Azərbaycan dünya mətbuatında

Böyük Britaniyada nəşr olunan “Exchange” - beynəlxalq biznes və diplomatiya jurnalının iyul sayında səfir Fəxrəddin Qurbanovla müsahibə dərc edilmişdir.

Azərbaycanın Böyük Britaniyadakı səfirliyindən verilən məlumata görə, müsahibədə, əsasən, Azərbaycan iqtisadiyyatında davamlı inkişaf, ölkəmizin enerji sektorunun cari vəziyyəti və inkişaf perspektivləri, enerji gəlirlərinin idarə olunması sahəsində həyata keçirilən tədbirlər, o cümlədən, Dövlət Neft Fondunun fəaliyyəti, Azərbaycan və Böyük Britaniya arasında iqtisadi əməkdaşlıq, xüsusilə, neft-qaz ehtiyatlarının işlənməsində Britaniya şirkətlərinin rolu, Azərbaycanın 2011-ci il “Eurovision” Mahnı Müsabiqəsində qələbəsi və turizmin inkişafı ilə bağlı məsələlər əhatə olunmuşdur.

Səfir ölkənin makroiqtisadi göstəricilərinin ildən-ilə yüksəldiyini və bunun əsasında ölkədə mövcud siyasi sabitlik və həyata keçirilən iqtisadi kursun dayandığını bildirmişdir. Regional əhəmiyyətli enerji layihələrinin həyata keçirilməsinin iqtisadi inkişafa təkan verdiyini, enerji gəlirlərinin səmərəli idarə olunması üçün hökumət tərəfindən Dövlət Neft Fondunun təsis edildiyini qeyd etmişdir.

Britaniya şirkətlərinin Azərbaycanın enerji ehtiyatlarının işlənməsində və ixracında xüsusi rolunu vurğulamış, hazırda qeyri-neft sektoruna marağın artdığını nəzərə çatdıraraq, Britaniya şirkətlərini ölkə iqtisadiyyatına sərmayə yatırmağa dəvət etmişdir.

Cari ilin Azərbaycanda “Turizm İli” elan olunduğu, zəngin turizm ehtiyatlarına malik ölkəmizdə hazırda turizmin inkişafının prioritet istiqamətlərdən olduğu vurğulanmışdır. Bu ilin sonuna qədər paytaxt Bakıda dünya şöhrətli beşulduzlu mehmanxanaların açılacağı, regionlarda turizmin inkişaf etdirilməsi üçün layihələrin icra olunduğu qeyd olunmuşdur.

2011-ci il “Eurovision” Mahnı Müsabiqəsində qələbə münasibəti ilə səfir Azərbaycan xalqına təbriklərini çatdırmış, gələn il paytaxt Bakıda keçiriləcək “Eurovision” Mahnı Müsabiqəsinin xalqımızın zəngin mədəniyyətinin nümayişi və turizmin inkişafına yaxşı fürsət yaradacağını əlavə etmişdir.

“The Washington Times” qəzetində “Azərbaycanın Əfqanıstana yardımı” sərlövhəli məqalə dərc olunub

ABŞ-ın nüfuzlu “The Washington Times” qəzetinin 29 iyul tarixli nömrəsində bu ölkədə fəaliyyət göstərən “Heritage” Fondunun baş tədqiqatçısı Ariel Koenin “Azərbaycanın Əfqanıstana yardımı” sərlövhəli məqaləsi dərc olunmuşdur. Məqalədə ABŞ-ın Əfqanıstanda “Taliban” silahlılarına qarşı apardığı mübarizədən, verdiyi çoxsaylı itkilərdən söhbət açılır. Eyni zamanda, qeyd olunur ki, itki verən təkcə ABŞ deyildir. ABŞ-ın və NATO-ya üzv olan digər ölkələrin sadə vətəndaşlarının xəritədə tapmağa çətinlik çəkdiyi ölkələr belə bu mübarizədə birləşmiş ştatlara kömək göstərir, böyük itkilər verirlər. Müəllif bu ölkələr sırasında Azərbaycanın adını xüsusi qeyd edir: “ABŞ və NATO Azərbaycana məxsus yanacaqla dolu təyyarənin iyul ayında Əfqanıstanda qəzaya uğraması nəticəsində həlak olmuş 9 heyət üzvünün xatirəsini yad etməlidir. Digər koalisiya müttəfiqlərinin öz əsgərlərini Əfqanıstandan çıxardıqları bir vaxtda, Azərbaycanın antiterror əməliyyatlarında iştirakı onun NATO və Amerika qüvvələrinə göstərdiyi dəyərli yardım kimi qəbul olunmalıdır. Azərbaycan liman və dəmir yolları şəbəkəsi ilə də Əfqanıstandakı Amerika və NATO qoşunlarının təchizatında mühüm rola malik tranzit ölkədir”.

