Qeyri-neft sektoruna ayrılan xarici vəsaitlər çoxalır

"Xarici investisiyaların cəlb edilməsi üçün Azərbaycanın çox gözəl imkanları var".

Azərbaycan sosial-iqtisadi tərəqqi sahəsində özünəməxsus mütərəqqi bir modelin əsasını yaradaraq, günü-gündən qüdrətlənən bir ölkəyə çevrilib. Son 18 il ərzində Azərbaycan həm iqtisadi, həm də siyasi baxımdan uğurlar əldə edib. Təbii ki, bu nailiyyətlərə çətin və ağır proseslərdən sonra nail olunub. Ölkə Prezidenti İlham Əliyev cənabları da müstəqilliyimizin ilk illərinin ölkəmiz və xalqımız üçün çox ağır keçdiyini bildirmişdir: "Müstəqilliyimizin ilk illəri ölkəmiz və xalqımız üçün çox ağır keçmiş, xaos, böhran, anarxiya illəri kimi yadda qalmışdır. Bizim müstəqil siyasətimiz Azərbaycan xalqının maraqlarına tam cavab verir. Azərbaycan müstəqil dövlət kimi dünya xəritəsində öz yerini tuta bilmişdir."

Müstəqil Azərbaycanın qurucusu, ölkəmizi məhv olmaq təhlükəsindən xilas edən Ümummilli Liderimiz Heydər Əliyevin uğurlu siyasətinin nəticəsidir ki, Azərbaycan bu gün dünyanın söz sahiblərindən birinə çevrilib. Hazırda Ümummilli Liderimiz Heydər Əliyevin siyasi kursunu layiqincə, şərəflə davam etdirən Prezident İlham Əliyev ölkəmizi hərbi, siyasi və iqtisadi qüdrətinə görə regionun lider ölkəsinə çevirib. Ümumiyyətlə, iqtisadi və siyasi baxımdan, son 7 il ərzində Azərbaycan böyük uğurlara nail olub. Prezident İlham Əliyev tərəfindən uğurla davam etdirilən siyasət nəticəsində bu illərdə makroiqtisadi sabitlik qorunub saxlanılmış, qeyri-neft sahələrinin, regionların inkişafı sürətlənmiş, strateji valyuta ehtiyatlarının səmərəli istifadəsi təmin olunmuş, milli valyutanın sabitliyi, bank sisteminin etibarlılığı artırılmış, konservativ xarici borclanma strategiyası həyata keçirilmişdir.

Qeyri-neft sektoruna ayrılan xarici vəsaitlər çoxalır

Son illərin, xüsusən də, qlobal iqtisadi böhranın qabarıq şəkildə büruzə verdiyi dövrün təhlili bir daha göstərir ki, Azərbaycan əvvəlki kimi yenə də investisiya yatırılması baxımından dünyanın ən cəlbedici ölkələrindən biri kimi çıxış edir. Elə bu səbəbdən də xarici investorların Azərbaycana marağı kifayət qədər böyükdür və ölkəmizə qarşıdakı dövr ərzində də yatırılacaq sərmayələrin həcmi milyardlarla dollar həcmində ölçüləcək. Bunun başlıca səbəbləri, əlbəttə ki, Azərbaycanda investisiya mühitinin əlverişliliyi, investorların hüquqlarının qanunvericilik əsasında yüksək səviyyədə qorunması, ölkəmizin etibarlı tərəfdaş olduğunu dəfələrlə təsdiqləməsi, sərmayələrin yönəldildiyi sahələrdə cəzbedici mənfəətlər əldə olunması və bu qəbildən olan digər amillərdir. Prezident İlham Əliyev bununla əlaqədar çıxışlarında bildirmişdir: "Xarici investisiyaların cəlb edilməsi üçün Azərbaycanın çox gözəl imkanları var. Biz özümüzü etibarlı tərəfdaş kimi göstərdik və Azərbaycan xarici investisiyalar üçün çox cəlbedici ölkədir".

