2009-cu il ölkəmiz üçün uğurlu keçib, 2010-cu il isə qələbələr ili olacaq

Yeni Azərbaycan Partiyası dünyanın aparıcı siyasi təşkilatları olaraq bu il də ön sırada qərar tutacaq

Artıq geridə buraxdığımız 2009-cu il ölkəmiz üçün olduqca uğurlu və əlamətdar hadisələrlə zəngin bir il oldu. Bu ildə də ulu öndər Heydər Əliyevin müəyyənləşdirmiş olduğu inkişaf yolu Prezident İlham Əliyev tərəfindən uğurla davam etdirilir. Elə bu uğurlu siyasətin nəticəsidir ki, ölkəmizin iqtisadi qüdrəti daha da artaraq, siyasi arenada güclü dövlət kimi özünü təsdiq edib.

Yeni Azərbaycan Partiyasının Zaqatala rayon təşkilatının sədri Habil Qurbanov

“Artıq xalqımız 2010-cu ilin ilk günlərini yaşayır. 2009-cu ili uğurla başa vuran Azərbaycan bu ilə də uğurlu nailiyyətlərlə başlayacaq. Xüsusilə, bu uğurlarda böyük nailiyyətlər əldə edən ölkənin güclü siyasi qüvvəsi olan Yeni Azərbaycan Partiyası üzərinə düşən bütün vəzifələri çox böyük məsuliyyət hissi ilə yerinə yetirir”- fikrini söyləyən YAP Zaqatala rayon təşkilatının sədri Habil Qurbanov Azərbaycanda mövcud inkişafla bağlı qarşıya bir çox prinsipial məqsədlərin çıxdığını bildirdi. H.Qurbanov Azərbaycanın gələcək uğurlarının da birbaşa YAP-la bağlı olduğunu söylədi: “Güclü dövlətə və dövlətçilik ənənələrinə, siyasi sabitliyə, davamlı iqtisadi inkişafa, sülhsevər xarici siyasətə malik hər bir azərbaycanlının vətəni olan müstəqil Azərbaycan dövlətini dünyaya qovuşduran ulu öndərin müstəqil dövlət quruculuğu modeli, prinsipləri dünya siyasi təcrübəsini zənginləşdirməyə xidmət edib. 1992-ci ildə Yeni Azərbaycanın yaranması ilə ölkə daxilində böhranlı vəziyyət aradan qaldırıldı. 1992-ci ildə ölkənin ağır şəraitində o zaman AXC-Müsavat hakimiyyəti Naxçıvanda dövlət çevrilişi etməyə cəhd göstərsə də, əhali çevriliş etməyə çalışanlara öz sözünü deyərək, ümummilli liderimiz Heydər Əliyevi dəstəklədilər və Onu qorudular. Tarixi zərurətdən yaranan Yeni Azərbaycan Partiyası bu gün xeyli güclənərək, ətrafında 500 mindən çox üzvü birləşdirir. Bu gün ölkə Prezidenti, Yeni Azərbaycan Partiyasının Sədri cənab İlham Əliyevin rəhbərliyi ilə yeni inkişaf mərhələsinə qədəm qoyan partiyamız, nəinki ölkəmizdə, ümumiyyətlə, cənubi Qafqazda tanınan və qəbul edildən siyasi təşkilata çevrilib. Çünki YAP xalqın partiyasıdır”.

