“2 Fevral Gənclər Günü ulu öndər Heydər Əliyevin gənclərimizə hədiyyəsidir”

“SƏS” qəzetinin redaksiyasında gənclər gününə həsr olunmuş növbəti dəyirmi masa keçirildi

(Əvvəli ötən sayımızda)

Ənənəvi olaraq müxtəlif mövzular ətrafında dəyirmi masalar təşkil edən “SƏS” qəzeti budəfəki dəyirmi masanın mövzusunu da 2 Fevral Gənclər Gününə həsr etdi. Dəyirmi masada dövlət qurumlarının əməkdaşları, siyasi partiyaların gənclər birliklərinin rəhbərləri, QHT nümayəndələri, Azərbaycan Respublikası Ailə, Qadın və Uşaq Problemləri üzrə Dövlət Komitəsinin sektor müdiri Vəsilə Möhsümova, Azərbaycan Respublikasının İnsan Hüquqları üzrə Müvəkil (Ombudsman) Aparatının Hüquqi Maarifləndirmə Sektorunun baş məsləhətçisi Rəşid Rumzadə və böyük məsləhətçisi Faiq Ağayev, Yeni Azərbaycan Partiyasının Qaradağ rayon təşkilatının gənclər birliyinin sədr müavini Elçin Çobanov, Azad Respublikaçılar Partiyasının gənclər birliyinin sədri İlqar Abbasov, Azərbaycan Demokrat Partiyasının sədr müavini Vüsal Əliyev, Vəhdət Partiyasının gənclər birliyinin sədr müavini Tural Zayıdoğlu, Ana Vətən Partiyasının Gənc Anavətənçilər Assambleyasının sədri Fərid Mustafazadə və Demokratik İslahatlar Partiyasının gənclər birliyinin sədri Ramin Hacılı iştirak edirdilər.

Dəyirmi masanı giriş sözü ilə açan “SƏS” qəzetinin əməkdaşı bildirdi ki, hər il fevralın 2-si ölkədə gənclər günü kimi qeyd olunur. Bu bayramın gənclərə ümummilli liderimiz Heydər Əliyevin hədiyyəsi olduğunu söyləyən qəzetin əməkdaşı onu da qeyd etdi ki, ulu öndərimiz gəncliyimizi hər mənada güclü görmək istəyirdi və bunun üçün əlindən gələni edirdi: “Gənclik bir millətin yaşaması və inkişafı üçün təməl daşıdır. Bunun möhkəm olması isə yetişən nəslin sağlam təfəkküründən, düşünmə qabiliyyəti və inadkarlığından asılıdır. Səbəbsiz deyil ki, bütün dövrlərdə millətinin adını tarixə yazan da elə sağlam gənc qüvvələr olub. Bunu bilən ümummilli liderimiz Heydər Əliyev də belə qüvvələri yaratmaq arzusunda idi. Elə ona görə də, 1994-cü ilin iyulunda Gənclər və İdman Nazirliyi yaratdı və xalqının gənclərini bir araya topladı. 1996-cı il fevralın 2-də isə ilk dəfə müstəqil dövlətin gənclər forumu keçirildi və elə həmin günü Azərbaycanın tarixinə gənclər günü kimi yazdı”.

SİYASİ ƏQİDƏSİNDƏN ASILI OLMAYARAQ, BÜTÜN GƏNCLƏRİMİZ AZƏRBAYCAN NAMİNƏ BİRLƏŞMƏLİDİR

Vüsal Əliyev:

- Mən xatırlayıram, ali məktəbdə təhsil aldığım illərdə tələbələr siyasi mənsubiyyətindən asılı olmayaraq, çox aktiv idi. Lakin bu gün tələbə olan hər bir kəs, eyni zamanda, Yeni Azərbaycan Partiyasına üzv olur. Bilirik ki, gənclər müstəqilliyi sevəndir. Bu yaş qrupunda olan insanlar müstəqil olmağı və müstəqil fikir söyləməyi bəyənir. Bu gənclərin müstəqilliyi əlindən alındıqdan sonra göstərilən istiqamətə doğru yönəlir. Təbii ki, dövlətin gənclərə verdiyi dəstək müsbət haldır. Bu gün gənclərimizin siyasətdən, milli-mənəvi dəyərlərimizdən uzaqlaşaraq, şou-biznesə meyil etməsinin bir sıra səbəbləri var. Ona görə ki, gənclər arasında qarşılıqlı fikir anlayışı yoxdur. Hesab edirəm ki, siyasi əqidəsindən asılı olmayaraq, bütün gənclərimiz Azərbaycan naminə birləşməlidir. Türkiyə istisna olmaqla, ətrafımızdakı heç bir dövlət bizə qardaş deyil. Məsələn, Rusiya və İran üçün Azərbaycan gənclərinin öz Vətənini sevib-sevməməsi o qədər də önəmli deyil. Ermənistanın da Azərbaycana qarşı münasibəti bəllidir. Türkiyə ilə Ermənistan sərhədlərinin açılması məsələsinə görə, az qala bu ölkə ilə də münasibətlərimiz pisləşirdi. Bu da Azərbaycanı istəməyən qüvvələrin yeritdiyi siyasət idi. Məsələyə gənclərin mövqeyi birmənalı olmasa da, mən bunun tamamilə əleyhinəyəm. Bu gün biz nə qədər Avropadan danışsaq da, bilməliyik ki, Avropa bizə çox uzaqdadır. Amma Türkiyəyə inteqrasiya etməyimiz daha asan və məqbuldur.

