Kamil Nəcəfzadənin 80 illik yubiley sərgisinin açılış mərasimi keçirildi

Dünən Mədəniyyət və Turizm Nazirliyi və Azərbaycan Rəssamlar İttifaqı ilə birlikdə Dövlət İncəsənət Muzeyində tanınmış Azərbaycan rəssamı Kamil Nəcəfzadənin 80 illik yubiley sərgisinin açılış mərasimi keçirildi.

Azərbaycan kino, teatr və rəngkarlıq sənətinin istedadlı nümayəndələri sırasında görkəmli rəssam, respublikanın xalq rəssamı, “Şöhrət” ordenli Kamil Nəcəf oğlu Nəcəfzadənin layiqli yeri vardır.

Kamil Nəcəfzadə 29 dekabr 1929-cu ildə Bakıda anadan olub. Ömrünün 60 ilə yaxın bir dövrünü rəssamlıq sənətinə həsr edib. O, yaradıcılıq fəaliyyətinə 1948-ci ildə Ə.Əzimzadə adına Azərbaycan Dövlət Rəssamlıq Məktəbini bitirdikdən sonra başlayıb. 1955-ci ildə Moskvada Ümumittifaq Dövlət Kinematoqrafiya İnstitutunda təhsilini tamamlayıb, Bakıya qayıdan Kamil Nəcəfzadə Cəfər Cabbarlı adına “Azərbaycanfilm” kinostudiyasında yaradıcılıq dövrünün yeni mərhələsinə başlayır. Bu illər ərzində o, “Bir məhəlləli iki oğlan”, “Uzaq sahillərdə”, “Qara daşlar”, “Mən rəqs edəcəyəm”, “Bir cənub şəhərində”, “Səmt küləyi”, “Qaçaq Nəbi”, “Ad günü” filmlərinin quruluşçu rəssamı kimi sənətsevərlərin məhəbbətini qazanır. Kamil Nəcəfzadə bu dövr ərzində 40-a yaxın filmin quruluşçu rəssamı olub.

Kino filmlərdən əlavə, Kamil Nəcəfzadə Azərbaycan teatr səhnəsində də fəaliyyət göstərmiş, Hüseyn Cavidin “Knyaz” (1964-cü il) və Səməd Vurğunun “Fərhad və Şirin” (1976) əsərlərinə quruluş vermişdir.

Səhnəqrafiya və kino filmlərin bədii tərtibatı ilə yanaşı, Kamil Nəcəfzadə rəngkarlıq və qrafika sahələrində də öz istedadını bu günə qədər nümayiş etdirir. O, 1957-ci ildən Rəssamlar İttifaqının və Kinematoqrafçılar İttifaqının üzvüdür.

Kamil Nəcəfzadənin yaratdığı əsərlər bənzərsizliyi ilə seçilir. Onun “Əmək adamları”, “İlk traktor”, “Azərbaycan harayı”, “Yaylaqda səhər”, “Tarix bağışlamır”, “Çay kənarında” tabloları, “Əli Zeynalov”, “İmran Qasımov”, “Mahmud Esembayev” və bir sıra portret əsərləri rəssamın yaradıcılığında özünəməxsus yer tutmuşdur. Rəssamın əsərləri dünyanın bir çox guşələrində - Amerika, Böyük Britaniya, Yaponiya, Türkiyə, Çexoslovakiya, Almaniya, Fransa, Kanada, və başqa ölkələrin muzeylərində, şəxsi kolleksiyalarda saxlanılır. Həmin ölkələrin bir neçəsində rəssamın fərdi sərgiləri Azərbaycan təsviri sənətinin uğurlu nailiyyətləridir. O, 1986-cı ildə Vyetnamın Hanoy şəhərində fərdi sərgisinin açılışından sonra 29 əsərini Vyetnam xalqına hədiyyə etmişdir.

Kino və rəngkarlıq sahəsində xidmətlərinə görə K.Nəcəfzadə 1964-cü ildə Çeçen-İnquş Respublikasının Əməkdar İncəsənət Xadimi, 1976-cı ildə Azərbaycan Respublikasının Əməkdar İncəsənət Xadimi, 1987-ci ildə isə Azərbaycan Respublikasının Xalq Rəssamı kimi yüksək fəxri adlara layiq görülmüş, müxtəlif orden və medallarla təltif olunub. O, iki dəfə Dövlət mükafatı laureatıdır. Kamil Nəcəfzadə öz sənətini gənc nəslə də həvəslə öyrədir. O, Azərbaycan Dövlət Mədəniyyət və İncəsənət Universitetində pedaqoji fəaliyyətlə məşğul olmuş və hazırda Azərbaycan Dövlət Rəssamlıq Akademiyasının professoru kimi gənc nəslin tərbiyəsi işinə öz layiqli töhfəsini verir.

Mədəniyyət və Turizm Nazirliyi tərəfindən müxtəlif illərdə rəssamın əsərləri alınaraq, Dövlət İncəsənət Muzeyi və Dövlət Rəsm Qalereyasının fonduna daxil edilib. Müxtəlif sərgilərdə K.Nəcəfzadənin əsərləri nümayiş etdirilir. 2004-cü ildə S.Bəhlulzadə adına Mərkəzi Sərgi Salonunda rəssamın 75 illik yubiley sərgisi keçirilib.

2009-cu ildə sənətşünaslıq doktoru Cəmilə Həsənzadə, Ceyhun Səmədovun müəllifliyi ilə hazırlanmış “Kamil Nəcəfzadə” adlı kitab 500 tirajla nazirlik tərəfindən nəfis şəkildə çap olunub.

Zümrüd

Səs.- 2010.- 13 yanvar.- S. 12.