Uğurlu enerji siyasəti müsbət nəticəsini verməkdədir

Azərbaycan öz enerji təhlükəsizliyini tam şəkildə təmin edəcək

Azərbaycan dövlətinin apardığı enerji siyasəti nəticəsində ölkə yeni tarixi mərhələyə qədəm qoyubdur. Belə ki, qloballaşan dünyada artan neft gəlirləri dövlətlərin iqtisadi siyasətinin müəyyənləşdirilməsində həlledici rol oynayır. Neftlə zəngin Azərbaycan iqtisadiyyatını daha da inkişaf etdirmək məqsədi ilə bu gəlirlərdən səmərəli istifadə edilir. Məhz buna görə də, Azərbaycan Prezidenti İlham Əliyev ölkənin daxili enerji tələbatının təmin edilməsinə xüsusi əhəmiyyət verir. “Azərbaycanın çox güclü energetika potensialı olacaqdır. Azərbaycan öz enerji təhlükəsizliyini tam şəkildə təmin edəcəkdir” - deyən dövlət rəhbəri bəyanatlarını bu məqsədə xidmət edən müəssisələrin açılışı ilə sübuta yetirir.

Xüsusilə, müasir tipli modul elektrik stansiyalarının tikilib istifadəyə verilməsi bunun bariz nəticəsidir. Məlum olduğu kimi, ölkənin elektrik stansiyalarında ildə orta hesabla 20,2 milyard kilovatt/saat artıq elektrik enerjisi istehsal olunur. Bu da respublikada elektrik enerjisinə olan tələbatın tam təmin olunması deməkdir. Müasir “Şimal” elektrik stansiyasının istifadəyə verilməsi və respublikanın müxtəlif bölgələrində 7 modul tipli elektrik stansiyasının tikilməsi, sistem əhəmiyyətli elektrik veriliş xətlərinin və yarımstansiyaların quraşdırılması energetika sahəsində yeni yüksəlişin başlanğıcını qoydu.

Məlum olduğu kimi, ölkə Prezidentinin tapşırığına əsasən, respublikanın qaz almayan rayonlarının təchizatının bərpası istiqamətində də işlər davam etdirilir. Hazırda ölkənin qazlaşdırılması 85 faizə çatdırılıb, bütün rayon mərkəzlərinin qazla təchizatı təmin olunubdur. 13 illik fasilədən sonra Naxçıvana təbii qazın verilməsi, ölkənin ən ucqar bölgələri sayılan Lerik və Yardımlı rayonlarının qazlaşdırılması başa çatdırılıb, həmin rayon mərkəzlərinə təbii qaz verilibdir. Həyata keçirilən tədbirlər sayəsində qazla təmin olunan əhali abunəçilərinin sayı 1 milyon 143 mini keçərək, rayonların sayı isə 54-ə yaxındır. Beləliklə də, əlavə olaraq, 268 min 172 əhali abunəçisinin və 19 inzibati-ərazi bölgəsinin qazla təminatı bərpa edilibdir.

Hazırda Azərbaycan özünü elektrik enerjisi, neft və qazla tam təmin edir. İqtisadiyyatın məhz bu real sektoru vasitəsilə ölkə təkcə öz regionuna deyil, həm də daha uzaq qonşularına, məsələn, Avropa İttifaqı ölkələrinə sabitləşdirici təsir göstərir. Prezident İlham Əliyevin vurğuladığı kimi, indi qarşıda duran ən mühüm vəzifə neft gəlirlərinin səmərəli istifadəsini təmin etməklə qeyri-neft sektorunun inkişafını sürətləndirmək və sosial problemləri həll etməkdir. Bu gün Azərbaycan Avropanın enerji təhlükəsizliyində mühüm rol oynayır. Avropa Birliyi ilə Azərbaycan arasında enerji məsələləri üzrə strateji tərəfdaşlığa dair anlaşma memorandumunun imzalanması bunun bariz nümunəsidir. Artıq “Şahdəniz” yatağından qazın hasilatına başlanılıb və hazırda yataqdan gün ərzində 23 milyon kubmetr qaz, 6 min ton kondensat hasil olunur. Ölkəmiz hər il Rusiyadan alınan 5 milyard kubmetrə qədər idxal qazından azad olmuş, əhalinin və iqtisadiyyatın bütün sahələrinin ehtiyacını tam ödəməklə bərabər xeyli qaz ixrac potensialı yaradıb.

2010-cu ilin dövlət büdcəsi isə Azərbaycanın keyfiyyətcə yeni mərhələdə davamlı inkişafı üçün yaxşı imkanlar açır. Büdcə layihəsi hazırlanarkən dövlətin inkişafı üçün elmi əsaslar üzərində müəyyən edilmiş strateji xəttə uyğun olaraq dövlət büdcəsinin sosial və investisiya yönümlülüyünün təmin edilməsinə, əhalinin aztəminatlı təbəqəsinin sosial təminatının gücləndirilməsinə, ölkənin müdafiə potensialının, iqtisadi, enerji, ərzaq təhlükəsizliyinin möhkəmləndirilməsinə, sahibkarlığın inkişafına dəstək verilməsinə, qəbul olunmuş məqsədli dövlət proqramlarının maliyyələşdirilməsinə xüsusi diqqət yetirilibdir. Sosialyönümlü xərclərin büdcədəki xüsusi çəkisi 34,4 faiz (3 milyard 878 milyon manat) olmaqla cari illə müqayisədə 1,8 faiz çoxdur.

Azərbaycanda sahibkarlığın inkişafı, biznes mühitinin təkmilləşdirilməsi istiqamətində aparılan islahatlar beynəlxalq təşkilatlar tərəfindən yüksək qiymətləndirilir. Respublikanın sosial-iqtisadi həyatında regionların rolu yüksəldikcə, bütövlükdə, sahibkarlığın, sərmayə mühitinin yaxşılaşması üçün yeni imkanlar açılır. “Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı”nda sahibkarlığa dövlət tərəfindən maliyyə dəstəyinin gücləndirilməsinə xüsusi diqqətin yetirilməsi, ölkənin sahibkarlıq subyektlərinə ayrılan vəsaitin həcminin artırılması da təqdir olunur. Xatırlatmaq yerinə düşər ki, birinci regional inkişaf proqramının icrası dövründə Sahibkarlığa Kömək Milli Fondunun vəsaitləri hesabına ölkə üzrə 6,991 sahibkarlıq subyektinə, ümumilikdə, 323,4 milyon manat kredit verilibdir.

Azərbaycan iqtisadiyyatının digər xarakterik xüsusiyyətlərindən biri də investisiya fəallığının yüksək olması ilə bağlıdır. Ümumilikdə, son 10 ildə Azərbaycan iqtisadiyyatına 33 milyard dollardan çox investisiya cəlb edilib. Bu gün investisiyaların ümumi həcmində daxili sərmayələrin xüsusi çəkisi 34,3 faiz təşkil edir. Bu, yerli investorların potensialının güclənməsinin, sərmayə qoymaq imkanlarının genişlənməsinin əyani göstəricisidir.

RƏFİQƏ KAMALQIZI

Səs.- 2010.- 27 yanvar.- S. 7.