ABŞ Ermənistanı
işğalçı dövlət kimi tanıdı
ABŞ Ermənistanı işğalçı dövlət kimi tanıdığına dair hesabat yayıb. Sizcə, bundan sonra ABŞ Ermənistana qarşı hər hansı bir sanksiya tətbiq edə bilərmi? Bu məsələyə aydınlıq gətirmək üçün müsahiblərmizə müraciət etdik.
Fəzail
İbrahimli, millət vəkili:
- Hesab edirəm ki, ABŞ-ın Ermənistanı işğalçı dövlət kimi tanıdığına dair hesabat yayması çox yaxşı bir haldır. ABŞ-ın belə bir mövqeyini, artıq Azərbaycanın xarici siyasət sahəsində ən böyük uğuru hesab etmək olar. Çünki bugünə qədər Azərbaycanın haqq səsi dünya ölkələrində qulaqardına vurulurdu. Bildiyiniz kimi, ATƏT-in Minsk Qrupunun həmsədr ölkələrindən biri də ABŞ-dır. Yəni burada ABŞ-ın nümayəndəsinin özü bizim ölkədə həmsədr kimi fəaliyyət göstərir. Amma işğal edilmiş rayonların heç vaxt kim tərəfindən işğal edilib sualına ünvan yazılmırdı. Bir sözlə, bu, çox yaxşı bir haldır və eyni zamanda, Dağlıq Qarabağ məsələsinin həllində vacib amillərindəndir. Çünki işğalçı kimi tanınan bir dövlətə hər hansı bir sanksiya tətbiq etmək mümkündür. Yəni, beynəlxalq hüquq bu məsələdə ciddi bir addım atmağa imkan verir. Qaldı ki, ABŞ-ın bundan sonra Ermənistana qarşı atacağı addımı bəri başdan söyləmək çətindir. Çünki bu gün dünyada hüquqi təminat güc müstəvisində həll olunur. Bu, ABŞ-ın artıq özündən asılı olan bir məsələdir. Amma ümumilikdə götürəndə isə, bu, kifayət qədər ciddi bir addımdır.
Elman Nəsirov,
politoloq:
- Hesab edirəm ki, ABŞ Ermənistanı
işğalçı dövlət kimi
tanıdığına dair hesabat yaymasına baxmayaraq, Ermənistana
qarşı heç bir sanksiya tətbiq etməyəcək. Nəyə
görə tətbiq etməyəcək? Ona görə ki,
ABŞ Dövlət Departamenti əvvəllər də belə
bəyanatlarla çıxış edib. 2001-ci ildə də,
Ermənistanda insan hüquqlarının kütləvi şəkildə
pozulması, Azərbaycan torpaqlarının işğal
altında saxlaması ilə bağlı məlumatlar verib.
Lakin ondan sonra fərqli bir situasiyanın şahidi
olmamışıq. Budəfəki hesabata gəldikdə isə,
bəli, budəfəki hesabatda da Dövlət Departamentinin Ermənistanla
bağlı hissəsində qeyd olunur ki, "bu ölkədə
çoxsaylı insan hüququ və azadlıqlarının
pozulması faktı mövcuddur". Amma bizim
üçün ən əhəmiyyətli məqam onunla
bağlıdır ki, qeyd olunduğuna görə, "erməni
separatçıları Dağlıq Qarabağ ərazisi və
ətrafındakı rayonları işğal altında
saxlayır". Yəni, bu nöqteyi-nəzərdən,
düzdür, orada birbaşa Ermənistanın adı çəkilməyib.
Amma burada Ermənistana işarə edilib. Burada məhz Ermənistanla
bağlı, insan hüquq və azadlıqlarından bəhs
edərkən, bu ifadə qeyd olunub. Yəni, artıq Ermənistanın,
məhz burada həm
Dağlıq Qarabağı, həm də ətrafındakı
rayonları işğal altında saxlaması anlamına gəlinir.
