QƏLBLƏRDƏ ƏBƏDİ YAŞAYACAQ LİDER

Müstəqil Azərbaycan dövlətinin memarı, Azərbaycan xalqının dahi oğlu Ümummilli Liderimiz Heydər Əliyevin əbədiyyətə qovuşmasından 8 il ötür. Bu səkkiz il ərzində xalqımız öz liderini bir an belə unutmayıb. Hər zaman müasir Azərbaycanın qurucusu, dünyaşöhrətli siyasi xadim, ümumtürk dünyasının böyük oğlu Heydər Əliyev fəxr hissi ilə yad edilib.

Daşkəsən ictimaiyyəti Ulu Öndər Heydər Əliyevin anım gününü qeyd etdi

Ümummilli Lider Heydər Əliyevin vəfatının 8-ci ildönümü ilə bağlı Daşkəsən ictimaiyyəti tərəfindən dekabr ayının 1-dən 10-dək anım günü Onun ruhuna hörmət və ehtiram əlaməti olaraq silsilə tədbirlərlə qeyd olunur. Ümumtəhsil məktəblərində inşa yazı, rəsm müsabiqələri, Ulu Öndərin həyat və fəaliyyətinə həsr olunmuş disputlar, kompozisiyalar, dəyirmi masalar, mədəni-maarif müəssisələrində kitab sərgiləri, foto stendlər, oxucu konfransları və həyata keçirilən digər anım tədbirləri daşkəsənlilərin Ulu Öndər Heydər Əliyevə, Onun müqəddəs ideyalarına hörmət və ehtiramı olaraq iştirakçıların ürəyindən xəbər vermiş, onları Heydər Əliyevin şəxsi nümunəsində vətənə, xalqa, torpağa daha sədaqətli olmağa ruhlandırmışdır.

Dünən qeyd edilən tədbirlərin davamı olaraq rayon ictimaiyyətinin 5000-dən çox nümayəndəsi Ulu Öndərin rayon mərkəzində ucalan abidəsini ziyarət etmiş, abidə önünə gül-çiçək dəstələri düzmüş, dahi rəhbərə sonsuz hörmət və ehtiramlarını bir daha nümayiş etdirmişlər.

Mərasimdə çıxış edən Daşkəsən rayon icra hakimiyyətinin başçısı Əhəd Abıyev tədbir iştirakçılarına müraciətlə qeyd etmişdir ki, qəlbində vətənə, torpağa, xalqa istək gəzdirən hər birimizin əbədiyaşar Ulu Öndərə bugünkü firavan həyat, xoş gələcəyimiz üçün borcu çoxdur: “Azərbaycanın 1969-cu ildən başlayan, 30 ildən artıq davam edən bir dövrünə təsadüf edən ən yeni tarixi, həmin illər ərzində müstəqil dövlət kimi ölkəmizin və xalqımızın taleyi, ölkə həyatının bütün sahələrində nail olunan uğurlar böyük siyasətçi Heydər Əliyevin adı, yüz illərə hesablanmış ideyaları ilə bağlıdır. Həmin illər Azərbaycan tarixinin Heydər Əliyev dövrü kimi qiymətləndirilir. Çünki Ulu Öndər bütün ömrünü xalqına, vətəninə həsr etmiş bütün türk dünyasının Ümummilli Lideridir. “Mən ömrümün qalan hissəsini xalqıma bağışlayıram” deyən dahiyanə fikri Ulu Öndərimiz Heydər Əliyev həyatını Müstəqil Azərbaycanın uğurlu gələcəyinə həsr etdi. Ona tuşlanan təzyiqlərə mərdliklə sinə gərərək, Şərqə Günəş kimi doğan Müstəqil Azərbaycan dövlətini qurdu. “Heydər-Xalq”, “Xalq-Heydər” sevgisi daimidir, əbədidir. O, bizdən cismən ayrılsa da ideyaları, əməlləri həmişə bizimlədir və qəlbimizdə həmişə yaşayacaq”.

Mərasim iştirakçıları hüznlü musiqi sədaları altında rayonun mərkəzində ucaldılmış Ümummilli liderin abidəsi önündən keçərək, Onun ruhuna dualar oxuyublar.

