YAP xalqın etimadını qazanmış partiyadır

Kərim Kərimov: “Yeni Azərbaycan Partiyası ümumxalq partiyasıdır”

Müstəqil Azərbaycanın qurucusu, ulu öndər Heydər Əliyevin uğurlu siyasəti nəticəsində Azərbaycan regionun inkişaf etmiş ölkəsinə çevrilib. Həm iqtisadi, həm hərbi, həm də siyasi cəhəddən uğurlar əldə etməkdədir. Sözsüz ki, bu uğurlarda ulu öndərimiz Heydər Əliyevin qurucusu olduğu Yeni Azərbaycan Partiyasının da xüsusi yeri var. Ümummilli liderimizin dünənin, bugünün və gələcəyin partiyası adlandırdığı hakim Yeni Azərbaycan Partiyası (YAP) xalqımızın inamını qazanmış bir partiyaya çevrilib. Məhz bütün bunların nəticəsidir ki, 1992 ci ilin noyabrında fəaliyyətə başlayan YAP respublikamızda keçirilən bütün seçkilərdə-1993, 1998, 2003 və 2008-ci ilin Prezident, 1995, 2000, 2005-ci ilin parlament, 1999, 2004 və 2009-cu ilin bələdiyyə seçkilərində Yeni Azərbaycan Partiyasının namizədləri böyük səs çoxluğu ilə qələbə qazanıblar. Bütün bunlar xalqımızın ulu öndər Heydər Əliyevə və hakim Yeni Azərbaycan Partiyasının sədri, Prezident İlham Əliyev cənablarına inam və etimadından irəli gəlir. Ötən ilin dekabrında keçirilən növbəti dəfə bələdiyyə seçkiləri də bunu bir daha təsdiqlədi. Hər dəfə olduğu kimi, bu dəfə də respublikamızda ədalətli, demokratik seçkilər keçirildi. Yerli özünüidarəetmə orqanlarına keçirilən seçkiləri yerli müşahidəçilərlə yanaşı, beynəlxlaq müşahidəçilər də izləyirdi. Aparılan müşahidələr bir daha onu göstərdi ki, Azərbaycanda hər zaman demokratik, ədalətli seçkilər keçirilib. Bütün bunlar isə müstəqil Azərbaycanın qurucusu, ümummilli liderimiz Heydər Əliyevin əsasını qoyduğu demokratik islahatların nəticəsidir. Bu gün də Prezident İlham Əliyev hüquqi dövlət quruculuğu istiqamətində uğurlu işlər həyata keçirməkdədir. Mərkəzi Seçki Komissiyasının (MSK) dekabrın 23-də keçirilmiş seçkilərdə bələdiyyə üzvü seçilmiş namizədlər haqqında statistik məlumatında bildirilir ki, seçkilərdə qalib gəlmiş şəxslərin 10 min 705 nəfərinin namizədliyi siyasi partiyalar, 77-nin namizədliyi isə təşəbbüs qrupları, 4809 nəfərin namizədliyi isə özləri tərəfindən irəli sürülüb. Bələdiyyərdə siyasi partiyaları təmsil edən namizədlərin 10 min 290-nı YAP, 132-si “BQP”, 81-i “BAXCP”, 62-i “AVP”, 61-i “VHP”, 41-i “Ümid”, 15-i ADİSP, 14-ü “VBP”, 5-i ASRP, 4-ü Müsavat partiyasının üzvləridir. Bitərəflərin sayı 4157, partiya mənsubiyyətini göstərməyənlərin sayı 157 nəfərdir. Builki bələdiyyə üzvlərinin 9 min 979-zu ali, 2711-i natamam ali təhsillidirlər. Bələdiyyə üzvlərinin 1157-ni kişilər, 4074-nü qadınlar təşkil edirlər. Bələdiyyə üzvlərinin 4243-ü 21-30, 2615-i 31-40, 4781-i 41-50, 3293-ü 51-60 yaş qrupuna daxildirlər. 659 nəfərinin yaşı 60-dan yuxarıdır. Ümumilikdə isə, 15 min 591 nəfər bələdiyyə üzvü seçilib. Məsələyə münasibətini öyrəndiyimiz Yeni Azərbaycan Partiyası İdarə Heyətinin üzvü Kərim Kərimov qeyd etdi ki, bütün bunlar onun göstəricisidir ki, hakim partiya olan YAP ümumxalq partiyasına çevrilib. - Bildiyiniz kimi, 2009-cu ilin dekabrında keçirilən bələdiyyə seçkiləri ölkəmizdə keçirilən sayca üçüncü bələdiyyə seçkiləri idi. Ötən bələdiyyə seçkilərində Yeni Azərbaycan Partiyasının bələdiyyələrdə təmsilçiliyi təxminən 65 % təşkil edirdi. Bu dəfə nəzərdə tutmuşduq ki, bu göstəricini 70%-ə çatdıraq. Ötən seçkilərə nisbətən YAP-ın bələdiyyə seçkilərində təmsilçiyi 2 % artıq oldu, yəni 67% təşkil etdi. Son bələdiyyə seçkilərində iştirak edən seçicilərin 2\3 hissəsi Yeni Azərbaycan Partiyasının namizədlərinə səs veriblər. Eyni zamanda, onu da qeyd etmək istəyirəm ki, YAP bələdiyyə seçkiləri ilə əlaqədar olaraq, bütün rayon və şəhərlərdə 3 mərhələdən ibarət seçki qanunvericiliyinə uyğun olaraq, seçki kampaniyası apardı. Yəni həmişə olduğu kimi, bu seçkilərdə də hakim Yeni Azərbaycan Partiyası digər partiyalardan fərqli olaraq, aktiv, uğurlu seçki kampaniyası həyata keçirdi. Yeni Azərbaycan Partiyası, digər seçkilərdə olduğu kimi, 2009-cu il seçkilərində də uğur əldə etdi. Bütün bunlar ölkə vətəndaşlarının Yeni Azərbaycan Partiyasına inamının, ixtidara olan etimadının nəticəsidir. Bu gün YAP-ın 500 min üzvü var və bu, onu deməyə əsas verir ki, Yeni Azərbaycan Partiyası ümumxalq partiyasıdır. Bu, 9 milyonluq əhali üçün böyük bir uğurdur. YAP-ın bölgədə analoqu yoxdur, yəni hakim Yeni Azərbaycan Partiyası regionun ən güclü partiyasıdır. Bu da özünü nəinki bələdiyyə seçkilərində, həmçinin, prezident və parlament seçkilərində də göstərir. O da məlumdur ki, Azərbaycanda müxalifət adında real qüvvə yoxdur. Ümumiyyətlə, onların sosial bazası yoxdur ki, seçkilərdə iştirak edə bilsin. Yəni ölkəmizdə fövqəlqüvvəyə malik bir partiya varsa, o da Yeni Azərbaycan Partiyasıdır.

ANAR MƏCİDZADƏ

Səs.- 2010.- 15 yanvar.- S. 5.