ABŞ Dağlıq Qarabağ münaqişəsinə diqqəti artırır

ABŞ Azərbaycanın xarici siyasətində xüsusi əhəmiyyət daşıyan və strateji mövqeyi olan ölkələrdən sayılır. ABŞ-la müxtəlif sahələrdə qurulan əməkdaşlıq münasibətləri qarşılıqlı faydalılıq prinsiplərinə söykənir və beynəlxalq arenada Azərbaycanın mənafelərinin qorunmasına xidmət edir. Bu münasibətlərin daha inkişaf etdirilməsi isə hər iki dövlətin maraqlarının təmin olunması baxımından yüksək əhəmiyyət daşıyır. Bu günlərdə isə ABŞ-ın müxtəlif siyasi dairələri tərəfindən Ermənistan-Azərbaycan, Dağlıq Qarabağ münaqişəsi, eləcə də, ABŞ-Azərbaycan münasibətlərinə xüsusi diqqətin ayrıldığını görmək olar. Bunun üçün bir sıra məqamlara diqqət yetirmək kifayətdir. Aprelin 28-də ABŞ Konqresinin Silahlı Qüvvələr və Nəqliyyat Komitələrinin üzvü, Azərbaycan üzrə işçi qrupunun həmsədri Bill Şusterin başçılıq etdiyi nümayəndə heyəti Azərbaycana səfər etdi. Azərbaycan Respublikasının Prezidenti İlham Əliyevlə görüşən nümayəndə heyəti bir sıra məsələləri müzakirə etmişdir. Görüşdə Azərbaycanla ABŞ arasında ikitərəfli münasibətlərin müxtəlif sahələri, energetika sahəsində həyata keçirilən əməkdaşlıq və digər sahələrdə əlaqələrin bugünkü vəziyyəti və perspektivləri ətrafında fikir mübadiləsi aparılmış, Azərbaycanın Əfqanıstandakı sülhməramlı missiyada iştirakı və beynəlxalq antiterror əməliyyatlarının həyata keçirilməsi işinə verdiyi töhfə qeyd olunmuşdur. Görüşdə, həmçinin, regional məsələlərə də toxunulmuşdur. Əlbəttə, bu regional məsələlər sırasında Dağlıq Qarabağ münaqişəsinin də yer alması mütləqdir.

Aprelin 27-də ATƏT-in Minsk Qrupunun həmsədrləri Bernar Fasye, İqor Popov və Robert Bradtke, həmçinin, ATƏT-in fəaliyyətdə olan sədrinin şəxsi nümayəndəsi Anjey Kasprşikin ABŞ-a səfərini qeyd etmək lazımdır. ABŞ Dövlət katibinin siyasi məsələlər üzrə müavini Uilyam Börnslə görüşdə Dağlıq Qarabağ münaqişəsinin həlli ilə bağlı müzakirələr keçirilmişdir. Həmsədrlər görüşün məhsuldar və ümidverici olduğunu bildiriblər. Keçirilən bu cür görüşləri nəzərə alsaq, demək olar ki, ABŞ Azərbaycanla münasibətlərin möhkəmləndirilməsi yönündə irəliyə doğru addımların atılmasında maraqlıdır. Strateji müttəfiqlik səviyyəsinə qaldırılan münasibətlərin daha da inkişaf etdirilməsi isə hər iki dövlətin bir-birinin maraqlarına hörmət etməsindən asılıdır. Azərbaycanın İraq və Əfqanıstanda aparılan əməliyyatlarda ABŞ-a dəstək verməsi qarşılıqlı əməkdaşlıqda Azərbaycanın üzərinə düşən öhtəçiliyi yetərincə yerinə yetirməsinə sübut ola bilər. ABŞ isə, hələ ki, bu vəzifənin öhdəsindən layiqincə gələ bilməyib desək, yanılmarıq. ATƏT-in Minsk Qrupunun həmsədri kimi münaqişənin həllində lazımi qədər səy göstərməməsi və öz nüfuzundan istifadə edərək işğalçı tərəfə təzyiq göstərməməsi buna misal ola bilər. Eyni zamanda, müxtəlif dövrlərdə ABŞ siyasi dairələri tərəfindən Azərbaycandakı ictimai-siyasi vəziyyətin düzgün qiymətləndirilməməsi də münasibətlərə xələl gətirən amillərdəndir. Lakin son hadisələrdən də məlum olduğu kimi, ABŞ adıçəkilən məsələlərin həllinə dair addımlar atır və əməkdaşlığın inkişaf etdirilməsinə çalışır. Bunu təqdirəlayiq hal kimi qiymətləndirmək olar.

Murad İSMAYILZADƏ

Səs.- 2011.- 30 aprel.- S. 13.