“ƏBƏDİYAŞAR LİDER”

Dünən “Səs” qəzeti redaksiyasında “ƏBƏDİYAŞAR LİDER” mövzusunda növbəti dəyirmi masa keçirildi. Dəyirmi masada Prezident Administrasiyasının beynəlxalq əlaqələr şöbəsinin müdiri Novruz Məmmədov, YAP İdarə Heyətinin üzvü Kərim Kərimov, millət vəkili Fəzail Ağamalı, YAP Siyasi Şurasının üzvü, “İki sahil” qəzetinin baş redaktoru Vüqar Rəhimzadə, “Yeni Azərbaycan” qəzetinin baş redaktoru Hikmət Babaoğlu, “Səs” qəzetinin baş redaktoru və “Səs” İnformasiya Agentliyinin baş direktoru Bəhruz Quliyev, eləcə də, mətbuat nümayəndələri iştirak etdi. Qonaqları salamlayaraq, dəyirmi masanı açıq elan edən “Səs” qəzetinin baş redaktoru, SİA-nın baş direktoru Bəhruz Quliyev dövlətimiz və xalqımız qarşısında əvəzsiz xidmətləri olmuş Ulu Öndər Heydər Əliyevin əbədi olaraq yaddaşlara həkk olunduğunu bildirdi.

Bəhruz Quliyev: “Azərbaycan xalqının Ümummilli Lideri Heydər Əliyev,

sözün əsl mənasında, bütün ömrünü öz xalqına həsr etdi”

- Artıq bildiyimiz kimi, “Səs” qəzeti redaksiyasında ölkəmizdə cərəyan edən mühüm hadisələrə, eləcə də, ən aktual məsələlərə həsr edilmiş ənənəvi dəyirmi masalar keçirilir. Bugünkü dəyirmi masanın mövzusu isə Ulu Öndərimizin anım gününə həsr edilmişdir.

Azərbaycan xalqının Ümummilli Lideri Heydər Əliyev, sözün əsl mənasında, bütün ömrünü öz xalqına həsr etdi. O, hər zaman qədirbilən xalqımızın qəlbində əbədi olaraq yaşayacaq.

Bu gün qazanılan hər bir uğur, hər bir nailiyyət Ulu Öndərin zamanında istiqamətləndirdiyi uğurlu siyasi kursun və strategiyanın məntiqi nəticəsidir. Məhz bu gün həmin müdrik siyasət Prezident İlham Əliyev tərəfindən uğurla davam etdirilir.

Novruz Məmmədov: “Ümummilli

Liderimiz Heydər Əliyev haqqında söz demək, onu əldə etmək üçün uzun müddət Onun fəaliyyətini öyrənmək lazımdır ki, müxtəlif yollarla sözü

demək zirvəsinə çata biləsən”

- Ümummilli Liderimizin xatirəsi hamımızı üçün həmişə əzizdir və bu günlər də bir daha toplaşaraq, Onu xatırlayır, Onun haqqında fikirlərimizi söyləyirik və Onun gördüyü işləri, apardığı siyasəti ətrafında fikir mübadiləsi aparırıq. Bu gün böyük dahi, siyasi dövlət xadim Ulu Öndər Heydər Əliyev haqqında söz demək, fikir söyləmək çox çətindir. Eyni zamanda, Ümummilli Liderimiz Heydər Əliyev haqqında söz demək, onu əldə etmək üçün uzun müddət Onun fəaliyyətini öyrənmək lazımdır ki, müxtəlif yollarla sözü demək zirvəsinə çata biləsən. Qeyd etmək istərdim ki, cəmiyyətlərin, xalqların tarixində elə bir dövrlər olub və xalqlar elə bir situasiyaya gəlib çıxıblar ki, bu xalqlar oradan çıxış yolu tapmaq üçün hər bir addımı atmağa hazır olur. Belə hadisə 1988-ci ildə “Azadlıq” meydanına bütün Azərbaycanın nümayəndələrinin toplanması ilə ölkəmizdə də oldu. Bu da bir tarixi qanunauyğunluq idi. Bu hadisənin uzun müddət təşkilatlanmadan baş verməsi, sözsüz ki, nəticədə baş verən proseslərlə özünü bəlli etdi. Belə bir prosesi bizim xalq da yaşadı. Və əslində, nəyisə istəmək asandır, ancaq onu yerinə yetirmək həmişə, hər zaman çətin olur. Həmin dövrü hər birimiz keçmişik.