YAP Gədəbəy rayon təşkilatının sədri Ramazan Muradov

“Bu gün hər bir azərbaycanlının ölkəmizin ictimai-siyasi həyatında baş verən müsbət dəyişikliklərdən yararlanır” fikrini söyləyən YAP Gədəbəy rayon təşkilatının sədri Ramazan Muradov bütün Azərbaycan xalqını ölkəmizə qədəm qoyan 2010-cu il münasibəti ilə təbrik etdi. Ölkəmizdə siyasi, iqtisadi, mədəni və digər sahələrdə əldə olunan nailiyyətlərdə Yeni Azərbaycan Partiyasının əvəzsiz xidmətləri olub. Çünki cəmiyyətdə YAP-a alternativ olacaq ikinci bir siyasi qüvvə yoxdur. 500 mindən çox üzvü və yüz minlərlə təəssübkeşləri olan YAP-ın istənilən ictimai-siyasi prosesə təsir imkanlarının böyük olduğunu qeyd edən təşkilat sədri bu gün hər bir yetişməkdə olan gəncin ulu öndər Heydər Əliyev irsindən yararlanmaq istəyində olduğunu dilə gətirdi: “Azərbaycan cəmiyyətində demokratikləşmə və yeniləşmə prosesləri gedir. Ona görə də, bugünkü cəmiyyət 1993-cü və 2003-cü ildəki cəmiyyət deyil. Bizim cəmiyyət artıq sərbəst formada öz seçimini edə bilir. Bunun da əsas səbəbi ictimai şüurun ictimai varlığın təyin etməsidir. Ölkədə gedən proseslər, quruculuq-abadlıq işləri və bununla yanaşı, yeni iş yerlərinin yaradılması insanların şüuruna təsirsiz ötüşməyə bilməz. Məhz ona görə də, cəmiyyət öz seçimində rahatdır. Çünki bu gün Azərbaycan cəmiyyətinin siyasi mədəniyyəti yüksəlib. Bununla yanaşı, Azərbaycan hökuməti özünün demokratik prinsiplərini zaman-zaman yerinə yetirib. Buna misal olaraq hakimiyyətin bir qolu olan ali qanunverici orqan tərəfindən Seçki Məcəlləsinin xeyli dərəcədə mükəmməlləşməsi və təkmilləşməsidir. Bir faktı da vurğulamaq lazımdır ki, dövlətin demokratik prinsiplərini özündə tam əks etdirməsi seçkilərin tam şəffaf keçməsini zəruriləşdirən əsas məqamdır” deyən R.Muradov, ilk növbədə, xalqımızın son illər ərzində ölkədə həyata keçirilən inkişafın müsbət nəticəsinin şahidi olduğunu bildirdi.

YAP Gədəbəy rayon təşkilatının sədri son illər əldə olunan uğurların əsas səbəb ümummilli liderimiz Heydər Əliyevin xalqa bağlılığı və bu siyasi kursun layiqli davamçısı ölkə Prezidenti İlham Əliyevin düzgün və məqsədyönlü siyasətinin nəticəsində nail olunduğunu söylədi: “Bütün dünya üzrə müqayisəli təhlil aparsaq, görərik ki, Azərbaycanın 4-5 il ərzində əldə etdiyi uğurları heç bir ölkə əldə edə bilməyib. Bütün bu nailiyyətlərə ölkə Prezidenti İlham Əliyevin düzgün və məqsədyönlü siyasətinin nəticəsində nail olunub. Digər bir əsas məqam isə, Prezidentin xalqla həmişə təmasda olmasıdır. Eyni zamanda, milli-mənəvi dəyərlərə hörmət, tarixi kökümüzə qayıdış və bir çox məsələlər cənab İlham Əliyevin xalq tərəfindən bu qədər dərin bir sevgi ilə əhatə olunmasına zəmin yaradıb”.

