“Müdriklik zirvəsi”

Azərbaycanın Ümummilli Lideri Heydər Əliyevin müdrik siyasəti ilə ölkənin tərəqqisinin və müstəqilliyinin yolunu müəyyənləşdirib, onun dünyanın sivil dövlətləri sırasında yer almasına nail olub. Yaşadığı zaman məsafəsində gördüyü işlər azərbaycançılıq məfkurəsindən irəli gələn amil olduğundan böyük ideyalarını reallaşdırıb. Bu gün Ulu Öndər Heydər Əliyevin təməlini möhkəmləndirdiyi müstəqil dövlətin uğur və nailiyyətləri Onun layihə və islahatların nəticəsində əks-səda doğurur. Müasir dövrümüzdə Azərbaycanın tərəqqisinə imza atan Dahi Öndər Heydər Əliyevin keçdiyi ömür yolu, siyasi fəaliyyəti müxtəlif janrda olan nümunələr vasitəsilə təqdim olunur. Belə nümunələrdən biri də bu günlərdə “Yazıçı” nəşriyyatında çapdan çıxmış Azərbaycan Mədəniyyət və Turizm Nazirliyinin Rusiyada Azərbaycan tarixi abidələrinin axtarışı üzrə komissiyanın sədri Ulxan Mirzəyevin “Müdriklik zirvəsi” kitabıdır. Kitab Ümummilli Lider Heydər Əliyevin əziz xatirəsinə və anadan olmasının 88-ci ildönümünə ithaf olunub. Yeni nəşrə Ümummilli Lider haqqında kütləvi informasiya vasitələrində çap olunmuş məqalələr toplanmışdır.

“Müdriklik zirvəsi”nə ön söz yazan Milli Məclisin deputatı, siyasi elmlər doktoru, professor Aqiyə Naxçıvanlı “Azərbaycanın əbədi tərəqqisinin banisi” başlıqlı məqaləsində Heydər Əliyevin xalqın xilaskarı tək gördüyü işləri qələmə alaraq, Azərbaycanın bugünkü zirvələrə doğru ucalmasını və sabahına olan inamını bu tarixi şəxsiyyətin adı ilə bağlı olduğunu diqqətə çatdırır. Qeyd edir ki, müstəqillik dövrümüzdə Azərbaycanın iqtisadi qüdrətinin tərəqqisində məxsusi rol oynayan Heydər Əliyevin strateji əhəmiyyət daşıyan neft siyasətinə üstünlük verməsi Onun uzaqgörən müdrik siyasəti nəticəsində ortaya çıxmışdır. Millət vəkili Heydər Əliyevin ölkəyə rəhbərlik etdiyi zaman məsafəsində qazanılan uğurları diqqətə çəkir.

Kitabın müəllifi U.Mirzəyev “Xalqa həsr olunmuş ömür” başlıqlı məqaləsində Heydər Əliyevin dövlət və cəmiyyətin idarə olunmasında məxsusi siyasi dünyagörüşünü diqqətə çəkərək, Onun hər bir addımını xalqa, insanlara olan məhəbbəti ilə əlaqələndirir. O, qeyd edir ki, Heydər Əliyev Azərbaycanı dünyanın inkişaf etmiş dövlətləri səviyyəsinə qaldırmağa nail olmuşdur. İstər sovet dövründə, istərsə də müstəqilliyimiz tarixində Heydər Əliyevin Azərbaycan iqtisadi, siyasi problemlərinin həllində müdrikcəsinə siyasi manevrlər etmiş, dövlətin güclənməsinə nail olmuşdur. Heydər Əliyev xarici siyasətində dahi diplomatlara xas olan fəaliyyətini davam etdirmişdir. Onun fəaliyyəti nəticəsində siyasi-ideoloji müstəvilər, buxovlar aradan götürülmüşdür. Müəllif bildirir ki, Ulu Öndər Heydər Əliyevin əsəri olan müasir müstəqil Azərbaycan dövlətinin bugünkü dinamik inkişafı beynəlxalq aləmdə yüksək qiymətləndirilir. Ümumdünya tarixinin dahi şəxsiyyətlərindən biri olan Heydər Əliyevin qurub-yaratdığı müasir Azərbaycan dirçəliş yolundadır.

Kitaba daxil edilən Milli Məclisini deputatı Fəttah Heydərovun “Azərbaycanın uğur yolu Heydər Əliyev yoludur” başlıqlı yazıda Ümummilli Liderin 14 iyul 1969-cu il tarixindən başlayaraq Azərbaycanın milli dirçəlişi, dövlətin qüdrətinin yüksəlməsi yolundakı fəaliyyətini diqqətə çəkir. F.Heydərov Ulu Öndər Heydər Əliyevin siyasi görüşünün, müdrikliyinin nəticəsi olaraq dövlətlərarası münasibətlərin yaranmasında, Azərbaycanın beynəlxalq arenada müstəqil dövlət olaraq sözünü deməyi bacaran ölkə kimi tanınmasında rolunu göstərir. Siyasi mübarizədə Heydər Əliyev məntiqi qələbə çaldı. Onun həyata keçirdiyi missiya Azərbaycanı düçar olduğu bəladan xilas etdi.