Millətimizin, xalqımızın xoşbəxtliyi onda oldu ki, öz liderini, deyərdim ki, vaxtında, zamanında tapa bildi. Çünki cərəyan edən proseslər elə proseslər idi ki, həmin dövrə kimi yetişməli idi. Belə ki, 1988-ci ildən 1991-ci ilə qədər insanların beynində keyfiyyət dərsi keçirildi. O vaxt müxtəlif qurumlar, insanlar arasında bir-birinə zidd fikirlər yaranmışdı. Ona görə də, həmin üç il ərzində xalq daha düzgün seçim etməyə nail oldu və bildi ki, Azərbaycanı bu çətin durumdan ancaq Heydər Əliyev çıxara bilər.

Digər bir fikrimi də bildirmək istərdim. Belə ki, dünyada böyük tarixi hadisələri vaxtında görüb düzgün qiymətləndirmək çətindir. Gəlin 1789-cu ildə Fransa burjua inqilabına müraciət edək. Belə ki, 20-30 il bu inqilab haqqında tamam başqa fikirlər səslənirdi. Ancaq bu gün, müasir dövrdə tamam fərqli fikirlər deyilir. 1989-cu ildə mən Fransada olarkən, orada iki böyük cəbhə yarandığının şahidi oldum. Birinci cəbhə bu inqilabın xalqa və tarixə heç bir şey vermədiyini, ikinci cəbhə isə birincinin əksini iddia edir və inqilabın 200 illiyini qeyd edirdi. Yəni demək istəyirəm ki, məhz o dövrdə baş verən hadisələrlə bağlı fikir söyləmək çətin olardı. Bu baxımdan da, Ümummilli Lider Heydər Əliyevin Azərbaycana rəhbər olması və bu 10 il ərzində Azərbaycanı çətinliklərdən, mürəkkəb proseslərdən çıxarmasını ölkəmizin alimləri, tədqiqatçıları, siyasətçiləri daha sonralar görəcəklər. Biz bunu intuisiv də olaraq, çalışıraq, düşünərək də görürük. Çünki Onun yolunu müqəddəs yol kimi qəbul edir və inanırdıq ki, yalnız bu yolla gedilə bilər. İstəməyənlər isə sonradan bir daha başa düşüblər ki, Ulu Öndərimiz Heydər Əliyevin yolu müstəqil Azərbaycanımızın uğurlu yoludur. Bu gün Azərbaycanımızın indiki şəraitdə xarici siyasətini təhlil etdikdə, bir daha bu uğurların Ulu Öndər Heydər Əliyev yolunun uğurlu nəticəsi olduğunun şahidi oluruq. Bütün bu nailiyyətlər - Azərbaycanın bugünkü uğurlu inkişafı Ulu Öndər Heydər Əliyevin düzgün strategiyasının nəticəsidir. Gürcüstan bir qədər tendensiyaların təsiri altına düşərək, iki bölgəsini itirdi və onların nə vaxt qayıtarılacağı bəlli deyil. Azərbaycan isə Gürcüstandan fərqli və ikili standartlar vəziyyətində yaşayır. Belə ki, Gürcüstanın arxasında Qərbin dayandığı açıq-aydın görünür. Bizim arxamızda isə 100 faiz haqqımız olan Dağlıq Qarabağı Qərbin ədalət naminə də dəstəkləmədiyini görürürük. Bundan sonra hansı proseslər baş verə bilərdi və belə vəziyyətdə Azərbaycanın axırı nə ola bilərdi? Bütün bunları o zaman Ulu Öndər Heydər Əliyev gördüyü üçün bizi zamanında bu yolla aparırdı. Özü də aparılan bu yol elə bir yol idi ki, büdürəmədən, müəyyən çətinliyə düşmədən onu qət edək.

Bu gün Heydər Əliyevin geosiyasi dühası ətrafında fikir söyləmək istəyirəm. Sözümün əvvəlində qeyd etdim ki, bəzən böyük hadisələrin, ümumiyyətlə, sonra təhlilini etmək mümkün olur. Amma dünya tarixində, dünya xalqlarının tarixində elə insanlar var ki, hadisələri vaxtında görə və qiymətləndirə bilir. Hətta gələcək haqqında proqnozlar da verə bilirlər. Ulu Öndər Heydər Əliyev məhz belə şəxsiyyətlərdən biri idi ki, o zaman bugünkü günü həm duya, həm də görə bilirdi.

