Yeni Azərbaycan Partiyası seçkiyə tam hazırdır

Mübariz Qurbanlı: "Biz namizədlərimizi seçki qanunvericiliyinin tələblərinə uyğun olaraq zamanında açıqlayacağıq"

“YAP seçkiyə tam hazırdır, partiyamız seçkidə qələbə çalmaq əzmindədir və bu seçkidə də qələbə əldə edəcəyimizə şübhəmiz yoxdur. Keçirdiyimiz bütün rəy sorğuları da bunu deməyə əsas yaradır. Eyni zamanda, Prezidentimiz və partiyamızın Sədri İlham Əliyevin həyata keçirdiyi siyasətin əhali, seçicilər tərəfindən müdafiə olunması, bizim irəli sürəcəyimiz namizədlərin də müdafiə edilməsi, dəstəklənməsini deməyə əsas verir". Bu fikirləri söyləyən YAP İcra katibinin müavini, millət vəkili Mübariz Qurbanlı onu da bildirdi ki, hakim partiya növbəti seçkilərdə iştirak edəcək namizədlərini müəyyənləşdirərkən, həmin namizədlərin partiyadakı əsas fəaliyyəti və seçicilər qarşısında götürdüyü öhdəlikləri yerinə yetirməsi məsələlərinə daha çox diqqət yetirir. Onunu sözlərinə görə, həmin şəxslərin - onlar YAP-ın parlamentdəki təmsilçiləri, Milli Məclisin üzvləri, yaxud da yenidən namizəd olacaq şəxslər ola bilər - o bölgədə, o əhatədə olan nüfuzu və əhali içərisində onlara veriləcək dəstək məsələləri də diqqət mərkəzindədir: "Biz sonuncu dəfə bələdiyyə seçkilərini keçirərkən xeyli məsələləri bir daha orada müzakirə edərək, seçkidə tətbiq olunan yenilikləri bu dəfə daha geniş şəkildə tətbiq etmək niyyətindəyik. Mən, eyni zamanda, YAP-ın namizədlər siyahısının açıqlanması adı altında mətbuatda gedən ajiotajı, doğrusu, bir az başa düşmürəm. Hər bir partiyanın seçki siyasəti, taktikası, strategiyası var və hər bir partiya seçkiyə gedəcək namizədlərini, nümayəndələrini, yəqin ki, zamanında müəyyənləşdirir, vaxtı gələndə onu açıqlayır. Bu gün qanun bizə hansısa bir formada namizədlərimizin hansı dairədən gedəcəyini açıqlamağa məcbur etmir. Biz namizədlərimizi seçki qanunvericiliyinin tələblərinə uyğun olaraq zamanında açıqlayacağıq. YAP-ın siyahı problemi və bununla əlaqədar, hər hansı bir bağlı, qapalı söhbət yoxdur. Partiyanın namizədləri zamanında müəyyən olunaraq, müvafiq dairələrdən irəli sürüləcək. Bir sözlə, partiyamız bu yöndə işləri xeyli vaxtdır aparır və bu barədə də partiyanın müvafiq strukturlarında işlər gedir". "Yeri gəlmişkən, onu da qeyd edək ki, hazırda YAP-ın parlamentdə 64 nəfər təmsilçisi var. Görəsən, həmin 64 millət vəkili və parlamentdə YAP-ın, iqtidarın siyasətini dəstəkləyən digər şəxslər, bitərəflər, partiyalı insanlar YAP-ın növbəti namizədlər siyahısına salınacaqlarmı?" sualını cavablandıran M.Qurbanlı bildirdi ki, YAP öz namizədlərini irəli sürəcək, eyni zamanda, ola bilsin ki, bəzi dairələrdə hakim partiya Azərbaycan üzrə tanınmış, Azərbaycan xalqı, seçiciləri tərəfindən böyük dəstəyə malik olan bitərəf insanları, o cümlədən, Azərbaycanın elm, mədəniyyət və digər sahələrində böyük uğurlar qazanmış şəxslərin namizəd olduğu dairələrdə onları dəstəkləsin. Yəni, bu, əvvəllər də olub, indi də ola bilər, bu dəfə də istisna deyil.

R.HÜSEYNOVA

Səs.- 2010.- 4 sentyabr.- S. 8.