Beyləqanda dinamik inkişaf davam edir

Rayonda ötən il əsas kapitala 8,3 milyon manat investisiya yönəldilibdir

İlk onilliyini yaşadığımız XXI əsr Azərbaycanın bir çox guşələri kimi Beyləqanın da tarixinə sürətli inkişaf və intibah dövrü kimi daxil olub. Regional inkişaf üzrə dövlət proqramlarının uğurlu icrası sayəsində bu rayonda da sürətli abadlıq-quruculuq işləri həyata keçirilib, müasir infrastruktur yaradılıb. Məhz geniş miqyaslı yenidənqurma tədbirləri Beyləqan rayonunun simasını tamamilə dəyişib, rayonun gözəlliklərini daha da artırıb.

Sosial-iqtisadi yüksəliş

Bütün bölgələrdə olduğu kimi, Beyləqan rayonunda da proqram vəzifələrin icrası istiqamətində əsaslı işlər görülübdür. Rayonun ictimai-siyasi, sosial-iqtisadi və mədəni həyatının bütün sahələrində köklü irəliləyişlərə nail olunubdur. Rayon icra hakimiyyətinin məlumatına görə, ötən ildə rayon iqtisadiyyatının dinamik inkişaf tempi qorunub saxlanılıbdır. Rayonda istehsal olunan məhsulların, görülən işlərin və xidmətlərin həcmi 105 milyon manat olubdur. Bu, əvvəlki illə müqayisədə 6,9 milyon manat çoxdur. Ümumi məhsulun 4,1 faizi sənayenin, 63,4 faizi kənd təsərrüfatının, 6,3 faizi tikintinin, 2,5 faizi nəqliyyat və rabitənin, 23,9 faizi ticarət xidmətinin payına düşmüşdür. Həmçinin əsas kapitala 8,3 milyon manat investisiya yönəldilib. Onun 79,2 faizi tikinti-quraşdırma işlərinə, o cümlədən, 48,6 faizi istehsal təyinatlı obyektlərin inşasına sərf edilmişdir. Bütün maliyyə mənbələri hesabına istifadəyə verilən əsas fondların dəyəri 5,9 milyon manat, mərkəzləşdirilmiş qaydada qoyulan investisiyaların həcmi 3,3 milyon manat olmuşdur.

Aqrar bölmə yeniləşir

Respublikanın meliorasiya və irriqasiya proqramına uyğun olaraq, hökumətin və Dünya Bankının xətti ilə "Yuxarı Mil" kanalı ilə "Xan qızı" kanalı arasında yerləşən, habelə Şərq, Türklər və Sarısu ərazilərini əhatə edən 5200 hektar sahədə kompleks meliorativ tədbirlər həyata keçirilir. Qısa müddətdə 3000 hektar sahədə işlər başa çatdırılmış, 40 kilometr kollektor-drenaj şəbəkəsi istifadəyə verilmişdir. Bundan əlavə, son illər rayonda 50,5 kilometr yeni kollektor-dren şəbəkəsi qazılmış, mövcud şəbəkələrin 244,6 kilometr, suvarma kanallarının isə 814,3 kilometr hissəsi lildən təmizlənilib. Son iki ildə torpaq mülkiyyətçilərinə və buğda istehsalçılarına 5,2 milyon manat məbləğində dövlət yardımı verilibdir. Cari il ərzində rayonun fərdi və fermer təsərrüfatlarında ət istehsalı 1675 sentner, süd istehsalı 3845 sentner, yun 475 sentner, yumurta istehsalı 679 min ədəd olubdur. Həmçinin, ötən il 214868 sentner buğda, 3380 sentner arpa, 7567 sentner şəkər çuğunduru, 5310 sentner tərəvəz, 1190 sentner kartof, 1012 sentner günəbaxan götürülübdür.

Fermerlərə 50 faiz güzəştli qiymətlərlə 136 ton yüksək reproduksiyalı buğda toxumu satılıb. Aqrar bölmənin inkişafına dövlətin göstərdiyi diqqət və qayğı sayəsində rayonda bütün təsərrüfat sahələri üzrə 50,4 min hektarda əkin aparılıbdır. Rayonda heyvandarlıq daha yüksək templə inkişaf etmişdir. İri malın sayı beş ildə 9692 baş, il ərzində 1375 baş artaraq 52,6 min başa çatıbdır. Qoyun-keçilərin sayı isə beş ildə 75820 baş, il ərzində 10506 baş artaraq 281,6 min baş olubdur. Quşların sayı beş ildə 30752 baş, il ərzində isə 13449 baş artaraq 413,3 min başa yüksəlibdir. Heyvandarlıq məhsulları - ət, süd, yun, yumurta istehsalı artmışdır.

