20 Yanvar - xalqımızın qan yaddaşı

YAP Sabunçu rayon təşkilatında bu mövzuda tədbir keçirildi

Yeni Azərbaycan Partiyasının Sabunçu rayon təşkilatının və Sabunçu rayon icra hakimiyyətinin təşkilatçılığı ilə 1990-cı il 20 Yanvarda milli azadlığımız uğrunda canlarından keçmiş övladlarımızın əziz xatirəsinə həsr olunmuş tədbir keçirildi. Tədbir iştirakçıları ilk öncə xalqımızın and yeri olan Şəhidlər Xiyabanında 1990-cı il yanvarın 19-dan 20-nə keçən gecə müstəqilliyimiz uğrunda şəhid olmuş övladlarımızın məzarlarını ziyarət etdilər, əbədi məşəl kompleksinin önünə əklil qoydular. YAP Sabunçu rayon təşkilatının qərargahında davam edən tədbirdə çıxış edən rayon icra hakimiyyəti başçısının müavini Qəzənfər Həsənov Azərbaycan xalqının qəhrəmanlıq salnamələrindən olan 20 il öncə baş vermiş hadisənin əhəmiyyətinə toxundu. Qeyd etdi ki, 1990-cı ilin 20 yanvarında baş vermiş hadisə Azərbaycan xalqının müstəqillik və azadlıq uğrunda mübarizəsini və iradəsini sındıra bilmədi.

YAP Sabunçu rayon təşkilatının sədri Mehriban Abasquliyeva tarix boyu xalqımızın başına gətirilən müsibətlərdən bəhs etdi. Bildirdi ki, Azərbaycan xalqı çox qəhrəman və şücaətli bir xalqdır. Onun əzmini bu və ya digər formada təhdid və təkidlərlə sındırmağın mümkün olmadığını bildirən M.Abasquliyeva tarixdə Azərbaycan xalqına qarşı 1905-1907, 1918-ci illərdə törədilmiş tarixi cinayətlərin siyahısında 1990-cı ilin 20 yanvarında və 1992-ci ilin 26 fevralında baş verən Xocalı qırğınların da əlavə edildiyini söylədi. “Xalqımız bütün bu müsibətlərə və məşəqqətlərə baxmayaraq, öz inamını və ideyasını qoruyub saxlaya bildi. 1990-cı ildə baş verən hadisələr seriyasına daxil olan 20 Yanvar qırğını Azərbaycan xalqının bütün dünyaya mübariz bir xalq olduğunu açıq şəkildə nümayiş etdirdi. Məhz həmin hadisələrin səhərisi günü xalqın ulu öndəri Heydər Əliyev Moskvada yerləşən Azərbaycan nümayəndəliyinə gələrək, xalqının başına gətirilən bu müsibətləri vəhşilik və vandalizm adlandırmış, dünya ictimaiyyətini bu hadisəyə diqqət yetirməyə çağırmışdır. Bu gün isə xalqımızın ulu öndərinin ideyalarının və müstəqil dövlətimizin günü-gündən inkişaf etdirilməsi Prezident İlham Əliyev tərəfindən Azərbaycanın dünyada aparıcı bir dövlətə çevrilməsi şəhidlərimizin ruhuna, xalqımızın əzəmətinə olan böyük bir qiymətdir” deyən M.Abasquliyeva bütün şəhidlərimizə Allahdan rəhmət, onların ailələrinə səbr dilədi.

20 Yanvar hadisələrinin şahidləri və ailə üzvləri adından çıxış edən Rövşən Abbasov və Asif Muxtarov şəhidlərimizə və şəhid ailələrimizə qarşı dövlət tərəfindən daim diqqət və qayğının olduğunu bildirdilər. Dağlıq Qarabağ münaqişəsinin yaxın zamanlarda həllinə toxunan çıxışçılar bu problemin həllini bütün şəhidlərimizin ruhuna böyük töhfələrdən biri kimi qiymətləndirdilər. Tədbirin sonunda 1990-cu ilin 20 yanvarında şəhid olmuş şəxslərin bir qrupunun ailəsinə maddi yardım və ərzaq bağlamaları təqdim edildi.

Tapdıq QURBANLI

Səs.- 2010.- 19 yanvar.- S. 7.