Müəllif yazır ki, ABŞ-ın sabiq müdafiə naziri Robert Geyts Bakıya səfəri zamanı Azərbaycanın Əfqanıstandakı əməliyyatlara həm əsgəri qüvvə, həm də quru və hava məkanından istifadəyə imkan yaratmaqla verdiyi töhfələrə görə şəxsən Prezident İlham Əliyevə təşəkkür etmişdir. Azərbaycanın xarici işlər naziri Elmar Məmmədyarov da bu yaxınlarda rəsmi Bakının Əfqanıstana göndərdiyi əsgərlərin sayını iki dəfə artırmaqla bu ölkədə sabitliyə öz töhfəsini verməyə hazır olduğunu bildirmişdir.

NATO-nun baş katibi Andres Foq Rasmussen Azərbaycanın Əfqanıstanda sülhyaratma əməliyyatlarına verdiyi töhfələri təqdir etdiyini demişdir.

ABŞ-ın Azərbaycandakı səfiri Metyu Brayza rəsmi Bakının Əfqanıstana yardımını yüksək qiymətləndirərək demişdir: “Bu gün NATO iftixarla Azərbaycanı öz tərəfdaşı hesab edir. Azərbaycanın Kosovodan tutmuş İraq və Əfqanıstana qədər təhlükəsizliyin təmin edilməsində töhfələri davamlı və peşəkar olmuşdur. Bu ölkənin NATO ilə əlaqələri təhlükəsizliyi, demokratik dəyərləri möhkəmləndirir, siyasi və hərbi modernləşməni, eləcə də, islahatlar proseslərini dəstəkləyir və sürətləndirir”.

Məqalədə o da bildirilir ki, ABŞ Azərbaycanı təkcə Əfqanıstan məsələsində etibarlı tərəfdaş olduğuna görə deyil, həm də Xəzərin enerji resurslarının təhlükəsizliyinin təmin edilməsində də vacib strateji tərəfdaş olduğu üçün dəstəkləməkdə davam etməlidir. Müsəlman ölkəsi olan Azərbaycan, həm də qlobal terrorizmə qarşı mübarizədə fəal rol oynayır.

Məqalənin müəllifi bu yaxınlarda baş vermiş qəzanı həm Azərbaycan, həm də NATO müttəfiqləri üçün faciəvi hadisə adlandırır. O, vurğulayır ki, buna görə də dünyanın bu həssas regionunda təhlükəsizliyin təmin edilməsində Amerikanın göstərdiyi səylərdə hətta kiçik müttəfiqlərin nə qədər mühüm rol oynadığını qiymətləndirməyimiz vacibdir.

Almaniyanın “Nitro” jurnalında “Azərbaycana tərəf?” sərlövhəli məqalə dərc olunub

Almaniyanın “Nitro” jurnalında Azərbaycanda səfərdə olmuş alman jurnalist İzabel Ulrixin “Azərbaycana tərəf?” sərlövhəli məqaləsi dərc olunmuşdur. Ölkəmizin xristian əcdadlarına, həmçinin, fars, ərəb, türk və rus işğallarına görə mədəni müxtəlifliyə malik olduğunu qeyd edən müəllif artıq məqalənin ikinci abzasında Dağlıq Qarabağ münaqişəsinə toxunur. Bildirir ki, Azərbaycana məxsus olan bu ərazi Sovet İttifaqının süqutu zamanı Ermənistan tərəfindən zəbt olunmuş və bölgənin azərbaycanlı əhalisi oradan zorla qovulmuşdur.