Tərtərdə Ulu Öndərin anım günü qeyd olundu

Tərtər rayonunun 6 min nəfərdən çox sakini səhər saat 8-dən rayonun mərkəzində ucaldılan Ümummilli Lider Heydər Əliyevin abidəsi önündən keçərək, Onu ziyarət edib, abidəsi önünə gül-çiçək düzüblər. Mərasimdə uşaqdan tutmuş böyüyə qədər, hətta yaşı 80-i ötmüş qocalar da iştirak edərək Ulu Öndərin ruhuna dualar oxuyublar. Tərtər rayon icra hakimiyyətinin başçısı Ceyhun Cəfərov Ulu Öndərin Azərbaycan xalqı qarşısında misilsiz xidmətlərini tədbir iştirakçılarının diqqətinə çatdırdı. Qeyd etdi ki, tarixdə iz qoymaq hər bir şəxsiyyətə nəsib olmur. “Ulu Öndər Heydər Əliyevin bütöv həyatının və bütöv fəaliyyətinin bütün istiqamətləri xalqımızın bugünü və gələcəyi üçün böyük yoldur. Böyük bəlalardan və tarixin sərt sınaqlarından uğurla çıxmış Azərbaycan Prezident İlham Əliyevin rəhbərliyi altında daha uca və müqayisəolunmaz uğurlara imza atır.

YAP Tərtər rayon təşkilatının sədri Ramiz Şabanov bildirdi ki, tarixdə çox az sayda böyük şəxsiyyətlər olur ki, onlar öz dövrlərində mühüm və əbədi iz qoyurlar. Azərbaycan xalqının da xoşbəxtliyi ondadır ki, onu böyük bəlalardan və tarixi keşməkeşlərdən xilas edə bilən Ulu Öndər Heydər Əliyev kimi şəxsiyyəti olmuşdur. Bu böyük sərkərdə, xalqının böyük oğlu ömrünü birbaşa milli mənsubiyyəti uğrunda fəda etmişdir. Ulu Öndər Heydər Əliyevin idealları Azərbaycan xalqı üçün əbədi və müqəddəs bir yol olduğu üçün gələcək nəsillərin bu yolun möhtəşəmliyindən bəhrələnərək, vətənpərvər və milli ruhda yetişmələri üçün özlərinə nümunə götürmüş olacaqlar. Qoy Onun ruhu həmişə şad olsun.

Gədəbəydə Ümummilli Liderin əziz xatirəsi anıldı

YAP Gədəbəy rayon təşkilatı və Gədəbəy rayon icra hakimiyyətinin birgə təşkilatçılığı ilə Heydər Əliyev Parkında Ulu Öndərin abidəsi önündə Ümummilli Liderin anım gününə həsr olunmuş tədbir keçirildi. Əvvəlcə, tədbir iştirakçıları Heydər Əliyevin əziz xatirəsini bir dəqiqəlik sükutla yad ediblər. Tədbiri giriş sözü ilə açan rayon icra hakimiyyətinin başçısının birinci müavini Qüdrət Paşayev çıxışında Ümummilli Liderin Azərbaycanın ictimai-siyasi həyatındakı rolunu və mövqeyini qeyd edib, Onun Azərbaycanın memarı və qurucusu olduğunu diqqətə çatdırıb.

YAP Gədəbəy rayon təşkilatının sədri Ramazan Muradov çıxış edərək söylədi ki, keçmiş sovet dövrünün məhdud imkanlarından maksimum istifadə edərək Azərbaycanda milli şüurun dirçəldilməsi, milli ruhlu ziyalıların repressiya və təzyiqlərdən qorunması, mədəniyyətin, elmin, təhsilin inkişaf etdirilməsi, dövlət strukturlarındakı yüksək vəzifələrə milli kadrların yerləşdirilməsi, onlara mənəvi dəstəyin artırılması bu gün Azərbaycanda həyata keçirilən geniş quruculuq işləri üçün tarixi hazırlıq mərhələsi hesab olunur. Təşkilat sədri tədbir iştirakçılarına dünya şöhrətli siyasi xadim Heydər Əliyevin mənalı və şərəfli ömür yolundan, Azərbaycan xalqı və dövləti qarşısındakı böyük xidmətlərindən geniş məlumat verdi.

Gədəbəy rayon məhkəməsinin nümayəndəsi Vahid Sadıqov çıxış edərək, Ulu Öndərin Azərbaycanın sosial-iqtisadi inkişafı, dövlətçiliyimizin qorunması və möhkəmləndirilməsində, eləcə də, hüquqi dövlət quruculuğu sahəsində misilsiz xidmətlərindən danışıb.

Tədbir iştirakçıları ilə fikirlərini bölüşdürən digər çıxışçılar da Heydər Əliyevin Azərbaycan xalqı və dövləti üçün gördüyü əvəzsiz xidmətlərindən danışaraq, Onun əziz xatirəsinin xalqımızın qəlbində daima yaşayacağını bildiriblər.

