YAP qaliblər və qələbələr partiyasıdır

YAP rayon təşkilatları parlament seçkilərilə bağlı hazırlıq işlər görür

Xalqımız növbəti seçki kampaniyasına hazırlaşır. Əvvəlki seçkilərdə olduğu kimi, növbəti parlament seçkilərinə hazırlıqla bağlı Yeni Azərbaycan Partiyasının rayon təşkilatlarında da ciddi hazırlıq işləri gedir. Hazırlıq işlərinin uğurla həyata keçirilməsi, bir daha onu təsdiqləyir ki, ölkənin güclü iqtidarda olan siyasi partiyası seçkiləri qələbə ilə başa vuracaq. Bunu YAP rayon təşkilatlarında görülən işlər də sübut edir.

Fərrux Haqverdiyev: "Əminik ki, xalq parlament seçkilərində də YAP-ın namizədlərinə səs verəcək"

"Yeni Azərbaycan Partiyasının rayon təşkilatlarında, əvvəlki seçkilərdə olduğu kimi, bu seçkilərə də ciddi hazırlıq işləri gedir. Hazırlıq işlərinin uğurla həyata keçirilməsi, bir daha onu təsdiqləyir ki, ölkənin iqtidarda olan siyasi partiyası - Yeni Azərbaycan Partiyası seçkiləri qələbə ilə başa vuracaq. Bunu YAP rayon təşkilatlarında görülən işlər də sübut edir". Bu fikirləri "Səs" qəzetinə verdiyi açıqlaması zamanı deyən YAP Xızı rayon təşkilatının sədri Fərrux Haqverdiyev parlament seçkilərinə ciddi hazırlıq işlərinin görüldüyünü söylədi. F.Haqverdiyev seçkinin ölkədəki siyasi-iqtisadi və sosial atmosferə təsir edə bilən siyasi proses olduğunu bildirdi: "Seçki prosesi məsuliyyətli, həm də çətin bir işdir. İlk illərdə, əlbəttə, seçkilərin keçirilməsində, hazırlıq işlərinin aparılmasında müəyyən çətinliklər olub. Amma Yeni Azərbaycan Partiyası dörd prezident, üç parlament, üç bələdiyyə və iki referendumda iştirak etmiş böyük siyasi qüvvə kimi dərin təcrübəyə, mükəmməl seçki texnologiyasına malikdir."

F.haqverdiyevin sözlərinə görə, əldə olunan uğurlar Yeni Azərbaycan Partiyasını işə məsuliyyətlə yanaşmasından irəli gəlir: "Partiyamız hər bir seçkidə ortaya yeni texnologiya qoymağa çalışır ki, seçkilər daha şəffaf, ədalətli və demokratik keçirilsin. Hərçənd ki, opponentlərimiz həmişəki kimi, diqqəti cəlb etmək məqsədilə böhtan kampaniyası aparır. Amma bunun heç bir təsiri yoxdur. Çünki xarici dövlətlər artıq Azərbaycanın seçki təcrübəsindən istifadə edirlər, bəhrələnirlər".

F.Haqverdiyev müxalifətin seçkiərəfəsi boğazdan yuxarı fikirlər söyləməsini mənasız adlandıraraq, bildirdi ki, artıq cəmiyyət əsl həqiqətləri yaxşı görür. Ona görə də, əminliklə deyə bilərik ki, sosial bazası, dəstəyi olmayan müxalifət budəfəki seçkilərdə də məğlub olacaq. Xalqın inamını, etimadını qazanmış Yeni Azərbaycan Partiyası qarşıdakı parlament seçkilərində də parlaq qələbə qazanacaq: "Qeyd etməliyəm ki, xalq sevgisi YAP-ın uğurlarını və qələbələrinin təməl daşını təşkil edir.Ölkə Prezidenti, Yeni Azərbaycan Partiyasının Sədri İlham Əliyevin gördüyü qlobal miqyaslı işlər xalqın partiyaya olan inamını daha da artırır. Bütün bunlar isə növbəti parlament seçkilərində də xalqın güvənc və ümid etdiyi partiyanın irəli sürdüyü namizədlərə səs verəcəyinə tam əminlik yaradır."

