Gənclik təxribatçı çağırışları qətiyyətlə rədd edir

Əli Əhmədov: "Ölkə gənclərinin fəal bir hissəsi olan YAP-ın gəncləri respublikanın ictimai-siyasi həyatında yaxından iştirak edir və bundan sonra da edəcəklər"

Dünən Yeni Azərbaycan Partiyasının Nizami rayon təşkilatının qərargahında YAP Sədrinin müavini, İcra katibi, millət vəkili Əli Əhmədov partiyanın Gənclər Birliyinin fəalları ilə görüş keçirib. Görüşdə YAP İcra katibinin müavini, millət vəkili Mübariz Qurbanlı, partiyanın Nizami rayon təşkilatının sədri, millət vəkili Sədaqət Vəliyeva və YAP Gənclər Birliyinin sədri Seymur Orucov iştirak ediblər.

YAP İcra katibi Ə.Əhmədov çıxışı zamanı bildirib ki, hazırda Azərbaycan gəncliyinə böyük diqqət yetirilir: "Ölkəmizdə gənclər siyasətinin Ümummilli Lider Heydər Əliyev tərəfindən müəyyənləşdirilib. Hazırda bu siyasət ölkə Prezident İlham Əliyev tərəfindən uğurla davam etdirilir. Azərbaycan hökuməti gəncliyin inkişafı ilə bağlı vacib tədbirlər həyata keçirir, gənclərin yüksək təhsil alması, öz bilik və bacarıqlarını, potensiallarını nümayiş etdirmək üçün müvafiq addımlar atır. Bildiyiniz kimi, hökumətimiz tərəfindən gənclərimizin dünyanın ən nüfuzlu ali məktəblərində təhsil almaları ilə bağlı Dövlət Proqramı həyata keçirilir. Hesab edirəm ki, həmin gənclər təhsillərini uğurla başa vuraraq, dövlətimizin inkişafı istiqamətində öz töhfələrini verəcəklər. Gənclər bizim gələcəyimizdir və ölkəmizin sabahı onlarla bağlıdır".

Ə.Əhmədov çıxışında onu da qeyd edib ki, bu gün Azərbaycan gəncliyi ölkə Prezidenti İlham Əliyevin həyata keçirdiyi uğurlu siyasəti, eləcə də, dövlətin xüsusi diqqət və qayğısı sayəsində sürətlə inkişaf edir. Məhz bunun nəticəsidir ki, bu gün gənclərimiz Azərbaycan Prezidenti İlham Əliyevin ətrafında sıx birləşərək, onlara göstərilən etimadı yüksək səviyyədə doğrultmağa çalışır və bu istiqamətdə səylərini davam etdirirlər.

YAP Sədrinin müavini Ə.Əhmədov, həmçinin çıxışında vurğulayıb ki, gənclər yüksək təhsil almaq, müxtəlif faydalı işlərlə məşğul olmaqla yanaşı, ölkəmizin ictimai-siyasi həyatında da fəal iştirak etməlidir: "Ölkəmizin ən güclü siyasi qüvvəsi olan YAP bu amilə böyük önəm verir. Son 20 ildə ölkə əhalisinin sayı 2 milyon nəfər artıb və yaş tərkibi baxımından gənclərin sayı xüsusi çəkiyə malikdir. 1990-cı illərin əvvəlində Azərbaycanda əhalinin sayı 7 milyon idisə, indi bu göstərici 9 milyonu ötüb. Demoqrafik göstəricilər baxımından gənclərin mövqeyi yüksəkdir. Təbii ki, insan amili hər bir cəmiyyətin başlıca potensialıdır, hər bir millətin sərvətidir, dəyəridir. Azərbaycan gəncliyi yaxşı təhsil almış, müasir texnologiyaya yiyələnən, istedadlı gənclikdir. Bu isə etibarlı gələcək deməkdir. Ancaq bununla yanaşı, biz istəyirik ki, belə gənclər ölkənin ictimai-siyasi həyatında da fəal olsunlar. Hazırda YAP üzvlərinin sayı 530 minə çatıb ki, onların da 40 faizini məhz gənclər təşkil edir. Ölkə Prezidenti İlham Əliyev hər zaman gənclərə böyük önəm verir, dövlət başçısının təşəbbüsü ilə ölkədə həyata keçirilən gənclər siyasəti uğurla davam etdirilir. Azərbaycanın ən fəal gəncləri isə məhz YAP-ın sıralarındadır. Son vaxtlar YAP Gənclər Birliyinin fəaliyyəti xeyli genişlənib. Ölkənin ictimai-siyasi həyatında partiyanın gəncləri fəal iştirak edirlər. Beləliklə, onlar ölkə Prezidentinin həyata keçirdiyi siyasətə dəstək olurlar".

YAP Sədrinin müavini Ə.Əhmədovun sözlərinə görə, dünya dəyişir, inkişaf edir, yeni texnologiyalar yaranır: "Bu gün nəinki Azərbaycan, bütün dünya gənclərinin maraq göstərdiyi sosial şəbəkələr formalaşıb. Ölkəmizin bütün gəncləri kimi, YAP-ı təmsil edən gənclər də bu sosial şəbəkələrdə fəal iştirak edirlər, müzakirələrə qatılırlar. Bununla gənclərin cəmiyyətə inteqrasiyası sürətlənir, ictimai fikrə təsir imkanları artır. Nəticədə gənclərlə işin yeni məqamları meydana çıxır. Bütövlükdə, hesab edirik ki, ölkə gənclərinin fəal bir hissəsi olan YAP-ın gəncləri respublikanın ictimai-siyasi həyatında yaxından iştirak edir və bundan sonra da edəcəklər."

Ə.Əhmədov bəzi hallarda Azərbaycan gənclərinin beyninin müxtəlif qüvvələr tərəfindən zəhərləndiyini, onların razılaşdırılmamış küçə yürüşlərinə, mitinqlərə cəlb olunduğunu da vurğulayıb: "Biz, əlbəttə ki, bunu istəmirik. Bəzi qüvvələr gənclərdən öz məqsədlərinə çatmaq üçün vasitə kimi istifadə etmək istəyirlər. Müxalifətçilərin aprelin 2-də keçirmək istədiyi aksiya da bu qəbildəndir. Bu aksiyaya da gəncləri cəlb etmək niyyətindədirlər".

YAP Sədrinin müavini Ə.Əhmədov gənc YAP-çılara həmin çirkin niyyətlərə alət olmamaq istiqamətində tələbə dostları, digər gənclərlə iş aparmağı tövsiyə edib: "Sabahkı və indiyədək olan aksiyalara qoşulan gənclərin çoxu ya təsadüfən orda iştirak ediblər, ya da aksiya keçirənlərin əsil niyyətini bilməyiblər. Bu səbəbdən onları bu yoldan döndərə bilərik".

Tədbirdə YAP Nizami rayon gənclər birliyinin sədri Əli Pənahov, gənclərdən Lamiyə Əhmədova, Gülnar Rəsulova, Vahid Məmmədzadə və başqaları çıxış edərək, Ümummilli Liderimiz Heydər Əliyev siyasi kursunun layiqli davamçısı ölkə Prezidenti İlham Əliyev cənablarının apardığı düzgün və məqsədyönlü siyasətini bundan sonra da dəstəkləyəcəklərini və bu kursa sadiq qalacaqlarını vurğuladılar.

RƏFİQƏ KAMALQIZI

Səs.- 2011.- 2 aprel.- S. 5.