Bu qisas qiyamətə qalmaz...

20 Yanvar xalqımızın qəhrəmanlıq səlnaməsi idi

Dünən 20 Yanvar faciəsinin 20-ci ildönümü ilə əlaqədar YAP Yevlax rayon təşkilatı gənclər birliyinin tədbiri keçirildi. Tədbir iştirakçıları, ilk öncə, 20 Yanvar faciəsində həlak olmuş şəhidlərin əziz xatirəsini bir dəqiqəlik sükutla yad etdilər.

YAP Yevlax rayon təşkilatının aparat rəhbəri Əli Quliyev tədbirdə çıxış edərək, qeyd etdi ki, 20 Yanvar Azərbaycan xalqının tarixinə qanla yazılmış səhifələrdən biridir. Amma o müdhiş gecə tariximizə təkcə faciə kimi yox, həm də Azərbaycan xalqının mübarizlik, qəhrəmanlıq günü kimi daxil oldu. Azərbaycan xalqı 20 yanvarda hərbi, siyasi və mənəvi təcavüzə məruz qalsa da, öz tarixi qəhrəmanlıq ənənələrinə sadiq olduğunu, vətənin azadlığı və müstəqilliyi naminə ən ağır sınaqlara sinə gərmək hətta şəhid vermək əzmini bu gecə bütün dünyaya nümayiş etdirdi.

Tədbirdə YAP Yevlax rayon təşkilatı gənclər birliyinin sədri Sevil Əliyeva, Gənclər İdman İdarəsinin baş məsləhətçisi Etibar Məmmədov, Yevlax Torpaq və Xəritəçəkmə Komitəsinin əməliyyatçısı Eldəniz Səttarov və başqaları çıxış edərək, 20 Yanvar faciəsinin gənclər üçün nə qədər müqəddəs olduğunu vurğuladılar. Çıxış edənlər ümummilli lider Heydər Əliyevin şəhidlərin xatirəsinin əbədiləşdirilməsi istiqamətində gördüyü işlərdən danışdılar, keçmişin qaranlıq səhifələrini tənqid atəşinə tutdular. Vurğuladılar ki, bugünkü gənclik keçmişlə gələcəyin arasında bir körpüdür. Çünki bu hadisələrin canlı şahididirlər. Bu baxımdan, gənclər fikirləşirlər ki, onların üzərinə düşən yük daha böyükdür. Bu məsuliyyəti hər bir gənc dərk etməlidir.

Tədbirin sonunda 20 yanvar faciəsinin 20-ci ildönümünə həsr olunmuş məktəblilər arasında keçirilən inşa yazı müsabiqəsinin qalibi Yevlax şəhər 9 saylı orta məktəbin 9-cu sinif şagirdi Eldar Rəsulov çıxış etdi. Qalib məktəbli E.Rəsulov YAP Yevlax rayon təşkilatı gənclər birliyi tərəfindən fəxri fərman və hədiyyə ilə təltif edildi.

Sonda YAP Yevlax rayon təşkilatının aparat rəhbəri Əli Quliyev tədbiri yekunlaşdıraraq bildirdi ki, əsrlər keçəcək, nəsillər dəyişəcək, lakin vətən uğrunda canını qurban verən şəhidlərimizin əziz xatirəsi unudulmayacaq, ürəklərdə əbədi yaşayacaqdır. Bu xatirəni müqəddəs tutmaq hər bir Azərbaycan gəncinin vətəndaşlıq borcudur.

R.KAMALQIZI

Səs.- 2010.- 19 yanvar.- S. 12.