Heydər Əliyev Fondu uşaq hüquqlarının qorunması üçün geniş işlər görür

Heydər Əliyev Fondunun prezidenti, Milli Məclisin deputatı Mehriban Əliyeva bu sahəyə böyük diqqət göstərir

Uşaq hüquqlarının tam həcmdə təmin edilməsi, uşaq problemlərinin ardıcıl həlli ölkəmizdə bu sahədə həyata keçirilən dövlət siyasətinin prioritet istiqamətlərindən biridir. Təsadüfi deyildir ki, dünyada hökm sürən qlobal iqtisadi böhran fonunda Azərbaycan Prezidenti İlham Əliyev 2009-cu ili “Uşaq ili” elan etmişdir. Bu, dövlət başçısının Azərbaycanın gələcəyi olan uşaqlara diqqət və qayğısının nəticəsidir. Uşaqlar cəmiyyətimizin ən zərif hissəsidir. Onlara uşaqlıqda göstərilən qayğı və məhəbbət gələcək fiziki sağlamlığın, mənəvi saflıq və zənginliyin rəhni kimi qəbul edilir. Azərbaycan cəmiyyəti tarixən uşaqlara ən xoş münasibət və qayğının örnəyi olmuşdur. Bu gün uşaqların sağlam mühitdə böyüməsi və tərbiyə olunması, müvafiq standartlara cavab verən təhsil müəssisələrində oxuması üçün hər cür şərait yaradılmışdır.

Uşaqların keyfiyyətli təhsil və yüksək dünya standartlarına cavab verən tibbi xidmətlərlə təmin edilmələri, hərtərəfli qayğı ilə əhatə olunmaları, onlar üçün zəruri şəraitin yaradılması, böyüməkdə olan nəslin şəxsiyyət, layiqli vətəndaş kimi formalaşması Azərbaycanda dövlət uşaq siyasətinin ulu öndərimiz Heydər Əliyevin ənənələrindən irəli gələn başlıca prinsiplərindəndir.

Müasir dövrümüzdə Prezident İlham Əliyev və ölkəmizin birinci xanımı, Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban Əliyevanın uşaq məsələlərinə diqqəti bu sahəyə qayğının daha da artması ilə nəticələnmişdir. Heydər Əliyev Fondu uşaqların hərtərəfli inkişafı, onların müasir tələblərə uyğun təhsil və tibbi xidmətlərlə təmin olunması, uşaq problemlərinin həlli istiqamətində mühüm layihələr həyata keçirir.

BMT-nin Uşaq Hüquqları Konvensiyası ilə əlaqədar Azərbaycanda “Uşaq hüquqları haqqında” qanunun qəbul edilməsi ilə bağlı ötən illər ərzində milli qanunvericilik və normativ hüquqi aktlar mütəmadi olaraq təkmilləşdirilmiş, uşaq hüquqlarının müdafiəsinə yönəlmiş bir çox dövlət proqramları qəbul edilmişdir. Hazırda ölkəmizdə uşaq problemlərinin həllinə yönəlmiş onlarla Dövlət Proqramı həyata keçirilməkdədir.

Uşaq problemləri sahəsində digər məsələlərin həllinə ictimaiyyətin, o cümlədən, qeyri-hökumət təşkilatlarının, özəl sektorun, beynəlxalq təşkilatların cəlb edilməsi də qarşıda duran vəzifələrdəndir. Regionlarda sağlam həyat tərzi ilə bağlı kütləvi maarifləndirmə işlərinin aparılması da çox vacib məsələlərdən birinə çevrilib. Uşaq hüquqlarının tam şəkildə reallaşması, hər bir uşağın öz potensialını göstərə bilməsi üçün mükəmməl hüquqi baza yaradılmışdır.

Azərbaycanda təhsilin inkişafı, gənclərimizin sağlam və savadlı böyüməsi Heydər Əliyev Fondunun siyasətinin prioritet istiqaməti olduğundan bu sahədə fondun təşəbbüsü ilə həyata keçirilən “Uşaq evləri və internat məktəblərinin inkişafı”, “Yeniləşən Azərbaycana yeni məktəb” proqramları və “Təhsilə dəstək” layihəsi ölkəmizdə təhsilin keyfiyyətcə yeni mərhələyə yüksəlməsinə gətirib çıxarmışdır.

