“Erməni xəyanəti və Gürcüstan” kitabı təqdim olunub

Cəfər Cabbarlı adına Respublika Gənclər kitabxanasında jurnalist Nəriman Əliyevin Azərbaycan və ingilis dillərində çapdan çıxmış “Erməni xəyanəti və Gürcüstan” kitabının təqdimatı keçirilib.

Kitabxananın direktoru Tahir Sadıqov, Prezident təqaüdçüsü, şair Nurəngiz Gün, “Qafqaz Media” İctimai Birliyinin sədri Azadə Taleh, “Azyaşlıların Mədəni Maariflənməsi” İctimai Birliyinin sədri Nazlı Zeynalova, Hacı Əli Xankişiyev, yazıçı-publisist Rauf İlyasoğlu jurnalist Nəriman Əliyevin gürcü dilindən tərcümə etdiyi, arxiv materialları ilə zəngin olan kitabında ermənilərin Gürcüstanda törətdikləri vəhşiliklərin, faciələrin əks olunduğunu bildiriblər.

Qeyd olunub ki, kitabda müxtəlif illərdə gürcü mətbuatında dərc olunmuş yazılarda Gürcüstanda yaşayan ermənilərin separatçılıq meyilləri, Gürcüstana qarşı mədəni və tarixi ekspansiyaları, onların Abxaziyada gürcülərə qarşı döyüşmələri, günahsız gürcü sakinlərinin məhvində iştirakları və s. faktlarla göstərilibdir.

Heydər Əliyev adına Marneuli Universitetinin müəllimi Əli Abbasov, uzun müddət Gürcüstan parlamentində azərbaycanlıları təmsil edən Ramiz Bəkirov erməni millətçilərinin həmişə təkcə Türkiyə və Azərbaycana yox, həm də Gürcüstana qarşı fitnəkar, məkrli siyasət yürütdüklərini, onların Abxaziyanı erməniləşdirmək, Samtsxe-Cavaxetiyanı Gürcüstandan qopararaq, Qara dənizə çıxış əldə etmək planlarının artıq hamıya məlum olduğunu vurğulayıblar. Gürcüstanda yaşayan azərbaycanlıların hər zaman Azərbaycana arxalandığını bildirən soydaşlarımız bu məkrli düşmənə qarşı birgə mübarizə aparmağın vacib olduğunu diqqətə çəkmiş, kitabın rus və başqa dillərə də tərcümə olunmasını arzulayıblar.

Kitabda, həmçinin, 1918-ci il Ermənistan-Gürcüstan müharibəsi, Abxaziyada “Baqramyan” adlı batalyonun törətdiyi vəhşiliklər, gürcü abidələrinə, gürcülərin mədəni irsinə, kilsəsinə erməni təcavüzündən danışmış, tanınmış gürcü yazıçısı və ictimai xadimi İlya Çavçavadzenin XVIII əsrdə Ağa Məhəmməd şah Qacara Gürcüstan qapılarını əslən erməni olan aşbazın açdığını təsdiqləyən yazısı haqqında məlumat verilibdir. Kitabın redaktoru və ön sözün müəllifi biologiya elmləri namizədi, Tbilisinin fəxri vətəndaşı, Gürcüstan Yazıçılar İttifaqının fəxri üzvü Aslan Aslanov, elmi redaktoru tarix elmləri namizədi Kərəm Məmmədovdur.

Tədbirin sonunda müəllif kitabın nəşr olunmasına maliyyə dəstəyinə görə “Qafqaz Media” İctimai Birliyinə, həmçinin, tədbir iştirakçılarına minnətdarlığını bildirib, bu mövzuda gürcü mənbələri əsasında yeni bir toplu üzərində çalışdığını demişdir.

Zümrüd

Səs.- 2010.- 7 yanvar.- S. 12.