Qələbənin 65 illiyinə həsr edilmiş yeni nəşrlərin təqdimatı

Respublika Veteranlar Şurasında alman faşizmi üzərində qələbənin 65 illiyinə həsr edilmiş üç kitabın - Əmiralı Əmirəliyevin "Mənalı ömür yolu", Aleksandr Qritçenkonun "Azərbaycanın oğul və qızlarının qəhrəmanlığı", Tofiq Seyidzadə və Əhməd Türk Sədərəklinin birgə qələmə aldıqları "408 sədərəkli Vətən uğrunda" kitablarının təqdimat mərasimi keçirilib. Tədbiri Respublika Müharibə, Əmək, Silahlı Qüvvələr və Hüquq Mühafizə Orqanları Veteranları Şurasının sədri Əlövsət Baxışov açaraq ölkəmizdə veteranlara dövlət tərəfindən göstərilən qayğıdan danışıb. Şura sədrinin birinci müavini, tədbirin təşkilatçısı Surxay Tağızadə kitabların müəllifləri və onların kitabları haqqında məlumat verib. Respublika Veteranlar Şurası bürosunun və rəyasət heyətinin üzvü A.Qritçenko 1941-1945-ci illər müharibəsində şanlı qələbənin qazanılmasında Azərbaycan xalqının rolundan bəhs edən, Bakıda və Moskvada nəşr olunan 70-dən artıq kitabın müəllifidir. T.Seyidzadə və Ə.T.Sədərəklinin "408 sədərəkli Vətən uğrunda" kitabında Azərbaycanın hər bir bölgəsindən qəhrəman oğulların alman faşizminə qarşı döyüşlərdə və arxa cəbhədə fədakarlıq göstərməsindən söz açılır. Tofiq Seyidzadənin axtarışları nəticəsində ərsəyə gələn kitabda Vətən yolunda canından keçmiş insanlar haqqında qısa tərcümeyi-hal da daxil edilib. Bir çox ölkələrin arxivlərinin araşdırılması nəticəsində əldə olunan dəyərli dəlillər müəllifin yaradıcılıq yolundakı nailiyyətləridir. Respublika Veteranlar Şurasının büro üzvləri Bahadır Hüseynov, Musa Bağırov, şuranın məsul katibi Əlfayım İsmayılov, Azərbaycan Dillər Universiteti veteranlar şurasının sədri Məhəmməd Teymurlu, Bakı şəhər Veteranlar Şurasının sədri Məmməd Qarayev, Azərbaycan Milli Elmlər Akademiyası Torpaqşünaslıq və Aqrokimya İnstitutunun laboratoriya müdiri, professor Paşa Zamanov, "Gənclik" nəşriyyatının direktoru Adil Abdullayev, "Vətən" nəşriyyatının direktoru Şəddad Cəfərov, şair-publisist Köçəri İsgəndərli və digər çıxış edənlər gənc nəslin hərbi vətənpərvərlik ruhunda tərbiyə olunmasında belə kitabların əhəmiyyət daşıdığını qeyd edib, müəlliflərə yaradıcılıq uğurları arzuladılar. Sonda müəlliflər Ə.Əmirəliyev, A.Qritçenko və T.Seyidzadə tədbirin təşkilatçılarına və iştirakçılarına minnətdarlıqlarını bildirərək, gənc nəslin vətənpərvərlik ruhunda yetişməsində mühüm əhəmiyyət kəsb edən əsərlərə bundan sonra da yaradıcılıqlarında xüsusi yer ayıracaqlarını qeyd etdilər.

Zümrüd

Səs.- 2010.- 16 sentyabr.- S. 12.