Bakıda Heydər Əliyev Fondu, Ailə, Qadın və Uşaq Problemləri üzrə Dövlət Komitəsi və “Nur” Uşaq və Gənclərin İctimai Birliyinin təşəbbüsü ilə Azərbaycan uşaqlarının forumunun keçirilməsi “Uşaq ili”nin yekunlarına və BMT-nin Uşaq Hüquqları Konvensiyasının 20 illiyinə həsr olunmuşdur. Forumda respublikanın müxtəlif bölgələrindən 250-dən çox uşaq iştirak etmişdir. Uşaqların özlərinin aparıcılıq etdikləri forumda onları maraqlandıran bütün məsələlər geniş müzakirə olunmuşdur.

BMT-nin Uşaq Hüquqları Konvensiyası uşaq hüquqlarının hərtərəfli müdafiəsini əhatə edən beynəlxalq sənəddir. Artıq Azərbaycan dövləti BMT-nin müvafiq komitəsinə 4 dövri hesabatı təqdim etmişdir. Bu, Uşaq Hüquqları Konvensiyasının 20-ci ildönümündə respublikamızda həmin sahəyə diqqətin daha da artmasının göstəricisidir. Azərbaycan hökumətinin BMT ilə birgə “Azərbaycanda uşaqların müdafiəsi islahatı” mövzusunda keçirdiyi konfrans bu istiqamətdə görülən işlərə güclü təkan vermişdir. Uşaqları düşündürən ən mühüm mövzular ətrafında ekspertlərin iştirakı ilə müzakirələr aparılmış, təqdimatlar keçirilmişdir.

Heydər Əliyev Fondunun təşəbbüsü ilə Lənkəran şəhərindəki internat məktəblərində “Uşaq ili” çərçivəsində “Uşaqlar bizim gələcəyimizdir” devizi altında keçirilən tədbirdə də ölkəmizdə uşaqların sağlam, hərtərəfli, vətənə layiqli övladlar kimi böyümələri üçün hər cür şərait yaradılmasından söz açılmışdır. Heydər Əliyev Fondunun prezidenti Mehriban xanım Əliyeva Lənkəran şəhərinin uşaq evlərində tərbiyə və təhsil alan, valideyn himayəsindən məhrum olan uşaqlara daim qayğı göstərir. Məhz Heydər Əliyev Fondunun təşəbbüsü ilə rayonda olan iki internat məktəbi əsaslı təmir edilmiş, lazımi avadanlıq, mebel və məktəb ləvazimatları ilə təmin edilmişdir.

Fondun prezidenti Mehriban xanım Əliyevanın təşəbbüsü ilə Əzizbəyov rayonunda, o cümlədən, Qala qəsəbəsində geniş abadlıq və quruculuq işlərinin aparılmasını da qeyd etməliyik. Məlum olduğu kimi qəsəbədə fəaliyyət göstərən yeganə uşaq bağçası çox köhnə və tam yararsız vəziyyətdə olan binada yerləşirdi. Heydər Əliyev Fondunun təşəbbüsü ilə uşaq bağçası üçün yeni 100 yerlik bina tikilmişdir. İndi müasir tələblərə tam cavab verən yeni binada uşaqlar üçün hər cür şərait yaradılmışdır. Buraya gələn balacalar bağçanın astanasında ikən nağıllar dünyasına düşürlər. Həyətdə dekorativ gül və ağac kolları əkilmiş, uşaq meydançasında gözəl oturacaqlar və yelləncəklər qurulmuşdur. Bağçada mərkəzləşdirilmiş nəzarət sistemi qurulmuş, müşahidə kameraları vasitəsilə bağçanın hər bir nöqtəsi izlənilir, balacaların təhlükəsizliyi təmin edilir. Bu bağçanı digərlərindən yeni layihə əsasında inşa olunması fərqləndirir.

