DİQQƏT VƏ QAYĞININ ALİ TƏZAHÜRÜ

Ölkə iqtisadiyyatının davamlı olaraq şaxələndirilməsi, daxili məhsul istehsalında qeyri-neft sektorunun inkişafı, sahibkarlara dövlət dəstəyinin gücləndirilməsi, regionların Dövlət Proqramlarına uyğun şəkildə inkişafına nail olunması, eləcə də, özündə mühüm tərəqqini ehtiva edən islahatların aparılması ölkənin böyük uğurlar qazanmasına güclü təkan verir. İqtisadiyyatda əldə edilən yüksək göstəricilər sosial sahənin inkişafına, ölkədə aparılan tikinti-quruculuq və abadlıq işlərinin genişləndirilməsinə, xüsusən də, əhalinin rifahının daha da yaxşılaşdırılmasına təkan verən faktorlardandır.

DAVAMLI VƏ UĞURLU STATİSTİK GÖSTƏRİCİLƏR

Bu gün Azərbaycanın hərtərəfli inkişafı hər bir vətəndaşın həyatında, maddi güzəranında özünü aydın şəkildə sərgiləyir. Xalq hər zaman belə bir həqiqəti təsdiq edir ki, ölkədə aparılan sosial siyasət uğurla davam etdirilir və bundan sonra da etdiriləcək. Buna misal kimi, 2011-ci ilin ötən ayları ərzində əldə olunan yüksək göstəricilərə diqqət yetirdikdə, görürük ki, bu zaman kəsimində əhalinin pul gəlirləri 19 faiz artmışdır. Əgər bu rəqəmi inflyasiya ilə müqayisə etsək, görərik ki, əhalinin gəlirləri iki dəfədən artıqdır. Bu il 900 minə yaxın pensiyaçının pensiyası orta hesabla 40 faiz artmışdır. Bütövlükdə götürsək, 9 ayda Azərbaycanda pensiyaların səviyyəsi əhəmiyyətli dərəcədə - 35 faiz artmışdır.

Ölkədə ünvanlı dövlət sosial yardımı üzrə proqramı çərçivəsində də böyük uğurlar əldə edilmişdir. Əhalinin aztəminatlı təbəqəsinə verilən ünvanlı sosial yardım isə davamlı olaraq icra edilir. Yeni təhsil, səhiyyə, idman-sağlamlıq ocaqlarının tikintiləri nəhəng layihələrlə reallaşdırılır. Həmçinin, ölkə iqtisadiyyatının inkişafına söykənən quruculuq-abadlıq işləri geniş vüsət almaqda davam edir. Son illərdə dövlət büdcəsinin 10 dəfə artırılması, yoxsulluq səviyyəsinin qısa müddətdə 49 faizdən 9 faizə endirilməsi mütərəqqi sosial göstəricidir. Bu isə, onu göstərir ki, hətta dünyanı bürüyən qlobal böhranlı ildə də Azərbaycanda yoxsulluğa qarşı çox ciddi mübarizə aparılıb, nailiyyətlər əldə olunub.

“...ƏSAS İSTİQAMƏTLƏR SOSİAL SAHƏYƏ AİD OLMALIDIR”

Əməkhaqlarının, pensiyaların davamlı olaraq artırılması, aztəminatlı ailələrə müavinətlərin verilməsi, şəhid ailələrinə və müharibə veteranlarına göstərilən maddi yardımların çoxalması dövlətin öz vətəndaşlarına göstərdiyi diqqət və qayğının parlaq təzahürüdür. Aztəminatlı sosial təbəqələrin sosial müdafiəsinin gücləndirilməsi məqsədilə Azərbaycan Prezidenti İlham Əliyevin müvafiq fərman və sərəncamları ilə minimum aylıq əməkhaqqının məbləği, işsizlik müavinətinin, peşə hazırlığı müddətində işaxtaran və işsiz vətəndaşlara ödənilən təqaüdün minimum məbləği, işləməyən əmək pensiyaçılarına ödənilən pensiya və müavinətlərin ümumi məbləğinin minimum həddi mütəmadi olaraq artırılır. Belə ki, bu günlərdə dövlət başçısı İlham Əliyevin əhalinin maddi rifahını daha da yaxşılaşdırmaq və sosial müdafiəsini gücləndirmək məqsədilə imzaladığı Sərəncama əsasən minimum əmək haqlarının məbləği 10 faiz artırılaraq, 93,5 manat müəyyən edilmişdir. Həmçinin, Prezident İlham Əliyev dövlət büdcəsindən maliyyələşdirilən təhsil müəssisələrində (ali təhsil müəssisələri istisna olmaqla) çalışan işçilərin aylıq vəzifə maaşlarının 10 faiz artırılması barədə mühüm Sərəncam imzalayıb.