Bəhruz Quliyev : “İnsanların qəlbində bir Liderə sevgi var idi”

- Bu dövrdə meydanda lider çatışmazlığı var idi. Lakin insanların qəlbində bir liderə sevgi var idi - O, Ulu Öndər Heydər Əliyev idi. Amma həmin dövürdə xalqın koordinasiya olunmasına və təşkilatlandırılmasına ehtiyac duyulurdu. Bunu bir qrup ziyalılar həyata keçirdilər və “Səs” qəzetində Ulu Öndərə müraciət etdilər...

Kərim Kərimov: “Ulu Öndər Heydər Əliyev bugünkü Azərbaycanın

yaradıcısı, müstəqil dövlətimizin

qurucusudur”

- Çox düzgün qoyulan bir məsələdir. Xatırlatmaq istərdim ki, Ulu Öndər Heydər Əliyevin 85 illiyi ilə əlaqədar Yeni Azərbaycan Partiyası “Heydər Əliyev və Azərbaycan” adlı kitab nəşr etdi. Həmin kitabda mən “Heydər Əliyev - azadlıq uğrunda mübariz” yazımla çıxış etmişəm. Ulu Öndər Heydər Əliyev haqqında bu günə qədər çox kitablar yazılıb, filimlər çəkilib. Əminəm ki, bundan sonra da yazılacaq və çəkiləcək. Çünki Ulu Öndər Heydər Əliyev bugünkü Azərbaycanın yaradıcısı, müstəqil dövlətimizin qurucusudur. Heydər Əliyev Azərbaycanı bu yola çıxarmaq üçün qətiyyəti, əzamkarlığı ilə çox çətinliklərə sinə gərmiş, hər bir əziyyətə, amansız təqiblərə məruz qalmışdır. Onu da xatırlatmaq istərdim ki, 1998-ci ildə mən Heydər Əliyevin seçki qərargahının təşkilat məsələləri üzrə müavini idim. Heydər Əliyev yerlərdə baş verən vəziyyətlə tez-tez maraqlanırdı, xalqın seçkiyə olan münasibəti ilə bağlı bizim fikirlərimizi soruşurdu, müəyyən qərarlar verərək, nəticələrə gəlirdi. Bu, o dövrlər idi ki, Azərbaycan kritik siyasi dövrlərindən birini yaşayırdı. Ölkə müxalifəti hər vəchlə aranı qarışdırmağa cəhdlər göstərir, dağıdıcılığa meyilliliyini sərgiləyirdi. Və məhz həmin dövrlərdə Azərbaycan xalqı bir daha öz müdrik seçimini etdi. Yəni Azərbaycan xalqı bir daha sübut etdi ki, hər zaman öz Liderinin yanındadır. Təbii ki, Azərbaycan xalqı öz Liderinə inandığı kimi, Ulu Öndər Heydər Əliyev də öz xalqını sevir, onun uğrunda müəyyən qüvvələrə qarşı qətiyyətli mübarizə aparırdı. O, dahi şəxsiyyət, uzaqgörən Lider idi. Bu gün 20 illiyini qeyd etdiyimiz Azərbaycanın müstəqilliyi məhz Ulu Öndərin böyük siyasətinin nəticəsidir.

“Səs” qəzetinin əməkdaşı: Süni maneələrə, ciddi problemlərə baxmayaraq, Ulu Öndər Heydər Əliyev xalqa, dövlətə gərəkli ömür sərf edib. Bu baxımdan, dahi öndərin ömrünü təlatümlərdən çıxıb, zirvələrə yüksələn ömür hesab etmək olarmı?

