Milli mücadilənin qəhrəmanlıq yolu...

Darısqal otaqda qoyulan divanın üstündə oturub ermənilərin zaman-zaman Azərbaycan xalqına qarşı törətdiyi terror aktlarından danışmağa başladıq. 1-2 dəqiqəlik giriş üçün bəs edən bu söhbətdən sonra E.Həsənovun uşaqlıq dövründən, məktəb illərindən, zabit olaraq cəbhəyə getməsindən söhbət açması üçün valideynlərinə müraciət etdik.

Bu sualımız Nazilə ananı yenidən ağlamağa, dizinə döyüb ağı deməyə vadar etdi: “Vətənə oğul böyütdüm. Boylu-buxunlu, enli kürəkli Elşadım. Ay ellər, ay obalar, əgər oğlum müharibə vaxtı erməni gülləsinə tuş gəlsəydi, el anaları kimi bu, məni də yandırmazdı. Atəşkəs deyilən bu məqamda oğlumun erməni snayperi ilə öldürülməsi məni yandırır”.

Nazilə ana çox ağı dedi. Dizinə vurub ağladı. Özümüzü dəhşətli bir faciə mühitində boğulduğumuzu düşündüyümüzdən və için-için daxilimizdə biz də ağladığımızdan, ananın nə dediyini ağrılı səslə nələr danışdığını eşitmədik. Bu cür ağır, müdhiş olay bir xeyli çəkdi. Nə qədər təskinlik verməyə, ananı ovundurmağa çalışsaq da, ana ağrısı, ana nisgili-dərdi cəhdlərimizi nəticəsiz qoydu.

E.Həsənovun xalası Nailə ağlaya-ağlaya bu sözləri dedi: “Elşad zabit olmağa ona görə üstünlük verdi ki, erməni vəhşiliyinə cavab vermək istəyirdi. Nəslimizdə iki nəfər ermənilər tərəfindən öldürülüb, iki nəfər isə ömürlük şikəst olub. 11-si sinfi qurtarıb Heydər Əliyev adına Hərbi Akademiyaya daxil olanda sevincinin həddi-hüdudu yox idi. Cəbhəyə getməyə daha çox cəhd göstərirdi. Çox çalışdıqdan sonra, istəyinə nail oldu. Akademiyanı qurtardıqdan sonra Cəlilabadda yerləşən hərbi hissəyə, oradan isə cəbhəyə göndərildi. 2011-ci il iyun ayının 20-də isə 10 nəfərlə hərbi rütbənin artırılması məqsədilə Bakıda imtahandan keçdi və uğur qazandı “.

N.Hidayətova onu da bildirdi ki, Elşadın qardaşı Rəşad Həsənov da hazırda Xızıda yerdəşən “N” saylı hərbi hissədə xidmətdədir. O da qardaşının və digər şəhidlərimizin qisasını almaq üçün cəbhəyə getməyə səylər göstərir. R.Həsənov da əmindir ki, onun arzusu reallaşacaq və hərbi rəhbərlik onu cəbhəyə göndərəcək.

Həmyaşıd olsaq da, Elşad bizə böyük qardaş idi

Söhbətimizin Nailə xanımla davam etdirilməsi onun qəhərlənməsi ilə yarımçıq kəsildi. Bu arada Elşadın dostları ilə danışmağa səylər göstərdik. Onlar üçün də bu itki ağır və kədərli olsa da, suallarımıza hüznlü şəkildə cavab verirdilər. Elşadın dostları Nurlan Nəsirov, Rüstəm Hüseynov, Ariz Məmmədov bildirdilər ki, haqq dünyasına qovuşan şəhid E.Hüseynov yaxşıların ən yaxşısı idi. O, bizimlə eyni yaşda olsa da, böyük qardaş kimi hər zaman bizə məsləhətlər verir, doğru yol göstərirdi. N.Nəsirov bildirdi ki, Elşad oxuduğu 6 saylı Mingəçevir şəhər orta ümumtəhsil məktəbində seçilən şagirdlərdən olub. O, yaxşı oxumaqla yanaşı, tərbiyəli, abırlı və həyalı uşaqlardan idi.

