən Milli Məclis üzvlüyünə namizəd Azər Badamov millət vəkili seçiləcəyi təqdirdə, görəcəyi işlər, eyni zamanda, partiyanın seçki platforması barədə ətraflı məlumat verib. A.Badamov bildirib ki, ona etimad göstəriləcəyi təqdirdə, seçicilərin etimadını axıradək doğrultmağa çalışacaq. Görüşdə namizədin vəkili Mehrəli Məmmədəliyev çıxış edərək, A.Badamov layiqli namizəd olduğunu söyləyib, kənd sakinlərini A.Badamova səs verməyə çağırır. Görüşdə kənd sakinləri onları maraqlandıran suallarla Milli Məclis üzvlüyünə namizədə müraciət ediblər. Görüşdə çıxış edən kənd sakinləri A.Badamovun fəaliyyətinə yaxından bələd olduqlarını və bu səbəbdən ona səs verəcəklərini vurğulayıblar.

Yeni Azərbaycan Partiyasının namizədi A.Badamov həmin gün - oktyabrın 15-də Qusar rayonunun Gican kəndində də seçicilərlə görüş keçirib. Bu görüşdə isə, 150 nəfərdən artıq seçici iştirak edib. Görüşdə Milli Məclis üzvlüyünə namizəd A.Badamov, namizədin vəkilləri və seçki qərargahının nümayəndələri seçicilər qarşısında çıxış ediblər. Oktyabr ayının 16-da Milli Məclis üzvlüyünə namizəd A.Badamov rayonun daha üç məntəqəsində seçicilərlə görüşəcək.

Naib NİFTƏLİYEV

Səs.- 2010.- 16 oktyabr.- S. 10.