Eyni zamanda, bizim üçün bu bəyanatda, bu ifadə o
baxımdan əhəmiyyətlidir ki, ABŞ-da xarici siyasəti
prezident müəyyən etsə də, Dövlət
Departamenti xarici siyasəti həyata keçirən icraçı
funksiyasını yerinə yetirir. Əgər burada Dövlət
Departamenti Ermənistanın işğalçı tərəf
olması ilə bağlı, öz hesabatında aydın
şəkildə qeyd edib və Yerevanı
işğalçı dövlət kimi göstərirsə,
bu, o deməkdir ki, Dövlət Departamentinin 180 ölkəsində
səfirliklər var. Yəni, bu ölkələrlə
diplomatik münasibətlər var. Yəni, istənilən
ölkədə olan səfirliklər də məhz bu
hesabatdan qaynaqlanıb, Ermənistanla bağlı fəaliyyətlərini
tənzimləməlidilər. Xüsusilə də,
ABŞ-ın Ermənistandakı, səfirliyi bu yöndə
çıxış edərək, Ermənistanda fəaliyyətin
bu və ya digər təhlükələr gətirə biləcəyini
bəyan edir. Amma hesab edirəm ki, Dövlət Departamentinin bu
hesabatının ardınca, artıq ABŞ-ın Ermənistana
qarşı çox ciddi iradlar bildirəcəyi gözlənilmir.
Çünki Avropa Şurası Parlament Assambleyası Ermənistana
işğalçı dövlət olduğunu bildirib. Lakin
onu tərkibindən çıxarmayıb və heç bir
sanksiya tətbiq etməyib. Bundan başqa, hamıdan öncə,
1991-ci ildə İslam Konfransı Təşkilatı Ermənistanın
işğalçı dövlət olduğunu deyib. Amma
İslam Konfransı Təşkilatı Ermənistana
münasibətdə konkret təzyiq mexanizmlərini bu günə
kimi işə salmayıb. 2010-ci ildə isə Avropa Parlamenti
Ermənistanı işğalçı dövlət kimi
tanıdı. Ancaq bu təşkilatın da Ermənistana
münasibətdə, konkret olaraq, hər hansı mexanizmlər
və təzyiq metodlarını işə
saldığının şahidi olmamışıq. Bu,
nöqteyi-nəzərdən, və heç şübhəsiz
ki, hesabatda belə fikirlərin verilməsi müsbət
haldır və biz bundan məmnunuq. Amma bu müsbət hal o zaman effektli
olur ki, onun nəticəsi olsun. Əgər ABŞ bu cür bəyanat
veribsə, gərək sözünü üstündə dura
bilsin. Yəni, onu konkret olaraq, işlək metodlar və
mexanizmlərlə təmin eləsin. Əgər bu cür
olacaqsa, hesab edirəm ki, Dövlət Departamentinin bu
hesabatının tayı-bərabəri olmayacaq. Yox, əgər
bu hesabatın ardınca elə əvvəlki vəziyyət dəyişməz
olaraq qalacaqsa və Dövlət Departamenti burada konkret bir
addım atmayacaqsa, hesab edirəm ki, bu, elə-belə gəlişi
gözəl sözlər kimi qalacaqdır. Bir sözlə,
onun arxasında konkret heç bir iş dayanmır. Ona görə
də, bu bəyanatın nəticələrini gözləməli
olacağıq. "Ermənistan dövləti Azərbaycanın
Dağlıq Qarabağ ərazisini və onun ətrafındakı
7 rayonu işğal edib" ifadəsi həmin hesabatda qeyd
olunmayıb. Düzdür, hesabatda erməni
separatçılarının adı var, amma bu ad Ermənistanla
əlaqədar qeyd olunur. Yəni, bu diplomatik məna o deməkdir
ki, burada əslində, işğalçı Ermənistan tərəfidir.
Bir qədər gözləmək lazımdır ki, görək
bu hesabatın konkret bir nəticəsi olacaq, ya yox.
GÜLYANƏ
Səs.- 2011.- 15 aprel.- S. 9.