Ariz Məmmədov isə bildirdi ki, E.Həsənov haqsızlığa və ədalətsizliyə qarşı hər zaman barışmaz olub. Gücsüzü, zəifi müdafiə etmək onun amalına çevrilmişdi. A.Məmmədov onu da söylədi ki, E.Həsənov heç zaman kişinin zəif, iradəsiz olmasını qəbul etməyib. Deyirdi ki, kişi olan şəxs iradəli olmalıdır.

Elşad Həsənovun digər dostu Rüstəm Hüseynov isə şəhidin dostlarına diqqətcil olması ilə seçildiyini bildirdi. Qeyd etdi ki, 2011-ci il 28 iyununda onun ad günü idi. E.Həsənov işinin çox, vaxtının az olmasına baxmayaraq, telefonla ona zəng edib ad gününü təbrik edib. Deyib ki, o gün olacaq ki, bütün dostlar ad günlərini, xalqımız isə toy-büsatını işğal altında olan torpaqlarımızda qeyd edəcək.

Mingəçevir şəhidləri

Elşad Həsənovun uyuduğu məzarlığı ziyarət etmək üçün Mingəçevir şəhər Şəhidlər Xiyabanına getməli olduq. İlqar Quliyevin və şəhidin atası Həsənəli Həsənovun, eləcə də, YAP Mingəçevir şəhər təşkilatının təlimatçısı Yaqub Hüseynovun iştirakı ilə Şəhidlər Xiyabanında artıq sayı 300-dən yuxarı olan şəhidlərimizin məzarını ziyarət etdik. Onların ruhuna dualar oxuyub, Allahdan şəhidlərimizə rəhmət dilədikdən sonra Elşad Həsənovun hələ üstü götürülməmiş məzarı üstündə dayandıq. Qəddi-qaməti əyilmiş Həsənəli kişi oğlunun məzarına bir xeyli baxıb, nalə çəkirmiş kimi köks ötürdü. Qeyri-ixtiyari gözlərindən axan göz yaşlarını əli ilə silə-silə, asta addımlarla Şəhidlər Xiyabanından çıxdı.

İ.Quliyev bizə məlumat verdi ki, millət vəkili Aydın Mirzəzadənin təklifi və dəstəyi ilə burada Şəhidlər Muzeyi yaradılıb. Muzeydə hər bir şəhidin keçdiyi həyat yolu, onun döyüşdüyü cəbhə haqqında geniş məlumatlar yer alıb. İ.Quliyevin sözlərinə görə, şəhid Elşad Həsənova məxsus əşyalar, o cümlədən, zabit mundiri də muzeydə saxlanılacaq. İ.Quliyev onu da bildirdi ki, E.Hüseynovun 40 mərasiminə qədər Mingəçevir Şəhər İcra Hakimiyyəti şəhidin qəbrinin üstünü düzəltdirəcək.

Son olaraq

Mingəçevirdən ayrılırıq. Düşüncələr və xəyallar arasında var-gəl edirik. Nəhayət, erməni vandalizminə, erməni vəhşiliyinə son qoyulacaqmı? Zaman tezmi gələcək, inildəyən, əzilən torpaqlarımız düşmən tapdağından azad edilsin?! O vaxta çoxmu qalıb? Ev-eşiyindən didərgin düşən qaçqın və köçkünlərimiz öz yurd-yuvalarına qayıtsın. Bu düşüncələr içərisində sonda bir qərar verilir. Azərbaycan Prezidenti, Ali Baş Komandan İlham Əliyevin apardığı siyasət nəticəsində Xankəndində Azərbaycan bayrağının dalğalanmasına çox qalmayıb.

İ.ƏLİYEV

T.QURBANLI

Səs.- 2011.- 17 avqust.- S. 11.