Yeni Azərbaycan Partiyası ətrafında Azərbaycanın ən intellektual gəncliyi cəmləşib

Ölkəmizdə, bütün sahələrində olduğu kimi, gənclərlə bağlı siyasətdə də yüksək uğurlar olması göz qabağındadır. Təkcə son beş ildə Azərbaycan gəncləri dünya və Avropa çempionatlarında bilik və intellektual müsabiqələrdə böyük uğurlara imza atıblar. Gənclərin ölkəmizin ictimai-siyasi həyatında rolunun durmadan artması onların bütün sahələrdə təmsil olmaları ilə açıq şəkildə görünməkdədir. Bu gün regionun və bütövlükdə, dünyanın aparıcı siyasi qüvvəsi olan Yeni Azərbaycan Partiyası ətrafında cəmləşmiş Azərbaycan gəncliyini öz gələcəyini məhz bu monolit təşkilatla bir yerdə görərək, ölkəmizdə gedən proseslərdə böyük aktivlik nümayiş etdirirlər. Bizimlə həmsöhbət olan və bu il ilk dəfə səs verəcək Yeni Azərbaycan Partiyasının gənc üzvləri payızda keçiriləcək parlament seçkilərində yüksək fəallıq nümayiş etdirmək əzmindədirlər. Onlar ölkəmizin yeganə güclü siyasi təşkilatı olan YAP-ın irəli sürdüyü ən layiqli namizədə dəstək olmaqla ölkəmizin inkişafında üzərlərinə düşən vəzifələrin layiqincə yerinə yetirilməsinə öz töhfələrini vermiş olacaqlarını bildiriblər. Bu ilin payızında keçiriləcək parlament seçkilərində ilk dəfə səs verəcək Yeni Azərbaycan Partiyasının üzvü Elvin Səlimov ölkəmizə gənclər siyasətinin nəticəsi olaraq idmançılarımızın əldə etmiş olduğu əvəzsiz nailiyyətlərdən bəhs etdi. Bildirdi ki, bu gün hər bir gənc ona qarşı olan diqqət və qayğıdan razıdırlar. "Bu baxımdan da, gəncələr ölkəmizdə hər bir sahədə böyük əzmlə çalışır, onlara verilən yüksək qiymətin nəticəsində dövlətimizin daha da güclənməsində yaxından iştirak edirlər" deyən E.Səlimov Azərbaycan gəncliyinin bu gün, sözün əsl mənasında, böyük intellektə və uğura imza atdığını bildirib. Qeyd edib ki, cənab Prezident İlham Əliyevin rəhbərliyi altında gəncələrimiz istənilən beynəlxalq əhəmiyyətli mötəbər yarışlarda ən yüksək pillələrə qalxırlar. "Bu isə dövlətimizin gəncələrlə sıx bağlılığının bariz nümunəsidir" deyən E.Səlimov ölkə daxilində gənclərin rolunun əhəmiyyətindən danışdı. Yeni Azərbaycan Partiyasının gənc üzvlərindən olan Vüqar Muradov bu ilin payızında keçiriləcək parlament seçkilərində ilk dəfə iştirak edəcəyini və YAP-ın irəli sürdüyü namizədə dəstək olacaqlarını bildirdi. Qeyd etdi ki, bu gün savadlı və intellektli düşüncəyə malik olan gənclər YAP sıralarında cəmləşiblər. "Onlar YAP-a üzv olmaqla öz gələcək həyatlarının stimullaşdırmış olublar" deyən V.Muradov Azərbaycan gənclərini ölkəmizin ictimai-syasi həyatında fəal olmağa səslədi. İlk səsverənlərdən olacaq YAP-ın gənc üzvü Lalə Qəhrəmanova da, gəncliyin böyük qüvvə olduğunu və onların istənilən prosesdə olduğu kimi, payızda keçiriləcək parlament seçkilərində də, əzmlə iştirak edəcəkləri sözsüzdür. L.Qəhrəmanova gəncələrin ölkəmizin inkişaf tendensiyasında rolundan və əhəmiyyətindən bəhs edərək, bildirdi ki, bu gün əldə olunan uğurlar gənclərin firavanlığına xidmət edir. 18 yaşı bu il tamam olmuş YAP-ın gənc üzvlərindən olan Məhin Qəniyeva da parlament seçkilərində ilk dəfə iştirak edərək, səs verəcəyindən qürurlandığını bildirdi. Qeyd etdi ki, artıq səsvermə yaşının çatması onun üçün böyük bir stimuldur. Çünki bundan sonra o, istədiyi insana dəstək olmaqla öz hüququnun nədən ibarət olduğunu müəyyənləşdirmək niyyətində olduğu qənaətindədir.

Tapdıq

Səs.- 2010.- 2 sentyabr.- S. 6.