Kürdəmirdə Ümummilli Lider Heydər Əliyevin anım günü qeyd olundu

Respublikamızın bütün şəhər və rayonlarında Ulu Öndər Heydər Əliyevin anım gününə həsr olunmuş silsilə tədbirlər keçirilib. Kürdəmir rayonunda Ümummilli Liderin vəfatının 8-ci ildönümü ilə əlaqədar anma mərasimi keçirilib. Səhər saat 10:00-da Heydər Əliyev Parkında başlanan tədbirdə rayon icra hakimiyyətinin, hüquq-mühafizə orqanlarının, təhsil, səhiyyə, mədəniyyət işçilərinin adından Heydər Əliyevin abidəsi önünə əklillər qoyulub. Bunun ardınca idarə, müəssisə rəhbərləri, rayon ağsaqqalları, ziyalıları, gəncləri və rayon sakinləri Ulu Öndərin abidəsini ziyarət edərək, abidənin önünə gül dəstələri düzüblər və Azərbaycan xalqının xilaskarına öz dərin ehtiramlarını ifadə ediblər.

Ziyarətçilər Heydər Əliyev Mərkəzində Ümummilli Liderin həyatının müxtəlif məqamlarını əks etdirən eksponatlara, xatirə şəkillərə baxmış, o dövrdə tarixi günləri anaraq Ulu Öndər Heydər Əliyevlə bağlı xatirələrini bölüşmüşlər. Keçirilən mərasimdə 10 mindən nəfərdən çox rayon sakini iştirak edib.

Beyləqanda “Heydər Əliyevin qurduğu Azərbaycan əbədi yaşayacaqdır” mövzusunda elmi-

praktiki konfrans keçirilibdir

Beyləqanda “Heydər Əliyevin qurduğu Azərbaycan əbədi yaşayacaqdır” mövzusunda elmi-praktiki konfrans keçirilibdir. Beyləqan rayon mədəniyyət və turizm şöbəsində keçirilən elmi-praktiki konfransda xalqımızın Ümummilli Lideri Heydər Əliyevin xatirəsinin bir dəqiqəlik sükutla yad edilməsi ilə başlanılıb. Tədbirdə rayon mədəniyyət və turizm şöbəsinin müdiri Pəhləvi Abdullayev, mərkəzləşdirilmiş kitabxana sisteminin direktoru Gültəkin Məmmədova, “Mil” qəzetinin redaktoru Elman İsrafiloğlu və başqaları Ulu Öndərin şərəfli həyat yolundan və fəaliyyətindən, müstəqilliyimizin qorunmasında və onun daha da möhkəmləndirilməsində, milli dövlət quruculuğu prosesində tarixi xidmətlərindən danışıblar. Bildiriblər ki, Ümummilli Liderin daxili və xarici siyasətini uğurla davam etdirən Prezident İlham Əliyevin məqsədyönlü fəaliyyəti sayəsində Azərbaycan dünyada ən sürətlə inkişaf edən bir dövlətə çevrilmişdir.

Şəkidə Ulu Öndər Heydər Əliyevin xatirəsi anılıb

Şəki Musiqi Kollecində Ümummilli Lider Heydər Əliyevin xatirəsinə həsr olunmuş “Bir ömrün akkordları” adlı tədbir keçirilibdir. Rayon rəhbərliyinin və ictimaiyyət nümayəndələrinin iştirakı ilə keçirilən tədbirdə iştirakçılar əvvəlcə Ulu Öndərin xatirəsini bir dəqiqəlik sükutla yad ediblər.

Tədbirdə Şəki rayon icra hakimiyyətinin başçısı Elxan Usubov bütün ömrünü xalqımızın tərəqqisinə və inkişafına həsr etmiş Ümummilli Liderimiz Heydər Əliyevin Vətən və xalq qarşısındakı əvəzsiz xidmətlərindən danışıbdır. Bildirib ki, Ulu Öndər Heydər Əliyev taleyin xalqımıza bəxş etdiyi dahi şəxsiyyətdir. Azərbaycan tarixinin son 30 ili Ümummilli Lider Heydər Əliyevin adı ilə bağlıdır. Xalqın tələbi ilə 1993-cü ildə ikinci dəfə hakimiyyətə qayıdan Ulu Öndər Heydər Əliyev Azərbaycanın dövlət müstəqilliyini qoruyub saxlamış, atəşkəsə nail olmuşdur. Onun əvəzsiz xidmətləri sayəsində ölkəmizdə daxili sabitlik bərpa edilmiş, iqtisadi inkişaf, quruculuq işlərinə başlanılmışdır. Məhz Ümummilli Liderin məqsədyönlü siyasəti və gərgin əməyi nəticəsində müstəqillik yolunda kövrək addımlarını atan respublikamız iqtisadi böhrandan çıxmış, ölkəmizdə hüquqi dövlət və demokratik cəmiyyət qurulmuş, Azərbaycan dünya birliyində öz layiqli yerini tutmuşdur. Xalqın milli tarixinə və mənəvi dəyərlərinə hörmətlə yanaşan Dahi Öndər millətimizin parlaq gələcəyinin təməlini qoymuşdur.

