AZADLIQ, İSTİQLALİYYƏT, ƏDALƏTƏ APARAN YOL - ULU ÖNDƏR HEYDƏR ƏLİYEV YOLU

12 dekabr 2003-cü il hər bir Azərbaycan vətəndaşı üçün çox ağır bir gün olaraq yaddaşlara həkk olunub. Həmin gün xalqımızın xilaskarı, dövlətimizin qurucusu Ümummilli Liderimiz Heydər Əliyev haqq dünyasına qovuşdu. O gündən axın-axın insanlar Fəxri Xiyabana gedərək, Onun məzarını ziyarət edir, ruhuna dualar oxuyub, abidəsi önünə gül dəstələri düzürlər. Bununla bir daha dahi öndərimizə öz məhəbbətlərini ifadə etmiş olurlar. Yeni Azərbaycan Partiyası Qadınlar Şurasının sədri, YAP Siyasi Şurasının üzvü, professor Nurlana Əliyeva söhbət əsnasında bildirdi ki, ziyalı xalqının, vətəninin təəssübünü çəkəndə, özünün yox, ölkəsinin milli maraqlarına xidmət göstərəndə daha hörmətli, sevilən və unudulmaz olur:

- Öncə, onu deyim ki, 2003-cü ilin 12 dekabr tarixi hər bir Yeni Azərbaycan Partiyasının üzvü üçün, hər bir qədirbilən Azərbaycan vətəndaşı üçün çox ağır bir gün oldu. Çünki Ulu Öndər Heydər Əliyevin Azərbaycan vətəndaşlarının həyatında çox müstəsna rolu var. O mənada ki, Ümummilli Liderimiz Azərbaycanımızı məhv olmaqdan, uçurum kənarından, həmçinin, bizləri gələcək nəsillərin qınağından xilas edib. Ən əsası isə, əsrlərdən bəri hər bir dövlətin, hər bir dövrün ziyalıya, onların sözünə və mövqeyinə böyük ehtiyacı olub, indi də belədir. Azərbaycan millətinin mentalitetində böyüyə, ağsaqqala, müəllimə, ziyalıya xüsusi münasibət, özəl ehtiram var. Ulu Öndər Heydər Əliyev də daim cəmiyyətdə ziyalı missiyasına böyük önəm verib, ziyalıları, xalqını və dövlətini sevənləri həmişə yüksək qiymətləndirərək, onların fədakar əməyini dəyərləndirib. Yeri gələndə onlarla məsləhətləşmələr aparıb, təkliflərini dəstəkləyib, onlara inanıb və arxalanıb.

Ulu Öndər Heydər Əliyev xalqımızın təkidli tələbi ilə Azərbaycanın ən çətin, ən gərgin illərində hakimiyyətə gələrək, bu çətinlikləri öz bacarığı, praqmatik siyasəti ilə dəf etməyi bacardı və ölkəmizi inkişaf yoluna çıxardı. Azərbaycan müstəqillik qazandıqdan sonra məhz Heydər Əliyevin uzaqgörən siyasəti sayəsində ötən əsrin əvvəllərində repressiyaya məruz qalmış, mühacir həyatı yaşamış neçə-neçə şəxsiyyətlər, alimlər, dövlət xadimləri, şair və yazıçılar, incəsənət adamları, ordu sərkərdələri, adı və xidmətləri unudulmaqda olan dəyərli ziyalılarımız yenidən xalqın mənəvi yaddaşına qaytarıldı. Bütün Azərbaycan bilir ki, bu əlçatmaz həqiqətlərin reallaşması məhz Ümummilli Lider Heydər Əliyevin Azərbaycan varlığını bütün dünyada təsbit etmək məramından irəli gəlirdi. Bu, həm də dünyanın ən böyük Azərbaycanlısı olan Heydər Əliyevin görkəmli dövlət xadimi olmaqla yanaşı, eyni zamanda, əsil ziyalılığından xəbər verirdi.