Məzahir Bayramov: "Parlament seçkilərində ölkəmizin demokratik dəyərlərə sadiq olduğu bir daha öz təsdiqini tapacaq"

Yeni Azərbaycan Partiyasının Tovuz rayon təşkilatının sədri Məzahir Bayramov qarşıdakı parlament seçkilərinə hazırlıq işləri ilə bağlı "Səs" qəzetinə verdiyi açıqlamasında bildirdi ki, ölkəmizdə formalaşmış seçki ənənəsi bu dəfə də özünü göstərəcək: "Çünki artıq ölkəmizdə formalaşmış olan mükəmməl seçki ənənələri özünün bütün parametrləri ilə demokratik dəyərlərlə tam uyğunluq təşkil edir. Beynəlxalq təcrübədən yararlanmaqla Azərbaycanda demokratik seçki mühitinin yaradılması və bu istiqamətdə mühüm nəticələrin hasil edilməsi dövlətimizin qarşısında duran ən ümdə vəzifələrdən hesab olunurdu. Elə, bu baxımdan da, gün-gündən inkişaf edən cəmiyyətimizdə seçki qaydalarının müasir prinsiplərə uyğunlaşdırılması da, görülən işlərin bariz nümunəsi kimi dəyərləndirilir. Digər bir aspektdən Azərbaycanda bu günə qədər keçirilmiş seçkilərdə vətəndaşların öz iradələrini tam sərbəst formada ifadə etmək üçün bütün addımlar atılıb. Buna misal kimi 1993-cü ildən bu günə qədər ölkəmizin ərazisində keçirilmiş seçkilərin mahiyyətində və məzmununda edilmiş dəyişikliklərin də günün tələblərinə uyğun olmasını göstərmək kifayət edir. Çünki ulu öndər Heydər Əliyevin müəyyənləşdirmiş olduğu demokratik dəyərlərə sadiqlik və inkişaf baxımından Azərbaycanda keçirilmiş seçkilərin mahiyyətində, hələ ki, ciddi bir uyğunsuzluğa rast gəlinməyib".

YAP Gədəbəy rayon təşkilatı seçkidə uğurlu nəticə əldə edəcək

Ramazan Muradov: "Azərbaycanın uğurlu inkişafında YAP-ın rolu böyükdür"

R.Muradov Gədəbəy rayonunun 57954 seçicisinin 103 saylı Gədəbəy və 104 saylı Gədəbəy-Tovuz Seçki Dairə Komissiyaları üzrə 61 məntəqəsində səs verəcəklərini bildirdi. YAP Gədəbəy rayon təşkilatının seçkilərə hazırlıq istiqamətində apardığı təşviqat işləri nəticəsində ciddi işlərin aparıldığını vurğulayan R.Muradov rayon təşkilatı qərəgahının yaradıldığını bildirdi. Onu da söylədi ki, Yeni Azərbaycan Partiyasının seçkiərəfəsi Azərbaycanın şəhər və rayon təşkilatlarının sədrlərinin iştirakı ilə ümumrespublika müşavirələri parlament seçkilərinə hazırlıq işləri ilə bağlı tapşırıqları seçkidə böyük uğurlar əldə etməyə imkan verir. Eyni zamanda, YAP Mərkəzi Aparatı tərəfindən parlament seçkilərinə dair fəaliyyət proqramı hazırlanaraq, rayon təşkilatlarına təqdim edilib: "Bu gün işlərimizi YAP Mərkəzi Aparatının Fəaliyyət Proqramına əsasən qurmuşuq. Artıq rayon ərazisində seçki qərargahları texniki avadanlıqlarla təchiz olunublar ki, bu, bütün hallarda seçkilərin şəffaflığına zəmanət verir. Qətiyyətlə deyə bilərəm ki, YAP Gədəbəy rayon təşkilatı bu seçkilərdə də yüksək fəallıq nümayiş etdirəcək".

R.Hüseynova

Səs.- 2010.- 2 sentyabr.- S. 7.