YAP Gənclər Birliyi 31 mart soyqırımı ilə bağlı aksiyalar keçirib

Aksiyalarda paylanan bukletlərdə ermənilərin azərbaycanlılara qarşı həyata keçirdiyi soyqırımı haqda məlumatlar və şəkillər yer alıb

Dünən Yeni Azərbaycan Partiyası (YAP) Gənclər Birliyinin üzvləri Bakı şəhərinin müxtəlif yerlərində 31 Mart Azərbaycanlıların Soyqırımı ilə bağlı aksiya keçiriblər. Partiyanın gənc üzvləri 31 mart soyqırımı ilə bağlı hazırlanmış bukletləri paytaxt sakinlərinə paylayıblar.

Bukletlərdə 1918-ci ildə ermənilərin Azərbaycanda yaşayan xalqlara qarşı törətdiyi qətliamların şəkilləri və məlumatlar yer alıb. Aksiya şəhərin mərkəzi və kənar hissələrində, həmçinin, metro stansiyalarının qarşısında keçirilib. YAP GB üzvlərinin bildirdiyinə görə, aksiyada məqsəd əhalinin, xüsusilə də, gənclərin diqqətini 1918-ci ildə ermənilərin xalqımıza qarşı törətdiyi cinayətin bir daha xatırladılmasından ibarətdir.

Nizami rayon YAP Gənclər Birliyi üzvləri tərəfindən Nizami rayon ərazisində keçirilən aksiyada müxbirlərimiz də iştirak edib. Bukletlər paylanarkən 31 Mart Azərbaycanlıların Soyqırımı Günü haqqında əhaliyə ətraflı məlumat verilib. Hadisə zamanı ermənilər tərəfindən törədilən vəhşiliklər, insanların başına gətirilən müsibətlər haqqında məlumat bukletlərdə göstərilib. Azərbaycanlıların erməni daşnakları tərəfindən amansızcasına soyqırıma məruz qalması faktları əhali arasında böyük kədər hissi ilə qarşılanıb.

YAP GB-nin Nizami rayon təşkilatının sədri Əli Pənahovun SİA əməkdaşına bildirdiyinə görə, belə tədbirlərin gələcəkdə daha çox həyata keçirilməsi nəzərdə tutulur.

"Tarixən ermənilər öz məkrli niyyətlərini azərbaycanlılara qarşı reallaşdırmaqa çalışmışlar. Xalqımıza qarşı erməni şovinist millətçilərinin törətdiyi soyqırımı siyasətinin tarixi, əsasən XVIII əsrdən başlayır. Erməni şovinistləri XVIII əsrin əvvəllərindən açıq və gizli formada çar Rusiyasının himayəsinə arxalanıb, "böyük Ermənistan" xülyasını reallaşdırmaq üçün Cənubi Qafqazın yerli sakinlərinə qarşı etnik təmizləmə siyasətinə başlayıblar.

Erməni daşnaklarının müxtəlif illərdə törətdiyi faciələrin əsas istiqaməti bir millətin- türklərin soyqırımına yönəldiyini, onların torpaqları hesabına "böyük Ermənistan" yaratmaq siyasəti yürütməsi və yürüdülən siyasətin bu gün də davam etməsi baxımından da aktualdır- deyə YAP GB Nizami rayon təşkilatının sədri xatırladıb.

O, qeyd edib ki, daima erməni şovinistləri Azərbaycan xalqının tarixinə, mədəniyyətinə və ərazilərinə yiyələnmək üçün hər cür vasitələrə əl atıblar. Ermənilərin məkrli siyasətlərinin içərisində Azərbaycan türklərini daha da çox qırmaq, sonra isə Ermənistan dövlətini yaratmaq planlarını həyata keçirmək əsas istiqamət alıb.

Təşkilat sədrinin sözlərinə görə, 1918-ci ildə V.Lenin bolşevik S.Şaumyanı Qafqaz fövqəladə komissarı təyin edərək, Bakıya göndərib. S.Şaumyan isə sovet hakimiyyəti qurmaq adı altında azərbaycanlılara qarşı etnik təmizləmə siyasətini həyata keçirməyə başlayıb.

"Mart-aprel aylarında S.Şaumyan başda olmaqla, erməni şovinistləri tərəfindən törədilən soyqırımı aktı öz miqyası ilə bəşəriyyətə qarşı ən böyük cinayət kimi qiymətləndirilir. Erməni millətçiləri Bakı, Şamaxı, Quba, Naxçıvan, İrəvan və ayrı-ayrı qəzalarda türkləri, yəhudiləri, ləzgiləri, talışları və digər xalqların nümayəndələrini qətlə yetiriblər.

Martın 30-u saat 5.00-da Bakıda ilk atəş səsləri eşidilib və şəhərdə azərbaycanlıların kütləvi qırğını başlayıb. Bakıda 12 minə yaxın dinc əhali öldürülüb. "Kaspi", "Açıq Söz" qəzetlərinin redaksiyaları dağıdılıb. Şamaxı şəhərində və onun kəndlərində təxminən 16.000-ə yaxın azərbaycanlı qətlə yetirilib.

Naxçıvan qəzasında bir neçə kənd yandırılıb, Zəngəzur qəzasında 115 kəndin əhalisi məhv edilib, onlardan 3257 kişi, 2276 qadın və 2196 uşaqdır. Bütövlükdə, bu qəza üzrə 10.068 azərbaycanlı öldürülüb, 50.000 sakin qaçqın düşüb. İrəvan quberniyasının 199 kəndində yaşayan 135 min azərbaycanlı məhv edilib. Erməni silahlı dəstələri daha sonra Qarabağa yürüş edib. 1918-1920-ci illər arasında Qarabağın dağlıq hissəsində 150 kənd məhv edilib. Ümumilikdə, 1918-ci il soyqırımı zamanı 50 mindən artıq azərbaycanlı öldürülüb. Xalqımız öz tarixini unutmamalı və gələcək nəsillərə həqiqətləri çatdırmalıdır. Biz də bu işdə əlimizdən gələni edirik"-deyə Əli Pənahov bildirib. Qeyd edək ki, Nizami rayon YAP GB-nin üzvləri bu tədbirdə fəal iştirak ediblər. Partiyanın digər rayon təşkilatları da fəallıq nümayiş etdirib və analoji aksiyaları paytaxtın müxtəlif yerlərində reallaşdırıblar.

Elçin Bayramlı

Səs.- 2011.- 1 aprel.- S. 7.