Dövlət başçısı dəfələrlə bəyan edib: “Əsas istiqamətlər sosial sahəyə aid olmalıdır. Biz, ilk növbədə, sosial müdafiəni gücləndirməliyik və büdcəyə ediləcək əlavələr ən əvvəl sosial məsələlərin həllinə yönəldilməlidir.”

Hər il dövlət büdcəsinin xərclər bölümünün tərtibi zamanı sosial müdafiəyə ehtiyacı olan təbəqəyə xüsusi diqqət göstərilir. Bu kateqoriyaya aid insanların sosial müdafiəsinə ayrılan məbləğ ildən-ilə daha da artırılır. Belə ki, 2010-cu ilin dövlət büdcəsində sosialyönümlü xərclərin çəkisi 34,4 faiz (3 milyard 878 milyon manat) təşkil etmişdir ki, bu da 2009-cu ilin büdcəsindəki göstəricidən təxminən 1,8 faiz çoxdur. 2011-ci ildə isə sosial yönümlü xərclərin dövlət büdcəsindəki xüsusi çəkisi 33,3 faiz (4 milyard 234 milyon manat) təşkil etmişdir ki, bu da ötən illə müqayisədə 8,8 faiz çoxdur.

2012-ci ilin dövlət büdcəsində əhalinin sosial müdafiəsinin daha da gücləndirilməsi əsas istiqamət kimi müəyyən edilib. Ümumiyyətlə, növbəti ilin büdcəsi investisiya yönümlü və sosialyönümlü büdcə hesab edilir. Builki büdcə ilə müqayisədə 2012-ci ilin dövlət büdcəsinə ediləcək artımlar nəzərdə tutulan bütün sosial layihələrin uğurlu icrasına, əhalinin həyatının daha da yaxşılaşdırılması üçün əlavə tədbirlər görməyə imkan verəcəkdir.

GƏLƏCƏK PRİORİTETƏ HESABLANMIŞ UĞURLU SİYASƏT

Dövlət başçısı İlham Əliyev xüsusilə vurğulamışdır ki, görüləcək işlərdə konkret sosial proqramların icrası nəzərə alınmalıdır: “Həmişə olduğu kimi, büdcə həm investisiya yönümlü, həm də sosial yönümlüdür, konkret sosial proqramların icrası nəzərə alınmalıdır. İldən-ilə büdcə xərclərimiz də artır. Gələn il dövlət büdcəmizin xərcləri təqribən 22 milyard dollar həcmində olmalıdır. İcmal büdcə isə 25 milyard dollar səviyyəsində olacaqdır. Bu, çox böyük rəqəmdir, böyük məbləğdir. Əgər biz adambaşına düşən büdcə xərclərini hesablasaq, görərik ki, bu göstərici üzrə Azərbaycan dünya miqyasında ön sıralardadır. Növbəti aylarda, xüsusilə, 2012-2013-cü illərdə biz çalışmalıyıq ki, ölkə qarşısında duran əsas infrastruktur layihələrini icra edək”.

Azərbaycan xalqı bu siyasətə səmimiyyətlə, ürəklə inanır və qətiyyətli olaraq əmindir ki, əhalinin həyat səviyyəsi ildən-ilə daha da yaxşılaşacaq. Və şübhə yoxdur ki, gələcək illərdə də bütün əsas məsələlər öz həllini tapacaqdır. Dövlət başçısı İlham Əliyevin qeyd etdiyi kimi, bütün bu işlər, təbii ki, Azərbaycanın iqtisadi qüdrətinin artırılması, ölkə əhalisinin sosial müdafiəsinin daha etibarlı təminatı üçün görülür.

RÖVŞƏN NURƏDDİNOĞLU

Səs.- 2011.- 8 dekabr.- S. 2.