GƏNCLƏRİMİZ ÖZ QƏRARINI SƏRBƏST ŞƏKİLDƏ VERİR

İlqar Abbasov:

- Gənclər cəmiyyətin aparıcı qüvvələri olaraq həmişə ön sıralarda gediblər. İstər dövlət strukturlarında, istərsə də digər sahələrdə onlar öz müstəqil fikirlərini cəmiyyətə çatdırmağı bacarıblar. Azərbaycanda heç kimi hansısa siyasi partiyaya üzv olmağa məcbur etmək olmaz. Gənclərimiz öz qərarını sərbəst şəkildə verir. Bu, belə də olmalıdır. Çünki hər bir dövlətin formalaşmasında gənclərin rolu çox böyükdür. Bilirik ki, Prezident cənab İlham Əliyev gənclərimizin inkişaf etmiş ölkələrdə təhsil almaları üçün onları hər cür maddi şəraitlə təmin edib. Gənclər də çalışmalıdır ki, onlara göstərilən etimadı doğrultsun və savadlı, bilikli, potensiallı gənclər olaraq Vətənə qayıtsınlar. Bu gün gənclərin olduqları yer onların müstəqil seçimidir. Heç bir tələbə məcburi surətdə YAP-a üzv olmur. Partiya sıralarına daxil olmaq onların öz istəyinin ifadəsidir.

Elçin Çobanov:

- Azərbaycanda demokratik mühitin mövcudluğunun bariz nümunəsinin biri sizsiniz, biri mən (Vüsal Əliyevə müraciətlə). Çünki hər ikimiz eyni universiteti bitirmişik. Siz müxalifət partiyasının üzvüsünüz, mən isə hakim Yeni Azərbaycan Partiyasının üzvüyəm. Qeyd edim ki, mən YAP-a tələbə vaxtı üzv olmamışam ki, burada hər hansı məcburiyyətdən söhbət belə gedə bilməz. Ali məktəbi bitirdikdən sonra öz şəxsi istəyim nəticəsində partiyaya üzv olmuşam. Təbii ki, sizin ADP-yə üzv olmağınız da öz şəxsi seçiminizdir. Azərbaycanın qonşu dövlətlərlə münasibətlərinə gəldikdə isə, təbii ki, heç bir qonşu dövlət öz mənafeyini bizə qurban verə bilməz. Məsələn, qazı baha satmaq Azərbaycana, ucuz almaq isə Rusiyaya sərf edir. O heç vaxt fikirləşməyəcək ki, Azərbaycan mənim qonşumdur və mən ona güzəştə getməliyəm. Təbii ki, qiymətlərdə razılaşmalar olacaq. Ancaq yenə də hər bir dövlət öz mənafeyini güdür və ona uyğun addımlar atır. Düzdür, Türkiyə-Ermənistan sərhədlərinin açılması məsələsində müəyyən ajiotajlar oldu. Göründüyü kimi, bunun heç bir nəticəsi olmadı. Azərbaycan və Türkiyə rəhbərlərinin birgə səyləri nəticəsində problem aradan qaldırıldı. Sevindirici haldır ki, hər iki ölkə rəhbəri bir-birinə qardaş deyə müraciət edir. Bu da dövlətlərimizin nə qədər yaxın olduğunu göstərir. Təbii ki, bir gənc olaraq, Azərbaycanın qonşu dövlətlərlə sıx əməkdaşlıq münasibətlərinin qurulmasında maraqlıyam. Hətta Dağlıq Qarabağ münaqişəsi öz müsbət həllini tapdıqdan sonra Ermənistanla da əməkdaşlıq münasibətlərinin qurulması mümkündür.

Fərid Mustafazadə:

- Mən Bakı Dövlət Universitetinin məzunuyam. Təhsil aldığım müddətdə gənclərin siyasi mənsubiyyətinə görə təzyiqlərə məruz qaldığının şahidi olmamışam. BDU böyük tələbə kütləsinə malik universitetdir. Əgər orada belə bir hadisəyə rast gəlməmişəmsə, demək, digər dövlət ali məktəblərində də bu hallar baş vermir.

Tural Zayıdoğlu:

- Ölkəmizdə gənclərin hərtərəfli fəaliyyətinə münbit şərait yaradılır. Qeyd edim ki, ötən il keçirilən bələdiyyə seçkilərində də gənclərə və qadınlara geniş yer verildi. Hər bir dövlətin inkişafında onun gənclərinin böyük rolu var. Gənclərin dövlət idarələrində, ictimai təşkilatlarda fəaliyyət göstərməsi həmin dövlətin inkişafına müsbət töhfədir.

