“Azərbaycan və Avropa Şurası: insan hüquqları sahəsində əməkdaşlıq”

Azərbaycanın Avropa Şurasına üzv qəbul olunmasının 9-cu ildönümünə həsr olunan dəyirmi masa keçirildi

Dünən Ombudsman Aparatında Avropa İnsan Haqları Konvensiyasının 60 illiyinə və Azərbaycanın Avropa Şurasına üzv qəbul olunmasının 9-cu ildönümünə həsr olunmuş “Azərbaycan və Avropa Şurası: İnsan hüquqları sahəsində əməkdaşlıq” mövzusunda dəyirmi masa keçirildi. Tədbirdə dövlət və qeyri-hökumət təşkilatlarının nümayəndələri, Avropa Şurası baş katibinin Azərbaycandakı xüsusi nümayəndəsi Veronika Kotek, həmçinin, Azərbaycanda fəaliyyət göstərən digər beynəlxalq qurumların və KİV-in təmsilçiləri iştirak etdi.

Tədbirdə çıxış edən ombudsman Elmira Süleymanova bildirdi ki, Azərbaycan 2001-ci ilin yanvarın 25-də AŞ-nin tamhüquqlu üzvü seçilib. E.Süleymanovanını sözlərinə görə, 2001-ci il yanvarın 17-də Avropa Şurası Nazirlər Komitəsinin nümayəndələri səviyyəsində keçirilmiş iclasda Azərbaycanın bu təşkilata üzv qəbul olunması barədə qərar qəbul edilib. Bundan bir neçə gün sonra, yanvarın 25-də isə Avropa Şurasının binası önündə Azərbaycanın üçrəngli bayrağı qaldırıldı. Azərbaycanın bu təşkilata üzv qəbul olunması ilə Avropa strukturlarında mövqeyi gücləndi. Azərbaycan bununla da həqiqətlərini dünyaya bəyan etmək üçün daha bir beynəlxalq tribuna qazandı.

E.Süleymanova onu da bildirdi ki, hər hansı bir dövlət Avropa Şurasına qəbul olunarkən, üzərinə öhdəliklər götürür. Ombudsman onu da vurğuladı ki, hüquqi dövlət quruculuğu yolunda demokratik təsisatların inkişafını strateji hədəf kimi müəyyənləşdirən Azərbaycanın bir sıra beynəlxalq saziş və konvensiyalara qoşulub: “Şərqdə ilk dəfə olaraq, məhz Azərbaycan qətiyyətlə tarixi qərar verərək, ölüm hökmünü ləğv etdi. Bu gün Azərbaycan Avropa Şurasının inkişafına layiqli töhfəsini verib: “Azərbaycan artıq Avropa ailəsində özünə möhkəm yer tutmuş və burada kifayət qədər böyük nüfuz sahibidir. Azərbaycan nümayəndə heyətinin Avropa Şurası Parlament Assambleyasındakı 9 illik fəaliyyəti də bunu aydın göstərir. Bu, ölkəmizin beynəlxalq imicini möhkəmləndirməklə bərabər, həm də Ermənistanın təcavüzkar siyasətini ifşa etməyə, saxta erməni təbliğatının qarşısını almağa imkan yaratdı”.

Tədbirdə Avropa Şurası baş katibinin Azərbaycandakı xüsusi nümayəndəsi Veronika Kotek isə bildirdi ki, Azərbaycanla AŞ arasında əməkdaşlıq 1996-cı ildə başlayıb və hazırda uğurla davam edir: “Üzv dövlətlər ölkədaxili insan haqlarının vəziyyətini daha da yaxşılaşdırmağa cəhd göstərməlidir. Beynəlxalq təşkilat olaraq, biz bu məsələdə məsuliyyət daşımırıq. Əsas məsuliyyət ölkələrin öz üzərinə düşür. İnsan haqlarının pozuntusu ilə bağlı daxil olan müraciətlər tam şəkildə araşdırılmalıdır”.

Tədbirdə Baki Dövlət Universitetinin professoru Əmir Əliyev “Avropa Şurasının insan hüquqları sahəsində standartların Azərbaycan Respublikasının qanunvericilik sistemində implementasiyası”, Xarici İşlər Nazirliyinin İnsan Hüquqları, Demokratikləşdirmə və Humanitar Problemlər İdarəsinin rəisi Əlimirzamin Əskərov “Avropa Şurasının Azərbaycanın xarici siyasətində yeri” və Milli QHT Forumunun İdarə Heyətinin sədri Aydın Kərimov “Azərbaycan-Avropa Şurası əməkdaşlığının inkişafında qeyri-hökumət təşkilatlarının rolu” mövzusunda məruzə ilə çıxış etdilər.

RƏFİQƏ KAMALQIZI

Səs.- 2010.- 26 yanvar.- S. 8.