YAP Masallı rayon təşkilatının sədri Əmanət Əzizov

“Əvvəlki illər kimi, 2009-cu il də xalqımızın həyatında, o cümlədən, Yeni Azərbaycan Partiyasının 500 mindən çox olan üzvünün həyatında böyük nailiyyətlər ili kimi qalacaq”. YAP Masallı rayon təşkilatının sədri Əmanət Əzizov onu da vurğuladı ki, 2009-cu ilin sonunda ölkə Prezidenti, Yeni Azərbaycan Partiyasının Sədri cənab İlham Əliyevin əhalinin təbii qazdan istifadəsi üzrə yaranmış borclarının silinməsi tədbirləri barədə imzaladığı Sərəncam Azərbaycan xalqına layiqli bayram töhfəsi oldu: “Yeni Azərbaycan Partiyasının Sədri, ölkə Prezidenti İlham Əliyev həmişə xalqımızın sosial və digər problemlərinin həlli istiqamətində böyük addımlar atıb. Ölkə Prezidentinə dəstək olan YAP üzvləri bu işlərin həyata keçirilməsində həmişə öncül sırada olublar. Çünki YAP, nəinki regionda, eyni zamanda, Cənubi Qafqazda ən böyük siyasi gücə malikdir. Bunun başlıca meyarı Azərbaycan xalqının ümummilli lideri Heydər Əliyevin müəyyənləşdirmiş olduğu siyasi kursla bağlı olmasıdır”.

Ə.Əzizov onu da vurğuladı ki, 1993-cü ildən bəri ölkədə ictimai-siyasi sabitlik yaradıldı və inkişaf istiqamətləri müəyyənləşmiş oldu: “Bu gün ulu öndərin ən layiqli davamçısı olan Prezident İlham Əliyevin rəhbərliyi altında Azərbaycan dünyanın ən aparıcı dövlətlərindən birinə çevrilib. Dövlətimizin iqtisadi potensiala əsaslanan xarici siyasəti günü-gündən daha da güclənir. Artıq Azərbaycan dünyanın aparıcı və lider dövlətləri ilə bir sırada addımlayır. Ölkə daxilində mövcud sabitlik əldə olunmuş iqtisadi inkişaf bunu daha da zəruri edir. Dövlətimiz öz daxili gücü vasitəsi ilə heç bir kənar yardım olmadan öz iqtisadi potensialını daha da gücləndirməyə, eyni zamanda, xirici siyasətdə müstəqil yol tutumağa başlayıb. Bu gün dünyanın inkişaf etmiş və etməkdə olan bir çox dövlətlərin tarixinə nəzər salsaq, onların müəyyən dövrlərdə bir sıra kənar qüvvələrdən asılı olaraq, inkişaf etdiyini müşahidə etmək olar. Bu isə onların üzdə görünən inkişaf strategiyasının heç də müstəqil olmadığını göstərir. Azərbaycan isə, öz müstəqilliyini bərpa etdikdən sonra, 1990-ci illərdə bir sıra bəlalarla üzləşməsinə baxmayaraq, Ulu Öndər Heydər Əliyevin siyasi iradəsi və möhkəm şəxsiyyət nüfuzu sayəsində bu sınaqlardan üzüağ çıxmağı bacardı. Nəticədə daxili resurslardan istifadə etməklə, özünün sosial siyasətini həyata keçirən ölkəmiz, məhz ümummilli liderin uzaqgörənliyi sayəsində sabitlik və inkişaf yoluna qədəm qoydu. Eyni zamanda, Prezident İlham Əliyevin bilik və bacarığı, müstəqil şəxsiyyət kimi formalaşması, öz vətəninə və xalqına qarşı olan dərin məhəbbəti imkan verdi ki, Azərbaycan xalqı firavan və sülh içərisində yaşasın inkişaf etsin. Bu siyasi-iqtisadi və sosial siyasət 1993-cü ildən başlandığı kimi, 2009-cu ildə də uğurla davam etdirildi. Azərbaycan özünü dünyada müstəqil dövlət kimi artıq təsdiq edərək, güclü iqtisadiyyata malik bir ölkə olduğunu sübuta yetirmiş oldu. Yeni 2010-cu ilin də, Azərbaycanın ictimai-siyasi həyatında ən əlamətdar illərdən biri kimi olacağı danılmazdır”.

Rəfiqə Kamalqızı

Səs.- 2010.- 6 yanvar.- S. 6.