Abadlıq-quruculuq işləri uğurla aparılır

Eyni zamanda, görülən tədbirlər yerli xammala əsaslanan istehsal sahələrinin yaranmasına, bu sahədə böyük inkişafın müşahidə olunmasına şərait yaradıb. Dövlət Proqramının icra olunduğu müddətdə rayonda yerli xammala əsaslanan istehsal və emal müəssisələrinin yaradılması, sahibkarlığın inkişafı, habelə, yeni iş yerlərinin dəstəklənməsi sahəsində bir sıra mühüm tədbirlər həyata keçirilib. Belə ki, rayonda iqtisadiyyatın aparıcı sahəsi olan heyvandarlığın dinamik templə inkişafı, öz növbəsində, heyvandarlıq məhsullarının emalına ciddi ehtiyac yaradıb və nəticədə əsasən, heyvandarlıqla məşğul olan iri yaşayış məntəqələrində (Təzəkənd, Kəbirli, I Şahsevən, Milabad, Bünyadlı və sair) gündəlik istehsal gücü 29 ton olan 9 süd qəbulu və emalı sexləri yaradılıb. Bu dövrdə heyvandarlığın yem bazasının təşkili məqsədilə 2 qarışıq yem zavodu tikilərək istifadəyə verilib. Hesabat dövründə Dünyamalılar, Milabad, Kəbirli, Örənqala, Birinci Şahsevən, Şəfəq, Qaralılar, Bünyadlı, Əhmədli kəndlərində yeni un dəyirmanlarının istifadəyə verilməsi nəticəsində rayonda yüzlərlə yeni iş yeri yaradılıb, əhalinin keyfiyyətli un məhsulu ilə təmin olunması üçün ciddi addımlar atılıb. Rayon mərkəzində və Birinci Şahsevən kəndində 6 üzlük plitə sexi, SMD-4 qəsəbəsində "Nurlan" mebel sexi, Örənqala qəsəbəsində "Narsıxma" sexi, Qəhrəmanlı qəsəbəsində pambıq emalı sexi, Birinci Şahsevən kəndi ərazisində iki çınqıl karxanası, Dünyamalılar kəndi ərazisində illik istehsal gücü 626 min şərti banka olan "Tərəvəz" məhsullarının konserv sexi, Birinci Şahsevən kəndi ərazisində "CTS AQRO" MMC-yə məxsus, illik istehsal gücü 35 min ton olan pambıq emalı müəssisəsi, Şəfəq qəsəbəsi ərazisində mərmər daşların istehsalı və cilalanması sexi tikilib istifadəyə verilib. "Aran-Qala" LTD-yə məxsus kərpic zabodunda (illik istehsal gücü 6,5 milyon ədəd) istehsal prosesi bərpa olunub. Həyata keçirilmiş tədbirlər nəticəsində yüzlərlə rayon sakininin və ərazidə müvəqqəti məskunlaşmış məcburi köçkünlərin məşğulluğunun təmin olunmasına şərait yaranıb.

Ümumiyyətlə, ötən il əsas kapitala 8,3 milyon manat investisiya yönəldilibdir. Onun 79,2 faizi tikinti-quraşdırma işlərinə, o cümlədən, 48,6 faizi istehsal təyinatlı obyektlərin inşasına sərf edilibdir. Bütün maliyyə mənbələri hesabına istifadəyə verilən əsas fondların dəyəri 5,9 milyon manat, mərkəzləşdirilmiş qaydada qoyulan investisiyaların həcmi 3,3 milyon manat olubdur.

İşgüzarlığı ilə seçilən beyləqanlılar, hər il olduğu kimi, ötən ildə də rayonda aqrar sahənin inkişafının sürətlənməsi və yüksək göstəricilər əldə olunması sahəsində Dövlət Proqramında nəzərdə tutulan bütün tələblərə məsuliyyətlə əməl edirlər. Bu isə, onu göstərir ki, beyləqanlılar, doğrudan da, torpaqla canlı ünsiyyət qurmağı və ondan istədiklərini almağı bacarırlar.

RƏFİQƏ KAMALQIZI

Səs.- 2011.- 16 aprel.- S. 8.