Milli Məclisin deputatı, YAP İcra katbinin müavini Mübariz Qurbanlının “Liderlik zirvəsi” məqaləsində ötən əsrin 60-cı illərində sovetlər ittifaqında geridə qalmış bir ölkənin mənzərəsinin Heydər Əliyevin siyasi hakimiyyətə gəlişi ilə dəyişdiyini göstərir. Onun rəhbərliyi dövründə Azərbaycanın ittifaq miqyasında əhəmiyyəti artır. Müstəqillik dövründə isə ölkədə baş almış anarxiya və xaosun qarşısının alınmasında siyasi məfkurəsini və iradəsinin əzmi ilə nail olduğunu diqqətə çəkir. Mübariz Qurbanlı qeyd edir ki, Ulu Öndər Heydər Əliyevin ən böyük xidmətlərindən biri Azərbaycanın öz təbii sərvətlərinə sahib çıxması və onun dünyanın əsas neft-qaz ixracatçısına çevrilməsidir. Dahi Öndər Heydər Əliyevin həyata keçirdiyi nəhəng layihələrdən biri neft strategiyasıdır ki, bu, müasir dövrümüzdə də Azərbaycan üçün həm siyasi, həm də iqtisadi dividendlər gətirməkdədir.

“Müdriklik zirvəsi” kitabında millət vəkilləri Nizami Cəfərovun “Heydər Əliyev Azərbaycanın Atatürkü”, Mirkazım Kazımovun “Dünya Azərbaycanlılarının birliyi müstəqil Azərbaycanı daha da qüdrətləndirir”, Rafael Hüseynovun “Millət müəlliminə tarixin qiyməti”, eləcə də, “Yeni Azərbaycan” qəzetinin baş redaktoru Hikmət Babaoğlunun “Ulu Öndər Heydər Əliyev həm tarixi yaşadan, həm də tarixi şəxsiyyət”, “Səs” qəzetinin baş redaktoru Bəhruz Quliyevin “Heydər Əliyev yolu - sabaha inamla aparan yol”, AMEA-nın İqtisad İnstitutunun direktoru İsa Alıyevin və iqtisad elmləri namizədi Aqil Əsədovun “Heydər Əliyev müstəqilliyimizin və dinamik iqtisadi inkişaf strategiyamızın memarıdır” və digər müəlliflərin məqalələrində Heydər Əliyev şəxsiyyəti, Onun Azərbaycana verdiyi töhfələr və ölkənin inkişafına yol açan siyasi kursuna diqqət yetirilir. Qeyd olunur ki, bu gün müstəqil Azərbaycan dövlətinin dünyadakı nüfuzu getdikcə artmaqdadır. Azərbaycan bir çox beynəlxalq ittifaq və təşkilatların üzvüdür. Bu gün Azərbaycana Heydər Əliyev yolunun layiqli davamçısı Azərbaycan Prezidenti İlham Əliyev başçılıq edir. Heydər Əliyev siyasəti Azərbaycanda yaşayır və qalib gəlir. Heydər Əliyevin demokratik, hüquqi və dünyəvi dövlət quruculuğu siyasəti uğurla davam etdirilir. Onun rəhbərliyi ilə ölkədə iqtisadi islahatlar daha da sürətlənmişdir. Prezident İlham Əliyev Ümummilli Liderin Azərbaycan xalqının milli-mənəvi dəyərlərinin qorunub saxlanılması və daha da inkişaf etdirilməsi kursunu uğurla həyata keçirir. Geniş dünyagörüşünə, hərtərəfli biliyə, yüksək intellektə malik olan İlham Əliyev müasir və çevik siyasətçi kimi dünyada böyük hörmət və nüfuz qazanıb. Kitabda qeyd olunduğu kimi, O, sürətlə dəyişən çağdaş dünyada, qloballaşma və inteqrasiya prosesində, bütün beynəlxalq görüşlərdə və apardığı yüksək səviyyəli danışıqlarda Azərbaycanın mənafelərini bütün sahələrdə uğurla müdafiə edir. Prezident İlham Əliyevin həyata keçirdiyi müdrik daxili islahatlar və uzaqgörən, məqsəyönlü xarici siyasəti sayəsində Azərbaycan Cənubi Qafqazda lider dövlətə çevrilib.

NƏZAKƏT ƏLƏDDİNQIZI

Səs.- 2011.- 19 avqust.- S. 6.