Şair Mirhaşım Talışlının 85 illiyi qeyd edildi

Azərbaycan Yazıçılar Birliyinin üzvü, filologiya elmləri namizədi, Lənkəran Dövlət Universitetinin dosenti, əməkdar müəllim Hacı Mirhaşım Talışlının adı təkcə Lənkəranda deyil, respublikamızın hər yerində yaxşı tanınır. Əruz vəzninin gözəl bilicisi, XIX əsr Lənkəran ədəbi mühitinin tədqiqatçısı, şair Hacı Mirhaşım Talışlının anadan olmasının 85, yaradıcılığının isə 65 ili tamam olur. Azərbaycan ədəbiyyatının inkişafında xidmətlərinə görə 2006-cı ildə Prezident təqaüdünə layiq görülmüşdür. Universitetin mətbuat və informasiya xidmətindən "Səs"ə verilən məlumata görə, şair Hacı Mirhaşım Talışlının anadan olmasının 85 və yaradıcılığının 65 illiyi münasibətilə Lənkəran Dövlət Universitetində geniş tədbir keçirilmişdir. Tədbiri universitetin rektoru, fizika-riyaziyyat elmləri doktoru, əməkdar elm xadimi, professor Asəf İsgəndərov açaraq, yubilyarı təbrik etmişdir.

Tədbirdə universitetin mətbuat və informasiya xidmətinin rəhbəri, Azərbaycan Yazıçılar Birliyinin üzvü Hacı Etibar Əhədov Hacı Mirhaşım Talışlının həyat və yaradıcılığı haqqında məruzə etmişdir. Sonra universitetin dosenti, filologiya elmləri namizədi, Azərbaycan Yazıçılar Birliyinin üzvü Mirhüseyn Abbas, Azərbaycan Yazıçılar Birliyinin üzvü Şahan Zeynalov və başqaları çıxış edərək, yubiley münasibətilə Hacı Mirhaşım Talışlını təbrik etmiş, ona möhkəm cansağlığı və yaradıcılığında uğurlar arzulamışlar. Şair Hacı Mirhaşım Talışlı xoş sözlərə görə minnətdarlığını bildirmiş, keçdiyi həyat yolundan danışmış, bundan sonra da qələmi ilə xalqa xidmət edəcəyini, Ümummilli Lider Heydər Əliyev ideyalarına daim sadiq qalacağını bildirmiş, yaradıcılıq planlarından danışmışdır. Tədbirdə Lənkəran ictimaiyyətinin nümayəndələri iştirak etmişlər.

Zümrüd

Səs.-2011.- 20 aprel.- S. 12.