Hər dövrdə, hər cəmiyyətdə tərbiyə o halda uğurlu olur ki, onun əyani şəxsi nümunəsi olsun. Tarix bu nümunəni bizə bəxş etməklə gənc nəslin tərbiyə işinə böyük töhfə vermişdir. Milli ruhda tərbiyə alan insanın ən yaxşı ideal nümunəsi öndərin mübarizələr və qələbələr dolu bioqrafiyasıdır. Etiraf etməliyik ki, biz bu bioqrafiyanın əsas mənasını, pedaqoji fəlsəfəsini kifayət qədər tədris və təbliğ edə bilmirik. Rəhbərin həyat yolunu əks etdirən materialların, əyani vasitələrin, kitab və filmlərin azlığı və natamamlığı hiss olunur. Mövcud kino materiallarında sovet dövrünün təbliğat kitabları çox qabarıqdır. Bu ştampların arxasında Öndərin şəxsiyyətinin milli səciyyəsi, onun milli zəmin və dəyərlərlə bağlılığı öz əksini bəzən çox zəif tapmışdır. Heydər Əliyev şəxsiyyətindən söhbət gedərkən buraya Azərbaycanı da əlavə etmək lazım gəlir. Çünki Heydər Əliyev şəxsiyyəti Azərbaycanla bütövləşmiş, onun ruhu Azərbaycana, Azərbaycanın ruhu Heydər Əliyevə keçmişdir.

Azərbaycanın milli-mənəvi dəyərlərinə Ulu Öndərin ruhən bu qədər vurğunluğunu da, görünür, elə bu bağlılıqda axtarmaq lazımdır. Heydər Əliyevin milli-mənəvi dəyərlər məsələsində irəli sürdüyü prinsiplər, bu problemin həlli ilə bağlı müəyyənləşdirdiyi xətt, atdığı addımlar bəzən əsil mahiyyəti üzrə şərh olunmur və elmi yanaşmalarda müəyyən yanlışlıqlara yol verilir. Ümummilli Liderin bu sahədə xidmətlərinin, sadəcə olaraq, Azərbaycan ədəbiyyatına, mədəniyyətinə, incəsənətinə, təhsilinə, səhiyyəsinə yüksək qayğı kimi səciyyələndirilməsi bu işlərin gerçək miqyası üçün kifayət qədər dar çərçivədir. Çünki görülən bu işlər sadəcə qayğı göstərilməklə məhdudlaşa bilməz. Bütün bunlar ulularımızdan bizə gəlib çatan müqəddəs irsi göz bəbəyi tək qorunaraq gələcək nəsillərə əmanət edilməsi, Azərbaycan şüurunun, mentalitetinin, əxlaqının bütün dünyada təbliği, qəbul olunması üçün atılan düşünülmüş məqsədyönlü addımlardır.