Rayon rəhbəri bildirib ki, Ulu Öndər Heydər Əliyev təkcə Azərbaycanda deyil, bütün dünyada tanınan və sevilən şəxsiyyət idi. Yaşadığımız dövr tarixə Heydər Əliyev erası kimi daxil olacaqdır. Gələcək nəsillər taleyin bizə bəxş etdiyi bu şərəfli dövrü daha mükəmməl öyrənəcək və təhlil edəcəkdir.

Tədbirdə kollecin xalq çalğı alətləri orkestrinin ifasında Üzeyir Hacıbəylinin “Koroğlu” operasından uvertüra, eləcə də, Ulu Öndər Heydər Əliyevə, doğma Vətənə həsr olunmuş mahnılar səsləndirilmiş, dahi şəxsiyyətin şərəfli həyat yolundan və fəaliyyətindən bəhs edən film nümayiş etdirilibdir.

Ulu Öndərin anım günü ilə bağlı Qax rayonunda dəyirmi masa keçirildi

YAP Qax rayon təşkilatının rayon icra hakimiyyəti ilə birgə Ulu Öndər Heydər Əliyevin anım günü ilə bağlı tədbiri keçirilib. İlk öncə tədbir iştirakçıları Ulu Öndərin rayonun mərkəzində ucaldılmış abidəsi önünə tər gül-çiçək dəstələri düzərək, öz ehtiramlarını bildiriblər. Sonra partiya fəalları Heydər Əliyev muzeyində Ulu Öndərin həyat və fəaliyyətini əks etdirən müxtəlif fotostend və eksponatlarla tanış olub. YAP Qax rayon təşkilatının qərargahında davam edən tədbiri giriş sözü ilə rayon icra hakimiyyətinin başçısı Musa Şəkiliyev bildirib ki, tarixin yüz ildə bir dəfə yetişdirdiyi böyük şəxsiyyətlərdən olan Ulu Öndərimiz Heydər Əliyevin əsas qayəsi və amalı ölkəsini azad, firavan görmək, xalqının xoşbəxt yaşamasını təmin etmək üçün bütün varlığı ilə çalışmaqdan ibarət olub. Onun zəngin irsi, bizlərə miras qoymuş odluğu vətən sevgisi xalq məhəbbəti Azərbaycan xalqının yaddaşından heç vaxt silinməyəcək deyən M.Şəkiliyev Ümummilli Liderin böyük ideyalarının bu gün öz təzahürünü tapdığını da mərasim iştirakçılarının diqqətinə çatdırıb.

YAP Qax rayon təşkilatının sədri Nizami Əhmədov “Heydər Əliyev - əbədiyaşar şəxsiyyət” mövzusunda məruzə edib.

Milli Məclisin üzvü, politoloq Rasim Musabəyov da çıxışında Ulu Öndər Heydər Əliyevin həyat və fəaliyyətindən, Onun xalqı və dövləti qarşısındakı əvəzsiz xidmətlərindən bəhs etdi. Bildirib ki, bu gün ölkəmizin bir dövlət kimi var olması və regionla yanaşı, beynəlxalq arenada öz maraqlarını təmin etməsi xalqın Böyük Öndəri Heydər Əliyevin adı ilə bağlıdır. Bu gün hər bir azərbaycanlının qəlbində Ulu Öndər Heydər Əliyevə böyük sevgi və tükənməz məhəbbət hissləri mövcuddur və Azərbaycan xalqı var olduqca, Ümümmilli Lider Heydər Əliyev ideyaları da var olacaq.

Məruzə ətrafında partiya fəallarından Cəmaləddin Hacıyev, Xalid Heydərov və Turanə Rəcəbova çıxış edərək qeyd etdilər ki, Azərbaycan xalqı Heydər Əliyevin rəhbərliyi ilə olduqca böyük uğurlara imza atmışdır.

Sonda tədbir iştirakçıları Ümummilli Lider Heydər Əliyevin həyat və yaradıcılığından bəhs edən sənədli filmə baxdılar.

R.KAMALQIZI

Səs.- 2011.- 13 dekabr.- S. 13-14.