Tərtər inkişaf və tərəqqi yolunda

Rayonda ümumi məhsul istehsalının həcmi 4,3 dəfə artaraq 186,8 milyon manata çatıb Dövlət Proqramı çərçivəsində əldə olunan nailiyyətlər

Regionların sosial-iqtisadi inkişafına dair Dövlət Proqramının uğurla yerinə yetirilməsinə dair təhlilin aparılması çərçivəsində mətbuat nümayəndələri regionlara səfərlər edir, inkişaf və tərəqqi proseslərini diqqətlə izləyirlər. Bu dəfə təqdim etdiyimiz məqalədə biz Tərtər rayonunda görülən işlər və yeniliklər haqqında ilkin məlumatlarımızı oxucularımıza təqdim edirik. Regionların sosial-iqtisadi inkişafına dair Birinci və İkinci Dövlət proqramlarından irəli gələn vəzifələr Tərtər rayonunda da uğurla həyata keçirilməkdədir. Belə ki, 2004-2010-cu illər ərazində rayonun sürətli sosial-iqtisadi inkişafı təmin edilibdir. Belə ki, ötən il 1791,3 min manat dəyərində sənaye, 18 milyon 160 min manat dəyərində kənd təsərrüfatı məhsulu istehsal olunubdur. 141,9 min manatlıq rabitə, 46 milyon 67 min manatlıq ticarət, 6 milyon 856,4 min manat pullu xidmətlər göstərilmiş, əhalinin gəlirləri 79 milyon 854 min manat təşkil edibdir. Rayonun sənaye müəssisələrində 540,2 min manatlıq məhsul istehsal olunaraq satılıb. Ümumi məhsul istehsalının həcmi 4,3 dəfə artaraq 186,8 milyon manata çatıb. Həmin dövrdə sənaye məhsulu istehsalı 2,5 dəfə, kənd təsərrüfatı məhsulları istehsalı isə 3 dəfə artmışdır. Həmin müddətdə əsas kapitala yönəldilən investisiyaların həcmi 30,9 dəfə artaraq, 57,9 milyon manat, o cümlədən, tikinti-quraşdırma işlərinin həcmi 18,5 dəfə artaraq 37 milyon manat təşkil edibdir. Ötən il rayonda 30389 hektar sahədə əkin aparılıb ki, bunun da 16696,9 hektarını taxıl, 191 hektarını dənlik qarğıdalı, 2 hektarını darı, 164 hektarını lobya, 1209 hektarını pambıq, 379 hektarını şəkər çuğunduru, 5 hektarını soya, 463 hektarını günəbaxan, 445 hektarını kartof, 910,5 hektarını tərəvəz və 9924 hektarını yem bitkiləri təşkil edir.

Sosial mənşəli infrastrukturun müasir standartlara uyğunlaşdırılması

Rayonda sosial mənşəli infrastrukturun müasir standartlara uyğunlaşdırılması istiqamətində görülən işlər, mütəmadi olaraq uğurla həyata keçirilməkdədir. Bu baxımdan rayonun Tərtər və Sarıcalı qidalandırıcı yarımstansiyalarında transformatorlar, yağ açarları, portallar rənglənib, güc transformatorlarının 9 ədədi əsaslı və 42 ədədi cari, 17,21 kilometr yüksək gərginlikli və 17,5 kilometr aşağı gərginlikli hava xətləri əsaslı və cari təmir edilibdir. Məcburi köçkünlərə xidmət edən şəbəkələrdə 10296,34 min manat dəyərində təmir işləri aparılıbdır. Yaşayış məntəqələrinin qazlaşdırılması və əhalinin təbii qazla təminatının yaxşılaşdırılması üçün ardıcıl tədbirlər görülübdür. Rayonun "Dördyol" adlanan ərazisində qazpaylayıcı stansiya quraşdırılmışdır. 15 kilometr magistral qaz kəməri, Qaynaq, Qapanlı və Qazyan kəndlərində 29,3 kilometr qaz kəməri çəkilibdir. Tərtər şəhərinin içməli su şəbəkəsinin yenidən qurulması və kanalizasiya şəbəkəsinin yaradılması üçün layihə-smeta sənədləri hazırlanıb. Əhaliyə göstərilən rabitə xidmətinin səviyyəsinin yüksəldilməsi üçün 2 genişzolaqlı avadanlıq quraşdırılmışdır. Hazırda 16 abonent bundan istifadə edir. Qovşaqda 96 yerlik 2 liman istifadəyə verilmiş və hazırda 84 abonent bu xidmətdən istifadə edir. İlin sonunadək 5 koordinat tipli ATS-in elektron ATS-lə əvəz edilməsi nəzərdə tutulub.