Fəzail Ağamalı: “Əgər Heydər Əliyev həmin dövrlərdə, yəni 1991-ci ildən hakimiyyətə gəlsəydi, nə torpaqlarımız işğal olunardı, nə də Azərbaycan çətinliklərlə üzləşərdi”

- Hər hansı bir çətinlikdən və situasiyadan çıxmaq üçün lider amili xüsusi rol oynayır. Bu baxımdan, 1988-ci ildən 1993-cü ilin iyununa qədər Azərbaycanda baş vermiş bütün kataklizmilərin doğurmuş olduğu ağır nəticələrin əsas səbəbi həmin zaman kəsiyində Heydər Əliyevin lider kimi millətinin önündə getməsi, imkan verməsi oldu. Əgər Heydər Əliyev həmin dövrlərdə, yəni 1991-ci ildən hakimiyyətə gəlsəydi, nə torpaqlarımız işğal olunardı, nə də Azərbaycan çətinliklərlə üzləşərdi. Lakin Azərbaycan xalqı vaxtında öz liderinə üz tutdu və bu gün Azərbaycan dövləti, Azərbaycan xalqı Ulu Öndər Heydər Əliyev siyasətini təqdir edir və Onun yolu ilə gedir. Və təbii ki, dahi şəxsiyyət Heydər Əliyev Azərbaycan xalqının tarixi durduqca, Azərbaycan dövləti yaşadıqca Lider adını özündə saxlayacaqdır.

“Səs” qəzetinin əməkdaşı: Vüqar müəllim, “Mənim həyatımın məqsədi müstəqil Azərbaycandır, Azərbaycan xalqı və dövlətidir” deyən Ulu Öndər bu məqsədlərini reallaşdıra bildimi?

Vüqar Rəhimzadə: “Bugünkü Azərbaycanımız, müstəqilliyimizin möhkəmlənməsi və ölkəmizin lider dövlətə çevrilməsi məhz Ulu Öndər Heydər Əliyevin müqayisə edilməyən siyasətinin məntiqi nəticəsidir”

- İlk öncə, “Səs” qəzetinə, eləcə də, qəzetin bütün kollektivinə öz təşəkkürümü və minnətdarlığımı bildirirəm ki, Ulu Öndərimiz Heydər Əliyevlə bağlı belə bir dəyirmi masa keçirir və biz də yaranmış bu şəraitdən istifadə edərək, Ulu Öndərimiz haqqında öz fikirlərimizi söyləyə bilirik. Çünki harada olmağımızdan asılı olmayaraq, Ulu Öndər Heydər Əliyevin adı səslənən yerdə Azərbaycan var, Azərbaycan dövləti var, Azərbaycan xalqı var. Çünki Heydər Əliyev dediyimiz zaman Azərbaycan, Azərbaycan dediyimiz zaman isə Heydər Əliyev başa düşülür. Bugünkü Azərbaycanımız, müstəqilliyimizin möhkəmlənməsi və ölkəmizin lider dövlətə çevrilməsi məhz Ulu Öndər Heydər Əliyevin müqayisə edilməyən siyasətinin məntiqi nəticəsidir.

Burada Azərbaycanın keçdiyi təlatümlü yollardan danışıldı və geniş fikir mübadiləsi aparıldı. Həqiqətən də, həmin dövrlər çox ağır və məşəqqətli günlər idi. Lakin bu ağır bir şəraitdə Ulu Öndər Heydər Əliyevin yaradıcısı olduğu Yeni Azərbaycan Partiyası xalq tərəfindən böyük sevgi və məhəbbətlə qarşılanırdı. Çünki Yeni Azərbaycan Partiyası tarixi zərurətdən yaranmış bir partiya idi. Yeni Azərbaycan Partiyası, qeyd etdiyimiz kimi, Azərbaycan xalqının keçirdiyi ən ağır durumlarında yaranmış siyasi təşkilatdır. İstər Yeni Azərbaycan Partiyasının yaranması, istərsə də Ulu Öndərimiz Heydər Əliyevin hakimiyyətə qayıdışı-bu amillərin hər ikisi də məhz xalqın çətinlikdən qurtuluşu, xilası demək idi. Azərbaycanın 91 nəfər ziyalısının sırasına mən də daxil olmaqla Ulu Öndərimiz Heydər Əliyevə müraciət edənlərdən olduğum üçün şərəf və qürur hissi duyuram.

