Azərbaycanda "Turizm ili"nin elan olunması qarşıya yeni vəzifələr qoyur

Ölkəyə gələn turistlərin viza rejimi sadələşdiriləcək

Azərbaycan Prezidenti İlham Əliyevin Sərəncamı ilə təsdiqlənmiş 2010-2014-cü illərdə turizmin inkişafına dair Dövlət Proqramı ölkədə turizm sektorunun inkişaf etdirmək məqsdinin qarşıya qoymuşdur. Bildiyimiz kimi, turizm öz perspektivliyinə görə qeyri-neft sektoru arasında aparıcı mövqelərdən birini tutur. Dünyada turizm beynəlxalq miqyasda sürətlə inkişaf edən biznes sahələrindən biri olduğundan potensial imkanlara malik dövlətlər bundan yararlanırlar. Mütəxəssislərin tədqiqatlarına görə, dünyada əməkqabiliyyətli əhalinin 8,1 faizi turizm industriyasında və onunla bağlı iqtisadiyyat sahələrində çalışır. Bu baxımdan Azərbaycanın daxili gücünü və potensialını nəzərə alaraq respublikada turizm sektorunu inkişaf etdirmək zərurəti meydana çıxmışdır. Ölkəmizdə turizmin əksər növlərinin inkişafı üçün geniş imkanlar mövcuddur.

Azərbaycan Prezidenti İlham Əliyevin Sərəncamı ilə 2011-ci ilin ölkəmizdə "Turizm ili" elan olunması bu sahədə çalışanların qarşısında yeni vəzifələr qoymuşdur. Sərəncamdan irəli gələn vəzifələrin icrası ilə bağlı ardıcıl olaraq işlər görülür. Bu məqsədlə görülən işlərdən biri də Milli Məclis tərəfindən ölkəyə gələn turistlərin viza rejiminin sadələşdirilməsi üçün "Ölkədən getmək, ölkəyə gəlmək və pasportlar haqqında" Azərbaycan Respublikası Qanununa dəyişikliklər və əlavələrin edilməsidir.

Təklif edilən əlavə və dəyişikliklər əcnəbilərin turizm şirkətləri vasitəsilə elektron qaydada viza almasını asanlaşdıracaqdır. Turizm şirkətləri turistlərə viza almaq üçün şəxsin sənədlərini poçt vasitəsilə ölkəmizin səfirliklərinə və konsulluqlarına göndərmək iqtidarına malik olacaqlar. Sənədlər daxil olduqdan sonra onlara qanunvericiliklə müəyyən edilmiş qaydada və müddətdə baxılacaqdır. Viza "Giriş-çıxış və qeydiyyat" idarələrarası avtomatlaşdırılmış məlumat-axtarış sistemi vasitəsilə rəsmiləşdiriləcək. Həmin sənədlər elektron poçt ünvanına göndəriləcək.

Dəyişikliklərə əsasən, əcnəbilərin ərizələrinə əlaqədar qurumlara müraciət olunduğu gündən ən gec bir ay keçənədək baxılacaqdır. Lakin əgər səfər təcili müalicə, yaxud hər hansı təxirə salınmaz faktla bağlıdırsa, o halda, müraciətə 48 saat ərzində baxılması nəzərdə tutulur.

Dünya Turizm Təşkilatı tərəfindən Azərbaycan hərtərəfli dəstəklənən məkana çevrilib

Azərbaycanda "Turizm İli" elan olunması ilə bağlı beynəlxalq miqyasda müvafiq danışıqlar aparılması da ölkədə turizmin inkişafına müsbət təsir göstərən amillərdəndir. Bu baxımdan Dünya Turizm Təşkilatının rəhbər şəxsləri ilə görüşlərin keçirilməsi də Dövlət Proqramının həyata keçirilməsi istiqamətində atılan addımlar istiqamətində yüksək dəyərləndirilir. Ölkədə turizmin inkişafı ilə bağlı 5 illik Dövlət Proqramının imzalanması dövlət əhəmiyyətli məsələ olduğundan Azərbaycan turizm imkanlarının təqdimini yüksək səviyyədə təşkil edir. Beynəlxalq tədbirlərdə ölkənin daxili potensialının, onun florasının, faunasının, yeraltı və yerüstü sərvətlərinin sərgilənməsi xarici vətəndaşların ölkəmizlə bağlı məlumatlarının artmasına gətirib çıxarır.

Dünya Turizm Təşkilatı tərəfindən Azərbaycan hərtərəfli dəstəklənən, regional əməkdaşlığın təşviqi, turizmin və turizm məhsulu istehsalının inkişafına töhfə verə biləcək bir məkan kimi dəyərləndirilir. Belə ki, Xəzər dənizi regionda kruiz turizminin inkişaf etdirilməsi baxımından əlverişlidir.

Dünya Turizm Təşkilatı regional əməkdaşlıq imkanlarının araşdırılması məqsədi ilə Azərbaycana yüksək səviyyəli peşəkarların göndərilməsini nəzərdə tutmuşdur.

Azərbaycanda turizmin inkişafına dair Dövlət Proqramının həyata keçirilməsi üçün münbit şəraitin mövcudluğu, beynəlxalq turizm bazarına inteqrasiyanın təmin olunması, milli turizm kompleksinin rəqabətə davamlılığına əsaslandıran faktdır. Azərbaycanda turistlərin yerləşdirmə biznesinin dinamik surətdə inkişafı ötən illərlə müqayisədə rəqəmlərin ciddi şəkildə dəyişilməsi ilə nəticələnib. Azərbaycanda yüksək iqtisadi, sosial və ekoloji tələblərə cavab verən müasir turizm sahəsinin formalaşdırılması bu statistik rəqəmlərin ilbəil artmasına gətirib çıxarıb.

NƏZAKƏT ƏLƏDDİNQIZI

Səs.- 2011.- 6 aprel.- S. 9