Bu gün qüdrətli Azərbaycan öz şərəfli tarixi keçmişi ilə müasir dövrlərimizə qədər qətiyyətli addımlarla irəliləmişdir. Bu cür tarixi mərhələləri keçən ölkəmiz bu günlərdə daha bir qalibiyyət şərəfini xalqına və beynəlxalq aləmə sübut etdi. Azərbaycanın nüfuzlu beynəlxalq təşkilatlarda aktiv fəaliyyət dövrünə daha biri də əlavə olundu ki, bu təşkilatın nüfuzu dünyada baş verən qlobal dəyişikliklərə sirayət edir. Belə ki, Azərbaycanın da BMT kimi nüfuzlu qurumda söz demək və qərar vermək imkanının yaranması ölkəmizin ali qüdrətinin bariz nümunəsidir. Azərbaycanın BMT Təhlükəsizlik Şurasına qeyri-daimi üzv seçilməsi isə harada yaşamasından asılı olmayaraq, hər bir azərbaycanlının qəlbini qürur hissi ilə doldurur. Dünyanın hər yerindən gələn rəylər, xoş sözlər bunu söyləməyə əsas verir. Çünki ölkəmizin Dağlıq Qarabağ kimi köklü bir probleminin həlli istiqamətində belə mötəbər bir təşkilata üzvlüyün kömək olacağını hamı yaxşı başa düşür. Azərbaycanın artan gücünə və nüfuzuna yalnız düşmənlər sevinməyə bilər. Ulu Öndər Heydər Əliyev xalqımızın təkidli tələbi ilə Azərbaycanın ən çətin, ən gərgin illərində hakimiyyətə gələrək praqmatik siyasəti ilə bütün çətinlikləri dəf edərək ölkəmizi inkişaf yoluna çıxardı. Heydər Əliyevin həmin illərdə görmüş olduğu böyük işlərdən biri də YAP-ın yaradılması idi. YAP o dövrdə ölkənin istinadgahı, dayağı kimi, özünü Azərbaycanın xilasına həsr etməyi bacaran insanların bir araya gəldiyi qurum kimi yaranmışdı. YAP-ın təsis olunması və Ulu Öndərin rəhbərliyi altında ölkəmizin böyük ziyalılarının bir araya gəlməsi çox mürəkkəb durumda olan dövlətimizin gələcəyi baxımından da mühüm hadisə idi. YAP yaranandan dərhal sonra bütün fəallarımız, ziyalılarımız, cəmiyyətin hər təbəqəsindən olan insanlar, o cümlədən, qadınlarımız mütəşəkkil şəkildə partiyanın sıralarına gəldi. Mən Ümummilli Liderimizin anım günü ərəfəsində Onun ruhu qarşısında baş əyirəm. Azərbaycanda qeydə alınan iqtisadi inkişaf tempi beynəlxalq aləm tərəfindən də təqdir edilir. Onu da qeyd edim ki, Ulu Öndər Heydər Əliyevə qədər Azərbaycan qadınını böyük işlərə pərvazlandıran, ruhlandıran, onları dövlət idarəçiliyinə cəlb edən ikinci dövlət başçısı olmayıb. Qadınların hər zaman aparıcı qüvvə olduğunu bildirən Ümummilli Liderimiz onların milli xüsusiyyətlərini olduqca yüksək dəyərləndirib. Təsadüfi deyil ki, Ümummilli Liderimiz Heydər Əliyevin ikinci dəfə dövlət rəhbərliyinə qayıdışından sonra qadınlarımızın ictimai-siyasi həyata transformasiyası, onların dövlət idarəçiliyində təmsilçiliyi, xanımlarımızın bütün sahələrdə kişilərlə bərabər hüquqlara malik olması dövlət idarəçiliyi kursunun prioritet istiqamətlərindən birinə çevrilib. Müstəqil Azərbaycan dövləti BMT-nin “Qadınlara münasibətdə ayrı-seçkiliyin bütün formalarının ləğv olunması” haqqında Konvensiyaya qoşulub. Ulu Öndər Heydər Əliyevin Fərmanı ilə Qadın Problemləri üzrə Dövlət Komitəsi yaradılıb. Yeri gəlmişkən, onu da qeyd edim ki, YAP Qadınlar Şurası da 1995-ci ildə məhz Ulu Öndərimizin təşəbbüsü ilə yaradıldı. O zaman cəmiyyətin bütün fəal qadınları partiyamızın sıralarına qoşuldular. Bu gün YAP cəmiyyətin siyasi avanqardı, respublikamızın ən nüfuzlu siyasi qüvvəsidir. Bizim, doğrudan da, geniş potensialımız var. Bəlkə, elə buna görə də, yaşadığı zamanın və məkanın xarakterindən asılı olmayaraq, qərinələr boyu əxz etdiyi milli-mənəvi dəyərlərini, mental xüsusiyyətlərini qoruyub saxlayan Azərbaycan qadını gələcək taleyini daim inandığı, etimad bəslədiyi siyasi qüvvəyə etibar etmək istəyib. Hazırda Azərbaycan qadını beynəlxalq müstəvidə ölkəmizi, xalqımızı layiqincə təmsil edir. Xüsusilə, Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın fəaliyyəti bu baxımdan hər bir Azərbaycan qadını üçün bir örnəkdir. Mehriban xanımın fəaliyyəti nəticəsində xeyriyyəçilik ölkədə bir hərəkata çevrilib. “Yeniləşən Azərbaycana yeni məktəb” layihəsi hər bir vətəndaşın arzusunun reallaşmasının ifadəsidir. Azərbaycanın zəngin mədəniyyətinin incisi sayılan muğamın geniş təbliği, milli-mədəni dəyərlərimizin qorunub saxlanması istiqamətində atdığı addımlar, təhsilin, səhiyyənin inkişafına verdiyi əvəzsiz töhfələr Mehriban xanım Əliyevanın Azərbaycan qadınlarını layiqli şəkildə təmsil etdiyinin bir nümunəsidir.

Bu gün Ulu Öndər Heydər Əliyevin ideyalarını həyata keçirən Mehriban xanım Əliyeva miqyası və mahiyyəti etibarı ilə böyük işlərin təşəbbüskarıdır. Və son olaraq demək istəyirəm ki, Heydər Əliyev ideyalarının əsasında dövlətçilik fəlsəfəsi dayanır. Mən xüsusilə demək istəyirəm ki, Ulu Öndər Heydər Əliyevin qoyduğu bu yol bizi məbədə aparır. O məbəd azadlıq, istiqlaliyyət, ədalətli insanların məbədidir, o məbəd zəhmət, hünər məbədidir. O məbəd daima bizi özünə tərəf səsləyir. Biz o məbədə tərəf getməyə bilmərik. Çünki həmin məbədin təməlində Ümummilli Liderimiz Heydər Əliyevin sarsılmaz ideyaları, Prezident İlham Əliyevin Azərbaycanın daha da qüdrətlənməsinə hesablanmış böyük, qlobal işləri durur.

RƏFİQƏ KAMALQIZI

Səs.- 2011.- 8 dekabr.- S. 6.