Ancaq o illərdə hakimiyyətdə olan və Heydər Əliyevə qısqanclıqla yanaşan insanlar Yeni Azərbaycan Partiyasının yaranmasına maneçilik törətməyə çalışırdılar. Lakin bütün bu çətinliklərə baxmayaraq, Yeni Azərbaycan Partiyası yarandı və partiya getdikcə respublikanın bütün şəhər və rayonlarında təşkilatlanmağa başladı. Ulu Öndər Heydər Əliyev xalqın təkidli tələb və istəyi ilə 1993-cü il iyun ayının 15-də Azərbaycanda ikinci dəfə siyasi hakimiyyətə qayıdışı ilə ölkədə hərtərəfli islahatlar aparıldı. Belə ki, Azərbaycan müstəqilliyinin inkişaf etdirilməsi və beynəlxalq aləmdə lider dövlətə çevrilməsi istiqamətində böyük addımlar atdı. Azərbaycan bu gün Heydər Əliyev siyasətinin uğurlu inkişafı nəticəsində artıq lider dövlətə çevrilmiş və regionda öz sözünü deyən ölkə kimi böyük layihələrin həyata keçirilməsində uğurlara imza atmaqdadır.

Vaxt var idi ki, Azərbaycan beynəlxalq təşkilatlarda iştirak etmək üçün təşəbbüs göstərirdi. Lakin bu gün həmin təşkilatların özləri Azərbaycanla əməkdaşlıq etmək üçün maraqlıdırlar. Ümummilli Lider Heydər Əliyev dəfələrlə “Azadlıq” radiosuna verdiyi müsahibələrində qeyd edirdi ki, biz müxalifət naminə müxalifətdə olmayacağıq. Azərbaycanda insanların arzu və istəklərini reallaşdıran, gerçəkləşdirən bir partiya olacaq. Bu gün, həqiqətən də, Yeni Azərbaycan Partiyası Azərbaycan xalqının arzu və istəklərini reallaşdıran partiya olaraq, getdikcə xalqın əksər hissəsini ətrafında birləşdirib.

Bəhruz Quliyev: Ulu Öndərimiz 1993-cü il iyunun 15-də xalqın istək və təkidi ilə Azərbaycana ikinci dəfə ali siyasi hakimiyyətə gəldi. Bununla da Azərbaycanda baş verən vətəndaş müharibəsinə son qoyuldu. Azərbaycanı bir dövlət kimi özünə qaytardı. Ancaq həmin dövrə qədər çox böyük çətinliklər var idi. Belə ki, Ulu Öndər hakimiyyətə gəlişi ilə, xüsusilə, dövlət quruculuğu sahəsinə daha çox diqqət yetirdi. Ümumiyyətlə, Azərbaycan dövləti necə quruldu, vətəndaş cəmiyyəti hansı formada formalaşdı?

Hikmət Babaoğlu: “Heydər Əliyev Allah tərəfindən, İlahi tərəfindən xüsusi missiya ilə Azərbaycan xalqına göndərilmiş bir Liderdir”

- Bizlər bu gün həm tarix, həm də cəmiyyətimiz üçün çox vacib olan mövzunun müzakirəsinə toplaşmışıq. Burada məndən əvvəl çıxış edənlər Ulu Öndər Heydər Əliyevin Azərbaycanda hakimiyyətdə olduğu dövrləri müəyyən mənada və müxtəlif məqamlarla xarakterizə etdilər. Əsas etibarı ilə, ən yeni tariximiz, yəni Ulu Öndərimizin ikinci dəfə hakimiyytədə olduğu dövr haqqında geniş fikirlər səsləndi. Bu çox vacibdir. Ancaq Ulu Öndəri xatırlayarkən, mütləq Onun fəaliyyətinin əvvəlki alt qatlarına da enmək lazımdır. Tezis olaraq deyirəm, Heydər Əliyev Allah tərəfindən, İlahi tərəfindən xüsusi missiya ilə Azərbaycana göndərilmiş bir Liderdir. Heydər Əliyevin Azərbaycan dövlətçiliyi qarşısında birinci xidməti Onun məhz Milli Təhlükəsizlik Nazirliyindəki fəaliyyəti ilə bağlı idi. Çünki Ulu Öndər Heydər Əliyevə qədər Azərbaycanın təhlükəsizliyini təmin edən orqan olan Milli Təhlükəsizlik Nazirliyi anti-Azərbaycançı mərkəz kimi çıxış edirdi.

(Ardı var)

RƏFİQƏ KAMALQIZI,

Səs.- 2011.- 8 dekabr.- S.8-9.