“Səs” qəzetinin əməkdaşı:

- Gənclərin beynəlxalq təşkilatlarla, xarici ölkələrin hakim partiyalarının gənclər birlikləri ilə əlaqələrinin qurulması onların fəaliyyət istiqamətində mühüm yer tutur. Siz gənclərin bu yöndə fəaliyyəti nədən ibarətdir?

AZƏRBAYCAN GƏNCLƏRİNİN GƏLƏCƏYİNƏ NİKBİN BAXIRAM

Ramin Hacılı:

- Mən Demokratik İslahatlar Partiyasından öncə, “Dalğa” gənclər hərəkatında fəaliyyət göstərmişəm. Bu illər ərzində həm Avropa Liberal Gənclər Assosasiyası ilə, həm də Dünya Liberal Gənclər Konfederasiyası ilə əməkdaşlığımız olub. Hazırda həmin təşkilatın üzvüyük. DİP olaraq, eyni zamanda, Dünya Demokratlar Hərəkatının üzvüyük. Mən həmin hərəkatın sammitlərində dəfələrlə iştirak etmişəm. Onların dünya miqyasında “Demokrat” adlı jurnalı çıxır. Həmin jurnalın Azərbaycan üzrə yazarlarından biriyəm. Yazdığım yazılar vasitəsilə Azərbaycanda baş verən hadisələri dünyaya olduğu kimi çatdırmağa çalışıram. Mən düşünmürəm ki, hər hansı bir gənc Azərbaycanı bazara çıxarıb sata bilsin və ya belə bir təşəbbüslə çıxış etsin. Kimin haradan qrant alması bugünkü dəyirmi masanın müzakirəsi deyil. Mən özümə inandığım üçün Azərbaycan gənclərinə də inanıram. Hər kəsə öz qardaş-bacım kimi yanaşıram. Əgər kimsə hansısa təşkilatdan qrant alırsa, onun qeybətini etməməliyik. Onun Azərbaycana nə qədər düşmən olduğunu, dünyaya aidiyyatı olmayan əxlaqsız ölkələrə meyillənməsini ifşa etməməli və onların həbs olunmasına çalışmamalıyıq. Ona qalsa, Azərbaycana qarşı hər zaman müstəmləkəçilik siyasəti yürüdən ölkələr olub. Onlarla əməkdaşlıq ediriksə, digər ölkələrlə də əməkdaşlığa müsbət baxmalıyıq.

Hesab edirəm ki, Azərbaycan hakimiyyətinin xarici ölkələrlə kifayət qədər normal əlaqələri var. Rusiya və İran kimi dövlətlər Azərbaycanı Avropadan ayırmağa, xüsusilə də, ölkəmizdə Azərbaycana xas demokratik dəyərlərin yayılmasının qarşısını almağa çalışırlar. Ona görə ki, Azərbaycanda ilk dəfə qadınlara səsvermə hüququ verilib və onlara istədikləri fəaliyyətlə məşğul olmağa imkan yaradılıb. Bütün bunlar, onu göstərir ki, Azərbaycan heç də avtoritar, İran qanunlarına meyilli bataqlıqda olmaq istəyən insanlar toplusu deyil. Azərbaycan daha çox bəşəri, bir-birinin haqqını tanıyan, sevgi ilə yanaşan insanların Vətənidir. Bu baxımdan, biz özümüzə güvənməli və inanmalıyıq. Çalışmalıyıq ki, azadlığımız olsun və bu azadlığımızı heç nəyə qurban verməyək. Azərbaycan gənclərinin gələcəyinə nikbin baxıram.

AZƏRBAYCAN GƏNCİ OLARAQ, BU DÖVLƏTƏ İNANIRAM

Elçin Çobanov:

- Mən bu dövlətdə yaşayıramsa, demək ki, bu dövlətə güvənirəm. Əgər kimsə həbs olunubsa, demək ki, o, hüquq pozuntularına yol verib və bu hüquqi cəhətdən sübut olunub. Təbii ki, mən qloballaşmanın tərəfdarıyam. Lakin qloballaşma prosesində milli-mənəvi dəyərlərə sadiqlik mühüm əhəmiyyət kəsb edir.

Faiq Ağayev:

- Ombudsman Aparatı yaşından asılı olmayaraq, ona ünvanlanan müraciətləri cavabsız qoymur. Bu müraciətlərlə bağlı dərhal araşdırma aparır, müvafiq tədbirlər görür. Məsələn, bir neçə ay bundan öncə, müsavatçı gənclər metrodakı qiymət artımı ilə əlaqədar etiraz aksiyası keçirmişdi və bu zaman onlar saxlanılmışdı. Biz dərhal həmin gənclərlə görüşə getdik. Onların problemlərinin həlli ilə bağlı tədbirlər gördük. Hər kəsə eyni qaydada hüquqi köməklik göstəririk. Bizim üçün şikayət verən şəxsin siyasi mənsubiyyəti əhəmiyyətli deyil.

(Ardı var)

KÜBRA ƏLİYARLI, SEVİNC NƏZƏROVA

Səs.- 2010.- 29 yanvar.- S. 8-9.