Daha sonra müəllif Azərbaycan paytaxtındakı inkişaf və çiçəklənən həyat səviyyəsindən, Bakıda və rayonlarda qarşılaşdığı qonaqpərvərlikdən, xalqımızın dini tolerantlığından söhbət açır. Ulrix, xüsusilə, Bakının və İsmayıllı rayonunun Lahıc qəsəbəsinin qısa təsvirini verir. Bildirir ki, ölkənin sovet dövrünü geridə qoyduğu və Avropanın bir hissəsi olduğu hər addımda hiss edilir. Bundan əlavə, müəllif Azərbaycanda Yelenendorf alman irsinin mövcud olmasını və xalqımızın özünəməxsus çay dəstgahı ənənəsini böyük maraqla oxucuların diqqətinə çatdırır.

Türkiyə mətbuatı Azərbaycanın Somaliyə ayırdığı humanitar yardım barədə yazır

Somalidə yaranan vəziyyətlə bağlı Azərbaycanın bu ölkəyə humanitar yardım ayırması barədə məlumat dərc olunmuşdur. İnformasiya resursunda qeyd olunur ki, Somaliyə yardımın göstərilməsi barədə qərar Azərbaycan Respublikası Nazirlər Kabineti tərəfindən qəbul edilmişdir.

“Hürriyyet” qəzeti: “Azərbaycan dünyanın ən nadir piano zavodlarından birinə sahibdir”

Almaniyalı sahibkar Hans Beltmann Qəbələdəki tütün fabrikini piano zavoduna çevirib. Bununla da Azərbaycan dünyanın ən nadir piano zavodlarından birinə sahib olub. Bu fikirlər Türkiyənin nüfuzlu “Hürriyyet” qəzetində dərc edilmiş məqalədə yer alıb.

Yazıda Qəbələdəki piano zavodu haqqında ətraflı məlumat verilmişdir. Zavodda hazırlanan pianoların hamısının əl işi olduğu vurğulanan məqalədə qeyd edilmişdir ki, dünyada tanınmış “Beltmann” pianolarının təsisçisinin nəvəsi olan Beltmann iki il əvvəl Azərbaycan hökumətinin dəvəti ilə Qəbələdə piano zavodu açmışdır.

Qəzetə müsahibəsində Beltmann müəssisənin işçilərinə bir neçə ay musiqi alətini düzəltməklə bağlı dərslər keçildiyini bildirmişdir. O, qeyd etmişdir ki, zavodda 10 ay ərzində 500 piano hazırlanmışdır.

Zəhərli olduğu üçün poliesterlə işləmədiyini deyən Beltmann diqqətə çatdırmışdır ki, Azərbaycana zavod açmağa dəvət olunan zaman da yeganə şərt bu olmuşdur. O, təbii, qeyri-toksik materiallardan istifadə edildiyini bildirmiş, Qəbələ piano zavoduna ağacların Almaniya, Çexiya və Avstriya arasında yerləşən kiçik kənddən gətirildiyini qeyd etmişdir.

Beltmann bildirmişdir ki, dünyada ən yaxşı ağac, məhz həmin ölkələrdədir. Tonun əla olması üçün pianonun taxtası mükəmməl olmalıdır. Müəssisədə 330 nəfərlik konsert zalı vardır. Eyni zamanda, zavodda piano akademiyasının yaradılması da nəzərdə tutulur.

Qeyd edək ki, “Beltmann” pianolarından ibarət Almaniyada ayrıca sərgi salonu vardır. Daha iki sərgi salonunun isə Moskva və Bakıda açılması nəzərdə tutulur.

Səs.- 2011.- 13 avqust.- S. 14.