Heydər Əliyev Fondunun dəstəyi, Bakı şəhəri üzrə Baş Təhsil İdarəsi və Əzizbəyov rayon İnkişaf Fondu tərəfindən “Təhsilə dəstək” layihəsi çərçivəsində təşkil edilmiş olimpiada şagirdlərin Azərbaycan dili və ədəbiyyatı, ingilis dili, Azərbaycan tarixi və riyaziyyat fənləri üzrə biliklərinin aşkar etdirilməsinə təsirini göstərmişdir. Ötən ilin son ayında Heydər Əliyev Fondunun təşəbbüsü ilə Şamaxı şəhərində inşasına başlanılan Nəsimi adına Uşaq İncəsənət Məktəbi binasının təməlqoyma mərasimi rayon sakinləri üçün əsl bayrama çevrilmişdir. Ümumilikdə, burada müasir avadanlıqla təchiz ediləcək 54 otaq fəaliyyət göstərəcəkdir. Məktəbin həyətində yaşıllaşdırma və abadlıq işləri aparılacaqdır. Üçmərtəbəli müasir incəsənət məktəbi binasının tikintisinin 2010-cu ildə başa çatdırılması nəzərdə tutulmuşdur.

Diabetli uşaqlara qayğı da Heydər Əliyev Fondunun fəaliyyətində mühüm yer tutur. Fondun dəstəyi ilə “Diabetli uşaqlara ən yüksək qayğı” layihəsi çərçivəsində ölkədə diabet xəstəliyindən əziyyət çəkən 14 yaşınadək uşaqlar müntəzəm olaraq insulin preparatları və şpris-qələmlərlə təmin edilmişlər. Heydər Əliyev Fondunun həyata keçirdiyi “Diabetli uşaqlara ən yüksək qayğı” layihəsi çərçivəsində Lənkəran şəhərindəki “Qafqaz” sahil otelində şəkərli diabetli uşaqların psixo-sosial reablitasiyası məqsədilə istirahət düşərgəsi də təşkil olunmuşdur. Düşərgədə əlil, Qarabağ müharibəsi əlili, məcburi köçkün və qaçqın ailələrindən, valideyn himayəsindən məhrum, şəkərli diabet xəstəliyindən əziyyət çəkən iki və daha çox uşaqlı ailələrdən olan 30 uşağa 4 həkim-diabetoloq, 5 müəllim və 2 psixoloq xidmət göstərmişdir. Düşərgədə uşaqlar müxtəlif idman yarışları və əyləncəli oyunlar keçirmiş və sosial-psixoloji yardım almışlar. Sonda düşərgənin bağlanış mərasimi keçirilmişdir.

Fond hər zaman əməkdaşlığa hazır olan bir təşkilatdır. Heydər Əliyev Fondu ölkə xaricində - Rusiya və Gürcüstanda yaşayan azərbaycanlı şagirdlər üçün də lazımi tədbirlər həyata keçirir. Bu baxımdan da Heydər Əliyev Fondunun gördüyü işlər sırf Azərbaycanı əhatə etmir. Onun layihələrinin coğrafi məkanı genişdir. Belə ki, gürcüstanlı soydaşlara, bütün sahələrdə olduğu kimi, təhsil səviyyəsinin müasir tələblərlə ayaqlaşması baxımından da yardımını əsirgəmir. Fondun təşəbbüsü və dəstəyi ilə Kvemo Kartli-Borçalı bölgəsinin Dmanisi şəhərində Heydər Əliyev adına fondun bilgisayar mərkəzində rayon şagirdləri arasında bilik yarışı keçirilmişdir. Yarışda Dmanisidəki azərbaycandilli məktəblərlə yanaşı, rayonun gürcü məktəblərinin şagirdləri də iştirak etmişlər.

Respublikamızın Niderland Krallığındakı səfirliyində bu ölkədə fəaliyyət göstərən Azərbaycan məktəblərinə Heydər Əliyev Fondu tərəfindən hazırlanmış hədiyyələrin təqdimat mərasimi də bu qəbildən olan layihələr çərçivəsində həyata keçirilmişdir.

Heydər Əliyev Fondu tərəfindən həyata keçirilən hər bir layihənin əsasında Azərbaycanın gələcəyi olan uşaqların gələcəyini təmin etmək və sağlam ruhlu, düşüncəli uşaqları yetişdirməkdir.

Nəzakət ƏLƏDİNQIZI

Səs.- 2010.- 27 yanvar.- S. 7.