Məhəmmədhüseyn Şəhriyar - 100

Azərbaycan Milli Elmlər Akademiyasının akademik Ziya Bünyadov adına Şərqşünaslıq İnstitutunda Məhəmmədhüseyn Şəhriyarın 100 illik yubileyinə həsr olunmuş jurnal işıq üzü görüb. İnstitutun nəşri olan “Azərbaycan şərqşünaslığı” jurnalının növbəti sayı XX əsr Azərbaycan poeziyasının ən görkəmli nümayəndələrindən biri Məhəmmədhüseyn Şəhriyarın həyat və fəaliyyətini özündə ehtiva edir.

Məhəmmədhüseyn Şəhriyarın anadan olmasının 105 illiyinə həsr olunmuş jurnal institutun direktoru, filologiya elmləri doktoru, professor Gövhər Baxşəliyevanın “Milli ruhun təntənəsi” yazısı ilə açılır. Jurnalın “Şəhriyarın ömür səhifələri” rubrikasında institutun elmi işçisi Afət Rüstəmovanın fars dilindən tərcümə etdiyi yazılar, “Şəhriyarın fikir və sənət dünyası” bölməsində filologiya üzrə fəlsəfə doktoru Nüşabə Əlizadənin “Azərbaycan şəhriyarşünaslıq məktəbi”, filologiya üzrə fəlsəfə doktoru Səadət Şıxıyevanın “Şəhriyarın “Divani-türki”sində irfani düşüncənin ifadəsi”, filologiya elmləri doktoru Elman Quliyevin “Heydərbaba” yüksəkliyi - sənət möcüzəsi”, iqtisadiyyat üzrə fəlsəfə doktoru Əkrəm Rəhimlinin “Milli oyanışda Şəhriyar poeziyasının rolu”, Ruhəngiz Məmmədovanın “Şəhriyarın anadilli şeirlərinin bəzi poetik xüsusiyyətləri” məqalələri dərc olunub.

Məhəmmədhüseyn Şəhriyar poeziyasının dili ilə bağlı Lefkə Avropa Universitetinin assistent-professoru Nazim Muradovun “Şəhriyarın “Heydərbabaya salam” poemasında dildə qənaət qanunu modelinə uyğun strukturlar haqqında”, filologiya üzrə fəlsəfə doktoru Aybəniz Həsənovanın “Şəhriyarın fars “Divan”ında felin semantik-üslubi xüsusiyyətləri” məqalələri dərc olunub.

Bütün bu məqalələrdə Məhəmmədhüseyn Şəhriyarın keçdiyi sənət yoluna, onun şaxəli yaradıcılığına diqqət yetirilir. Şairin əzablı və mübarizələrlə zəngin yolu, həyatı yaradıcılığından yan ötməmişdir. Özünə məxsus bir sənət möcüzəsi yaradan şair məhz bu dəyərləri baxımından tədqiq olunur, öyrənilir, sənət görüşlərinə münasibətlər ifadə olunur.

“Azərbaycan şərqşünaslığı” jurnalının “Tərcümə” bölməsində institutun direktor müavini, filologiya üzrə fəlsəfə doktoru Məsiağa Məhəmmədinin farscadan çevirdiyi Şəhriyarın “Mövlana Şəms Təbrizinin xanəgahında” əsəri, həmçinin, filologiya üzrə fəlsəfə doktoru Esmira Fuadın (Şükürova) yeni çap olunmuş “Söz sərrafı Şəhriyar” kitabı haqqında filologiya elmləri doktoru Almaz Məmmədovanın rəyi çap olunub.

Sonda Məhəmmədhüseyn Şəhriyar nisgili ilə yazılmış Bahəddin Karakoçun “Gün sızlayır Şəhriyar”a və Seyid Nurəddin Dərafərinin “Heydərbaba” şeirləri oxuculara təqdim olunub.

Qeyd edim ki, 7 dekabr tarixində AMEA Rəyasət Heyətində akademik Ziya Bünyadov adına Şərqşünaslıq İnstitutunun təşkilatçılığı ilə Azərbaycan xalqının böyük şairi, XX əsr Şərq poeziyasının görkəmli nümayəndəsi Məhəmmədhüseyn Şəhriyarın 105 illiyinə həsr olunmuş elmi konfrans da keçiriləcək. Elmi konfransda Məhəmmədhüseyn Şəhriyarın fəlsəfi görüşlərinə nəzər salınacaq, onun əsərlərinə elmi cəhətdən münasibət ifadə olunacaq.

Zümrüd

Səs.- 2011.- 7 dekabr.- S.12.