“Qran-pri” mükafatçısı Əyyub Quliyevin növbəti uğuru

Gənc azərbaycanlı dirijor, A.Toskanini adına dirijorların beynəlxalq müsabiqəsinin "Qran-pri" mükafatçısı Əyyub Quliyev Rusiyanın ən yaxşı musiqi kollektivlərindən olan Dövlət Akademik Simfonik Orkestri ilə çıxış ediblər.

Əyyub Quliyevin sözlərinə görə, Qafqaz Mineral Suları Federal Dövlət Filarmoniyasının F.Şalyapin və A.Skryabin adına zallarında keçirilən konsertlərin proqramına dünya şöhrətli fransız bəstəkarları Kamil Sen-Sansın və Jorj Bizenin əsərləri daxil olub. Xatırladaq ki, layihənin təşkilatçıları Rusiya Federasiyası Mədəniyyət Nazirliyi və N.Safonov adına Dövlət Akademik Filarmoniyasıdır. Qeyd etmək lazımdır ki, bu layihə "Fransız simfonik teatrı" silsiləsi çərçivəsində keçirilib və ilk dəfə olaraq Yessentuki, Kislovodsk və Simferopol şəhərlərində K.Sen-Sansın fortepiano üçün 5-ci "Misir" konserti və "Afrika" fantariyası ifa olunub. Fortepiano partiyasını məşhur rusiyalı pianoçu, beynəlxalq müsabiqələr laureatı Dmitri Kaprin ifa edibdir. Konsert proqramının ikinci hissəsində isə J.Bizenin "Arlezian qızı" dramından və "Karmen" operasından məşhur süitalar səslənib. Həmçinin, Əyyub Quliyevin rəhbərliyi ilə adıçəkilən simfonik orkestri tərəfindən K.Sen-Sansın "Ölümün rəqsi" adlı simfonik poeması da ifa olunub. Onu da xatırladaq ki, Əyyub Quliyev 2010-cu ildə filarmoniyanın 115 illiyinə həsr olunmuş yubiley tədbirlərində iştirak etmiş, ötən ilin sentyabrında isə dünya şöhrətli pianoçu Nikolay Luqanski ilə birlikdə filarmoniyanın yeni konsert təqviminin açılışına dirijorluq etmişdir. Həmin konsertdən sonra filarmoniyanın rəhbərliyi tərəfindən ona orkestrin "Dəvətli dirijor" vəzifəsi təklif olunmuşdur.

Səs.- 2011.- 5 aprel.- S. 12.