Şəhidlərin xatirəsi anıldı

20 Yanvar əli silahsız xalqın torpaq, müstəqillik uğrunda apardığı azadlıq mübarizəsi idi

Yanvar faciəsinin bütün AMEA müəssisələrində qeyd olunması haqqında AMEA Rəyasət Heyətinin mövcud qərarına uyğun olaraq AMEA N.Tusi adına Şamaxı Astrofizika Rəsədxanasında faciə qurbanlarının xatirəsini anma mərasimi keçirildi. Mərasimdə çıxış edən rəsədxananın əməkdaşları bildirdilər ki, Azərbaycan tarixinə qara hərflərlə yazılmış 20 Yanvar faciəsi unudulmamalıdır. “Bu, əli silahsız xalqın torpaq, vətən, müstəqillik uğrunda apardığı azadlıq mübarizəsi idi”.

Tədbirdə çıxış edənlər vaxt ötdükcə hadisələrə daha düzgün qiymət verməyin mümkünlüyünü önə çəkərək, bizdən fərqli olaraq, ermənilər, bu münaqişəyə təşkilatlanmış formada, xaricdən onlara edilən dəstəklə başladığını ifadə etdilər. Qeyd olundu ki, o dövrdə Azərbaycan haqqında informasiya boşluğunun mövcud olması məsələni daha da mürəkkəbləşdirirdi. Azərbaycanlıların tarixi Azərbaycan torpaqları olan indiki Ermənistan ərazisindən qovulması barəsində bir kəlmə belə qeyd etməyən o vaxtkı SSRİ mətbuatı və ədəbiyyatında, əksinə, müntəzəm olaraq, “erməni əzabkeşliyi” işıqlandırılırdı.

Tədbirin sonunda çıxış edən Şamaxı Astrofizika Rəsədxanasının direktor müavini, fizika-riyaziyyat elmləri namizədi Elçin Babayev bildirdi ki, baş verən hadisə nə qədər təhlil olunsa da, hələ də bizə məlum olmayan qaranlıq məqamlar mövcuddur:”Lakin bir şey məlumdur ki, ermənilər və onların havadarları bu münaqişədə Azərbaycanı alətə çevirə bilmədilər”.

Rəsədxananın əməkdaşları Şəhidlər Xiyabanını ziyarət etdilər və şəhidlərin məzarları üzərinə gül dəstələri qoydular.

NƏZAKƏT

Səs.- 2010.- 20 yanvar.- S. 11.