Yaradılan şəraitin nəticəsidir ki, dünyanın aparıcı investisiya şirkətləri, maliyyə qurumları ölkəmizə sərmayə yatırmaqda davam edir, etibarlı tərəfdaş olan Azərbaycana irihəcmli kreditlər ayırır. Son 7 ilin təcrübəsi isə burada daha bir önəmli məqamı üzə çıxarır ki, bu da qeyri-neft sektoruna daha çox investisiya yatırılması ilə bağlıdır. Bu arada Avropa Yenidənqurma və İnkişaf Bankı 2010-cu ildə Azərbaycan iqtisadiyyatına 200 milyon dollardan artıq sərmayə yatırdı.

Enerji sektoru yenə investorların xüsusi diqqətindədir

Ölkəmizin nəhəng enerji ehtiyatlarına malik olması və qlobal enerji təhlükəsizliyinin təmin edilməsində xüsusi çəkisinin artması isə həmişəki kimi bu sahəni xarici investorlar üçün cəlbedici etməkdədir. Azərbaycan hökuməti ilə xarici şirkətlər arasında imzalanmış PSA (Production Shearing Agreement) tipli neft-qaz müqavilələri üzrə ölkəmizə 60 milyard dollar həcmində investisiyaların qoyulması nəzərdə tutulub. Artıq göstərilən məbləğin yarısından çoxu indiyə kimi neft və qaz yataqlarının işlənməsi üçün yatırılıb. Təkcə 15 il ərzində "Azəri-Çıraq-Günəşli" yataqları blokunun işlənməsi üzrə investisiyaların həcmi 21 milyard 395 milyon dollar, bonuslar, akrhesabı və pay ödənişləri 413 milyon dollar təşkil edib. "Əsrin müqaviləsi" ilə yanaşı, digər əhəmiyyətli layihə hesab olunan "Şahdəniz" yatağının işlənməsi məqsədilə yatırılan investisiyaların həcmi artıq 5,5 milyard dollar, bonuslar, akrhesabı və pay ödənişləri isə təxminən 88 milyon dollar təşkil edib”.

Prezident İlham Əliyev çıxışlarında bildirib ki, respublikamız güclü maliyyə resurslarına malikdir və bölgədə ən iri kommunikasiya-infrastruktur layihələrinin reallaşmasının təşəbbüskarıdır: "Biz artıq tam hazırlıqlı vəziyyətdəyik. Biz bütün lazımi işləri görmüşük və böyük sərmayələrin qoyuluşuna da hazırıq. Hesab edirəm ki, bu il və ondan sonrakı illərdə Azərbaycanın energetika, neft-qaz, xüsusilə, qaz sektoruna milyardlarla dollar vəsait qoyulacaqdır. Həm ölkə iqtisadiyyatı, həm də özəl sektor buna hazır olmalıdır".

Prezident bundan sonra da dövlət xətti ilə dövlət investisiya proqramlarının icra ediləcəyini də söyləyib: "Hər il dövlət büdcəsindən böyük məbləğdə vəsait ayrılır. Amma mən çox istərdim ki, özəl sektor daha da böyük həcmdə investisiyalar qoysun, həm öz imkanlarını genişləndirsin, eyni zamanda, ölkənin inkişafı üçün də bunun böyük əhəmiyyəti var".

Göründüyü kimi, Prezident İlham Əliyev son 7 ildə ölkə əhalisinin rifahının yüksəlməsi, ərzaq təhlükəsizliyinin təmin edilməsi, sahibkarlığın inkişafı və ən əsası qeyri-neft sektorunun inkişafı üçün böyük səylər göstərir. "Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı"nın icrası hökumətin qarşısında ən əsas vəzifə olaraq qoyulub. Şübhə yoxdur ki, bu vəzifələrin yerinə yetirilməsi ölkəmizin tarazlı inkişafını təmin edəcək.

RƏFİQƏ KAMALQIZI

Səs.- 2011.- 7 aprel.- S. 8.