“20 Yanvar-Ümumxalq Hüzn Günü”

Bu mövzuda Gəncliyə Yardım Fondunda tədbir keçirildi

Dünən Azərbaycanın Beynəlxalq Humanitar Yardım üzrə Respublika Komissiyası, “İstanbul Beynəlxalq Qardaşlıq və Yardımlaşma Dərnəyi”nin Azərbaycan nümayəndəliyi və 20 Yanvar Fondunun təşkilatçılığı ilə “20 Yanvar-Ümumxalq Hüzn Günü” mövzusunda tədbir keçirildi. Tədbirdə hökumət rəsmiləri, Türkiyənin Azərbaycandakı səfirliyinin nümayəndələri, 20 Yanvar şəhidlərinin ailələri və Milli Məclisin deputatları iştirak etdi.

Tədbir iştirakçıları, ilk öncə, şəhidlərin ruhunu bir dəqiqəlik sükutla yad etdilər. Sonra həm Azərbaycan Respublikasının, həm də Türkiyənin himni səsləndi.

Dəyirmi masada çıxış edən Azərbaycan Respublikası Gəncliyə Yardım Fondunun prezidenti Ahmet Tecimin 20 Yanvar hadisələrinin Azərbaycanın müstəqilliyinin təmin olunmasında mühüm rol oynadığını vurğuladı. O, 20 Yanvar hadisələrinin həm faciə, həm də dövlətin qürur günü olduğunu diqqətə çatdırdı. Qeyd edərək vurğuladı ki, hər bir xalqın tarixində azad və müstəqil yaşamaq üçün dönüm nöqtəsi hesab olunan tarixlər və azadlıq, müstəqillik uğrunda öz şirin canlarından keçmiş qəhrəman övladları olubdur. Məhz belə qəhrəmanlar zamanın axarında əsla unudulmur. Tarixin yaddaşına azadlıq uğrunda axıtdıqları müqəddəs qanları ilə adlarını yazdırmış 20 Yanvar şəhidləri də məhz xalqımızın yaddaşında daima belə yaşayacaqdır. Onların xatirələri həmişə ehtiramla yad olunacaqlar.

Tədbirdə çıxış edən Azərbaycan Respublikası Baş nazirin müavini, Qaçqın və Köçkünlərin İşi üzrə Dövlət Komitəsinin sədri Əli Həsənov 20 Yanvar hadisəsini həm faciə, həm tarixi, həm də qəhrəmanlıq nümunəsi adlandırdı. Ə.Həsənov faciənin törədilməsinin əsas səbəbkarının SSRİ-nin o vaxtkı rəhbərliyi olduğunu söylədi: “Həm bu faciəni, həm də Ermənistan-Azərbaycan münaqişəsini törədən və qızışdıran SSRİ-nin o vaxtkı rəhbəri Mixail Qorbaçov olub. Mən 1999-cu ildə deputat olanda da, indi də təklif etmişəm ki, Qorbaçov beynəlxalq məhkəməyə verilsin. O, bu gün sağdır, ölsə belə, ölüsünü mühakimə etmək lazımdır”.

Qədim tarixə malik olan Azərbaycan xalqının əsrlərin sınağından həmişə üzüağ çıxdığını deyən Ə.Həsənov millətimizin illərin qan yaddaşına da neçə-neçə zəfərlər yazdığını vurğuladı: “Qanlı Yanvar hadisələri bir tərəfdən bizi kədərləndirsə də, digər tərəfdən də, düşünürük ki, xalqımız öz müstəqilliyi uğrunda canını, qanını verdi. Bu gün respublikamız öz iqtisadi qüdrəti ilə dünya dövlətlərinin diqqət mərkəzindədir. Şəhidlər Xiyabanı bizim and yerimiz, ziyarətgahımızdır. 20 Yanvar şəhidləri millətin qeyrət rəmzidir. Bu qeyrəti, vüqarı həmişə uca tutmaq bizim borcumuzdur”.

Tədbirdə Türkiyənin Azərbaycandakı səfirinin birinci müavini Nihat Civaner, millət vəkili Fuad Muradov, şair Məmməd Aslan və digər şəxslər çıxış etdilər.

Tədbirin sonunda şəhid ailələrinə yardımlar paylanıldı.

RƏFİQƏ KAMALQIZI

Səs.- 2010.- 20 yanvar.- S. 5.