Ucarın uğur və inkişaf strategiyası

Regionların sosial iqtisadi inkişafına dair Dövlət Proqramı Ucar rayonunda uğurla həyata keçirilir

İlk onilliyini yaşadığımız XXI əsr Azərbaycanın əksər bölgələri kimi Ucar rayonunun da tarixinə sürətli inkişaf və intibah dövrü kimi daxil olub. Xüsusilə, regional inkişaf üzrə Dövlət Proqramlarının uğurlu icrası sayəsində bu rayonda da sürətli abadlıq-quruculuq işləri həyata keçirilib, müasir infrastruktur yaradılıb. RİH-dən verilən məlumata görə, rayonda qazanılan uğurların məhz işgüzarlıq, zəhmətsevərlik kimi amillərin üzərində pərvəriş tapması xüsusi qeyd edilməlidir.

Bunun nəticəsidir ki, rayonda ümumi daxili məhsul istehsalı 4,0, kənd təsərrüfatı məhsulları istehsalının həcmi 5,1, pərakəndə əmtəə dövriyyəsi 5,2, büdcə gəlirləri 4,8, əhalinin pul gəlirləri 8,1, orta aylıq əmək haqqı 11,4 faiz artmış, yoxsulluq səviyyəsi 12 faizdən 9,1 faizə enib. Həmçinin, əvvəlki illərdə olduğu kimi, ötən il rayonda sahibkarlığın inkişaf etdirilməsi diqqət mərkəzində saxlanılmış, sahibkarlara dövlət qayğısı davam etdirilib, bu məqsədlə il ərzində 2034 nəfər sahibkara cəmi 2752,6 min manat kredit verilibdir ki, bundan 2257,6 min manatı özəl banklar tərəfindən ödənilibdir. Eyni zamanda, görülmüş tədbirlər nəticəsində ötən il ərzində 629 iş yeri açılıb, bundan 302-si daimi, 327-si müvəqqəti və mövsümi işlər olubdur.

Ümumiyyətlə, ikinci Dövlət Proqramının icrasının başlanıldığı 2009-2010-cu illər ərzində yeni açılmış 1466 iş yerlərinin 585-i daimi işlər olub.

Ucar müasir tərəqqi yollarında

Bu gün tarixi keçmişini və təbii gözəlliyini qoruyub saxlayan Ucar rayonu Prezident İlham Əliyevin rəhbərliyilə "Azərbaycan Respublikası regionlarının sosial-iqtisadi inkişafı Dövlət Proqramı”nın reallaşdırılması nəticəsində keyfiyyətcə yeni inkişaf mərhələsinə qədəm qoyub. Ölkə Prezidenti cənab İlham Əliyevin 2004-cü il 11 fevral tarixli 24 nömrəli Fərmanı ilə təsdiq edilmiş "Azərbaycan Respublikası regionlarının sosial-iqtisadi inkişafı Dövlət Proqramı”nın reallaşdırılması nəticəsində ölkə üzrə müxtəlif istiqamətlərdə xeyli işlər görülüb. Belə ki, rayonda abadlıq və quruculuq işləri diqqət mərkəzində saxlanılıb, Heydər Əliyev Mərkəzinin, rayon mərkəzi xəstəxanasının, Şahmat məktəbinin, 3 orta məktəbin tikintiləri və Rayon Uşaq Xəstəxanasının əsaslı təmiri davam etdirilib, Müsüslü-Qazyan avtomobil yolunun 15 kilometrlik hissəsində, Yuxarı Şilyan, Boyat, Qazıqumlaq, Qarabörk kəndlərində, şəhərin ayrı-ayrı küçələrində 276900 kvadratmetr asfalt vurulmuş, ərazilərdə və magistral avtomobil yollarının kənarlarında 15000 ədəd müxtəlif ağac və gül kolları əkilmiş, təmizlik işləri həyata keçirilmişdir.

Rayonun iqtisadi imkanları artır

Görülmüş işlər nəticəsində rayonda kənd təsərrüfatı bitkilərinin əkin və istehsal həcmi xeyli artmış, cari ildə 11837 hektar sahədə taxıl, 204 hektar sahədə qarğıdalı, 337 hektar sahədə çəltik, 405 hektar sahədə kartof, 1845 hektar sahədə tərəvəz, 235 hektar sahədə bostan, 340 hektar sahədə pambıq bitkisi əkilmiş, 24152 ton taxıl, 382 ton qarğıdalı, 512 ton çəltik, 3726 ton kartof, 14246 ton tərəvəz, 2080 ton bostan, 503 ton pambıq məhsulu əldə edilmişdir ki, bu da 2009-cu ildəkindən 6,5 ton çox qarğıdalı, 16,1 ton çox çəltik, 162 ton çox kartof, 127 ton çox tərəvəz, 35 ton çox bostan, 26 ton çox pambıq məhsulu deməkdir.

Qeyd olunan dövrdə rayonda iribuynuzlu mal-qaranın sayı 1648 baş artaraq 57214 başa, xırdabuynuzlu heyvanların sayı 2885 baş artaraq 49525 başa çatdırılmış, ət istehsalı 1035 ton, süd istehsalı 4413 ton, yumurta istehsalı 3 milyon 350 min ədəd artmış, 599 baş inək və düyələrdə süni mayalanma aparılmış, süni yolla mayalanmış inək və düyələrdən 422 baş mələz bala alınmışdır.

Yeni məktəblər və xəstəxanalar tikilir

Rayonun təhsil, səhiyyə, eləcə də, digər sosial və mədəni strukturları öz fəaliyyətlərini tələblər səviyyəsində qurmağa çalışırlar. Ötən il ərzində rayonun pedaqoji kollektivləri və şagirdlər möhtərəm Prezidentimizin qayğısını daim öz üzərlərində hiss etmiş, regionların sosial-iqtisadi inkişafı Dövlət Proqramına əsasən və Heydər Əliyev Fondunun təşəbbüsü ilə "Yeniləşən Azərbaycana-yeni məktəb" devizi altında rayonda 3 orta məktəbin, o cümlədən, 360 şagird yerlik Qazqumlaq kənd, 240 şagird yerlik Alpı kənd və 360 şagird yerlik şəhər 4 saylı orta məktəbi binalarının, həmçinin, rayon Şahmat Məktəbi binasının tikintiləri aparılmış və qeyd olunan bütün binaların cari ildə təhvil veriləcəyi planlaşdırılıbdır.

Ötən il rayon tibb işçiləri də zamanın tələblərinə uyğun şəkildə işləməyə çalışmış, əhalinin sağlamlığının qorunmasına öz töhfələrini verməyə səy göstərmişlər. Ötən ildə rayonun tibb müəssisələrinin maddi-texniki bazasının möhkəmləndirilməsi işləri davam etdirilibdir. Həmçinin, Heydər Əliyev Fondunun dəstəyi və vəsaiti ilə rayon uşaq xəstəxanasının dünya standartları səviyyəsində əsaslı təmir olunması, rayon mərkəzi xəstəxanası üçün 118 çarpayılıq yeni xəstəxana binasının tikintisinə başlanılmasıdır.

Ümumiyyətlə, bütün bu işlər, onu deməyə əsas verir ki, Ucar rayon ictimaiyyəti Ümummilli Liderimiz Heydər Əliyevin ideyalarını uğurla həyata keçirən ölkə Prezidenti İlham Əliyevin daxili və xarici siyasət xəttini, birmənalı olaraq, dəstəkləyir və müdafiə edirlər.

RƏFİQƏ KAMALQIZI

Səs.- 2011.- 22 aprel.- S. 10.