Abadlaşdırma sistemində yeniliklər

Bu sahədə görülən işlər nəticəsində yolların, körpülərin, yolkənarı obyektlərin tikintisində müasir standartlara cavab verən modernləşmə buraya gələn hər bir insanda yenilik ab-havası yaradır. Belə ki, Bərdə-İstisu avtomobil yolunun 11-18-ci kilometrliyində Tərtərçay üzərində körpülərin dayaqlarını yuyulmadan qorumaq üçün 1203 min kubmetr dayaqbərkitmə işləri aparılıb. 8289 kvadratmetr yollarda əmələ gəlmiş çalalar asfalt-beton örtüyü ilə təmir edilmişdir. 1126 işarə dirəyi basdırılmış, qış mövsümündə 80 kilometr yol qardan təmizlənmiş, 814 kubmetr qum səpilib, yollarda əmələ gəlmiş 18 min kvadratmetr çalalar qum-çınqılla doldurulub və 96 min kvadratmetr yolların çiyin hissələri avtoqreyderlə hamarlanıbdır. Goranboy-Tərtər magistral avtomobil yolunun 36-cı kilometrliyində asfalt-beton örtüyü və səki qoyulub, Cəmilli-Dəmirçilər kəndlərarası avtomobil yolu qum-çınqılla tikilib. Bələdiyyələrin vəsaiti hesabına kənddaxili 41 kilometr yerli əhəmiyyətli yollar qum-çınqılla cari təmir edilərək, əhalinin istifadəsinə verilibdir.

Təhsil və səhiyyənin inkişafı bu rayonda da sərgilənir

Tərtər rayonunda hazırda 220 şagird yerlik Sarıcalı kənd orta məktəbinin tikintisində son tamamlama işləri aparılır. 80 şagird yerlik Azad Qaraqoyunlu kənd ibtidai məktəbinin tikintisi sürətlə gedir. Təhsil Nazirliyi tərəfindən Seydimli kənd orta, yerli büdcə vəsaiti hesabına Qaynaq kənd əsas, Qaraağacı kənd orta məktəblərinin əsaslı, şəhər 3 saylı əsas, Hüsənli kənd orta, Kovdadıq kənd ibtidai məktəblərinin və məktəbdənkənar iş mərkəzinin cari təmir edilməsi üçün təşkilati tədbirlər görülür. Digər ümumtəhsil məktəblərində daxili imkanlar hesabına cari təmir işləri aparılır. İlin birinci yarısında 56 parta, 50 yazı lövhəsi, 145 stul, 26 müəllim stolu, 30 kitab şkafı, 13 kreslo, 3 paralel qol, 1 turnik, 2 tenis stolu, 25 valeybol və 40 futbol topu, 4 valeybol və 28 futbol toru, 5 ədəd kompyuter, 2 ədəd printer alınaraq məktəblərə paylanmışdır. Azərbaycan Respublikası Milli Elmlər Akademiyasından şəhər 2 saylı məktəb-liseyə müasir tələblərə cavab verən kimya laboratoriyası göndərilmişdir.

Rayonda, həmçinin, əhaliyə səhiyyə xidmətinin səviyyəsinin yüksəldilməsi sahəsində də müsbət işlər görülməkdədir. Bu baxımdan 54 min 529 manat dəyərində dərman preparatları və sarğı materilları, 10 min 430 manat dəyərində bərk və 3 min 120 manat dəyərində yumşaq inventar alınaraq, rayonun səhiyyə müəssisələrinə paylanılıbdır. İmtiyazlı və güzəştli şərtlərlə tibbi xidmət almaq hüququna malik xəstələrə 27 min 577 manat dəyərində pulsuz dərman preparatları verilib. 1385 xəstə stasionar şəraitdə müalicə olunub, 123 nəfər xəstə hərtərəfli müayinə və müalicə olunmaq üçün respublikanın ayrı-ayrı klinik xəstəxanalarına göndərilibdir.

Göstərilən uğurlar onu deməyə əsas verir ki, qarşıdakı müddət ərzində də rayonun sosial-iqtisadi inkişafının sürətləndirilməsi, infrastrukturun inkişaf etdirilməsi, yeni iş yerlərinin yaradılması, abadlıq-quruculuq işlərinin genişləndirilməsi, 2009-2013-cü illərdə Azərbaycan Respublikası regionlarının sosial-iqtisadi inkişafına dair Dövlət Proqramında nəzərdə tutulan tədbirlərin yerinə yetirilməsi üçün bütün qüvvələr səfərbər ediləcəkdir.

RƏFİQƏ KAMALQIZI

Səs.- 2011.- 12 aprel.- S. 8.